ក្រសួងការបរទេសកម្ពុជាបានឲ្យដឹងថា ពលករខ្មែរដែលកំពុងស្នាក់នៅ និងធ្វើការងារនៅប្រទេសថៃ ត្រូវទៅទទួលលេខរៀងណាត់ពលករ ដើម្បីបញ្ជាក់អត្តសញ្ញាណ ចាប់ពីថ្ងៃទី៧ខែវិច្ឆិកានេះ នៅគ្រប់មន្ទីរការងារខេត្ត ឬគ្រប់ការិយាល័យការងារនៅទីក្រុងបាងកក។
ក្នុងសេចក្តីជូនដំណឹងចុះថ្ងៃទី៥ ខែវិច្ឆិកា ដែលចុះហត្ថលេខាដោយអនុប្រធានគណៈកម្មការផ្តល់ភាពស្របច្បាប់ដល់ពលករកម្ពុជា ដែលកំពុងស្នាក់នៅ និងធ្វើការនៅប្រទេសថៃ លោក ឡុង វិសាលោ មានខ្លឹមសារថា ក្រោយពីក្រសួងការងារថៃ បានជូនដំណឹងពីការចែកលេខរៀងណាត់ពលករ ជាពិសេសពលករខ្មែរឲ្យទៅបញ្ជាក់អត្តសញ្ញាណ ចាប់ពីថ្ងៃទី៧ ខែវិច្ឆិកា ឆ្នាំ២០១៧នេះទៅ នៅគ្រប់មន្ទីរការងារខេត្តដែលពួកគេកំពុងធ្វើការ ឬនៅគ្រប់ការិយាល័យការងារ នៅទីក្រុងបាងកក។
សេចក្តីជូនដំណឹងមានខ្លឹមសារថា «បងប្អូនពលករកម្ពុជា ត្រូវទៅទទួលលេខរៀងណាត់ពីគ្រប់មន្ទីរការងារខេត្ត ឬគ្រប់ការិយាល័យការងារក្នុងទីក្រុងបាងកក ដើម្បីមកបញ្ជាក់អត្តសញ្ញាណជាមួយក្រុមការងារអន្តរក្រសួងចល័តដែលមាននៅទីក្រុងបាងកក ខេត្តរ៉ាក់យ៉ង និងខេត្តសុងក្លា»។
សេក្តីជូនដំណឹងដដែលបញ្ជាក់ថា ពលករកម្ពុជា ដែលទទួលបានលេខរៀងណាត់រួចពីក្រុមការងារអន្តរ ក្រសួងចល័ត អាចទៅបញ្ជាក់អត្តសញ្ញាណជាមួយក្រុមការងាររហូតដល់ចប់លេខរៀង។
ករណីពលករមានចម្ងល់ អាចទំនាក់ទំនងក្រុមការងារគណៈកម្មការផ្តល់ភាពស្របច្បាប់ដល់ពលករកម្ពុជា ដែលកំពុងស្នាក់នៅ និងធ្វើការនៅប្រទេសថៃ តាមរយៈលេខទូរសព្ទជាភាសាខ្មែរ ០៨២ ៤២ ២០ ០៤៤,០៨២ ៤២ ២០ ០៥៥សម្រាប់ខេត្តប៉ាធុមថានី និង០៨២ ៤២ ២០ ០៧៧ សម្រាប់ខេត្តរ៉ាក់យ៉ង។
របាយការណ៍របស់ក្រសួងការងារកម្ពុជា បានឲ្យដឹងថា បច្ចុប្បន្ននេះ ពលករខ្មែរ ទាំងអស់ដែលកំពុងបម្រើការងារនៅថៃប្រមាណ១លាន១សែននាក់៕
