ប្រភពនានាថា កូរ៉េខាងជើងត្រៀមខ្លួនជជែកអំពីការរំសាយកម្មវិធីនុយក្លេអ៊ែរ

ប្រភពនានា បានអះអាងថា កូរ៉េខាងជើងបានប្រាប់ទៅអាមេរិកជាលើកដំបូងថា ខ្លួនត្រៀមខ្លួនពិភាក្សាអំពីការរំសាយកម្មវិធីនុយក្លេអ៊ែរនៅលើឧបទ្វីបកូរ៉េ នៅពេលមេដឹកនាំលោក គីម ជុងអ៊ុន ជួបជាមួយប្រធានាធិបតី លោក ដូណាល់ ត្រាំ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។

ទីភ្នាក់ងារព័ត៌មាន AFP បានចុះផ្សាយបែបនេះ ដោយបានដកស្រង់សម្ដីប្រភពនានា ដែលបានថ្លែងក្នុងលក្ខខណ្ឌមិនបញ្ចេញឈ្មោះ។ AFP បានចុះផ្សាយបន្តថា ក្រុមមន្ត្រីអាមេរិក និងកូរ៉េខាងជើង បានទាក់ទងគ្នាដោយសម្ងាត់នាពេលថ្មីៗនេះ ដែលនៅក្នុងនោះ ក្រុងព្យុងយ៉ាងបានបញ្ជាក់ពីឆន្ទៈរបស់ខ្លួន ក្នុងការរៀបចំជំនួបកំពូលមិនធ្លាប់កើតមានមួយនេះ។

ទំនាក់ទំនងជាសម្ងាត់នោះ កំពុងស្ថិតក្នុងដំណាក់កាលបឋមនៅឡើយ ដោយក្នុងនោះមានការចូលរួមពីក្រុមមន្ត្រីមកពីក្រសួងការបរទេសអាមេរិក ដែលបាននិយាយទៅកាន់កូរ៉េខាងជើងតាមរយៈបេសកម្មរបស់ខ្លួននៅអង្គការសហប្រជាជាតិ និងក្រុមមន្ត្រីចារកម្មមកពីភាគីទាំងពីរ ដោយប្រើប្រាស់បណ្ដាញទំនាក់ទំនងដាច់ដោយឡែកមួយ។

រហូតមកដល់សព្វថ្ងៃនេះ អាមេរិកបានពឹងផ្អែកយ៉ាងច្រើនទៅលើសម្ព័ន្ធមិត្តរបស់ខ្លួន គឺកូរ៉េខាងត្បូង ក្នុងការស្វែងយល់ពីបំណងប្រាថ្នារបស់លោក គីម។ ប្រេសិតពិសេសកូរ៉េខាងត្បូង បានធ្វើដំណើរទីក្រុងវ៉ាស៊ីងតោនកាលពីខែមុន ដើម្បីបញ្ចុះបញ្ចូលមេដឹកនាំអាមេរិកឲ្យទទួលយកជំនួបស្នើឡើងដោយលោក គីម ដែលបានផ្លោងសង្គ្រាមពាក្យសម្ដីដាក់គ្នាទៅវិញទៅមកកាលពីឆ្នាំមុននោះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ