ជំនន់ទឹកភ្លៀងបន្ដលិចផ្ទះនិងដំណាំកសិកម្មពលរដ្ឋចំនួននៅខេត្ដសៀមរាប

ទឹកលិចស្រូវនិងផ្ទះពលរដ្ឋនៅស្រុកជីក្រែង

អាជ្ញាធរស្រុកមួយចំនួន នៅខេត្ដសៀមរាប​ អោយដឹងថា លំនៅឋាននិងដំណាំកសិកម្មរបស់ប្រជាពលរដ្ឋ ជាច្រើនគ្រួសារ នៅស្រុកជីក្រែង បានលិចលង់ ដោយសារជំនន់ទឹកភ្លៀង កាលពីថ្ងៃទី៦ខែតុលា​។

សមាជិកក្រុមប្រឹក្សាស្រុកជីក្រែង លោក សម សូរិយា ប្រាប់វីអូឌី នៅព្រឹកថ្ងៃទី៩ខែតុ​លា​​​នេះថា លំនៅឋាននិងដំណាំកសិកម្មរបស់ពលរដ្ឋទាំងនោះ មានចំនួន៦ភូមិ ស្ថិតនៅក្នុងឃុំចំនួន៤ ដែលលោកថា ​មានឃុំគោកធ្លកលើ ឃុំគោកធ្លកក្រោម ឃុំពង្រលើ និងឃុំកំពង់ក្ដី។ លោកថា​ ការលិចលង់នេះ គឺចាប់ពីថ្ងៃទី៥ដល់ថ្ងៃទី៩ខែតុលានេះ បន្ទាប់ពីមានភ្លៀងធ្លាក់ជាបន្ដបន្ទាប់ ដែលលោកថា​ធ្វើអោយប៉ះពាល់ដល់ដំណាំកសិកម្មជាង១០០ហិកតា ខណៈលំនៅឋាននិងដំណាំស្រូវពួកគាត់ចំនួន៦ភូមិរងការលិចលង់ធ្ងន់ធ្ងរ។

លោកបន្ដថា៖ «ភូមិកំពង់ក្ដី ដែលប៉ះពាល់ធ្ងន់ធ្ងរ មានពីរភូមិប្រហែលជា៣៥ហិចតា ដែលស្រូវតែកំពុងតែផើមហើយ​ហ្នឹងបែកហើយ។ មានភូមិអន្សោងពង និងភូមិត្រាចប៉ះពាល់ធ្ងន់ធ្ងរជាងគេបាទ។ ពីរភូមិហ្នឹងលិចទាំងអស់តែម្ដងបាទ»។

ដោយឡែក អភិបាលស្រុកស្វាយលើ លោក ស៊ិក ប៊ុនស៊ិន​ អោយដឹងដែរថា ជំនន់ទឹកភ្លៀង មិនត្រឹមតែប៉ះពាល់ដល់ពលរដ្ន នៅតាមបណ្ដាស្រុកមួយចំនួនក្នុងខេត្ដសៀមរាប​ប៉ុ​ណ្ណោះ​​​​ទេ​ ប៉ុន្ដែទឹកភ្លៀងនេះ បានលិចលង់នៅតំបន់មួយចំនួន នៅលើភ្នំគូលស្រុកស្វាយលើ​ផង​ដែរ ខណៈដែលទំនប់ទឹកមួយកន្លែង នៅភូមិអន្លង់ធំ បានបាក់ធ្លាយ ដោយសារធ្លាក់ខ្លាំងជា​បន្ដបន្ទាប់។ ប៉ុន្ដែលោកបន្ដថា មកដល់ថ្ងៃនេះ ទឺកជំនន់បានស្រកបន្ដិចវិញ និងមិនមានប៉ះពាល់​ដល់លំនៅឋានពលរដ្ឋនោះទេ។ លោកថា ទឹកដែលលិចខ្លាំងគឺស្ថិតនៅតំបន់ទេសចរណ៍ធ្លាក់ភ្នំគូលេន។

VOD មិនអាចទាក់ទង អ្នកនាំពាក្យសាលាខេត្ដសៀមរាប លោក លី សំរិទ្ធិ ដើម្បីសាកសួរបន្ថែមបាននៅឡើយទេ ដោយទូរសព្ទរបស់លោកមិនអាចទាក់ទងបាន។

សូមជំរាបថា ជំនន់ទឹកភ្លៀងនេះ បានកើតឡើងតាំងពីថ្ងៃទី២ខែតុលានេះ ដែលធ្វើឲ្យផ្ទះពលរដ្ឋ និងផ្លូវកំណត់ផ្លូវមួយចំនួននៅក្នុងក្រុងសៀមរាប រងការលិចលង់។ ប៉ុន្ដែមកដល់ពេលនេះ មិនមានរបាយការណ៍បញ្ជាក់ពីទំហ៊ំនៃការខូចខាតដំណាំកសិកម្មនិងពលរដ្ឋបាននៅឡើយទេ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ