លោក ដូណាល់ ត្រាំ នៅថ្ងៃនេះ បានតែងតែកូនប្រសារប្រុសរបស់លោកឈ្មោះ ជែរ៉េដ ឃូស្ន័រ ឲ្យធ្វើជាទីប្រឹក្សាជាន់ខ្ពស់សេតវិមាន ដែលនេះគឺជាការផ្ដល់រង្វាន់មួយដល់បុរសម្នាក់ ដែលត្រូវបានគេដឹងយ៉ាងទូលំទូលាយថា ជាអ្នកបញ្ចេញគំនិតនៅពីក្រោយការបោះឆ្នោតរបស់លោក ត្រាំ ប៉ុន្តែ ការតែងតាំងនេះជំរុញឲ្យមានក្ដីបារម្ភខាងផ្នែកផ្លូវច្បាប់ និងក្រមសីលធម៌។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
លោក ជែរ៉េដ ឃូស្ន័រ គឺជាអ្នកអភិវឌ្ឍន៍អចលនទ្រព្យ និងជាចាងហ្វាងទស្សនាវដ្ដី មានវ័យ ៣៦ឆ្នាំ ដែលមានមុខមើលទៅដូចកូនក្មេង។ បុរសរូបនេះ នឹងក្លាយជាសមាជិកវ័យក្មេងនៅក្នុងរដ្ឋាភិបាលរបស់លោក ត្រាំ ដោយត្រូវធ្វើការជិតដិតជាមួយប្រធានផ្នែកបុគ្គលិក និងប្រធានផ្នែកយុទ្ធសាស្ត្រ។
លោក ត្រាំ បានប្រកាសថា លោក ជែរ៉េដ គឺជាទ្រព្យដ៏មហាសាល និងជាទីប្រឹក្សាដ៏គួរឲ្យទុកចិត្តចាប់តាំងពីយុទ្ធនាការរហូតដល់ការផ្លាស់ប្ដូរអំណាច ហើយលោកថា លោកមានមោទនភាពដែលមានលោក ជែរ៉េដ ស្ថិតក្នុងក្បាលម៉ាស៊ីនដឹកនាំក្នុងរដ្ឋបាលរបស់លោក។
ការតែងតាំងនេះ ត្រូវបានប្រកាសឲ្យដឹង ២ថ្ងៃមុននឹងលោក ត្រាំ គ្រោងធ្វើសន្និសីទកាសែតលើកដំបូងរបស់លោក ចាប់ពីតាំងពីឈ្នះការបោះឆ្នោតកាលពីខែវិច្ឆិកាឆ្នាំមុន។
លោក ឃូស្ន័រ ដែលបានរៀបការជាមួយកូនស្រីច្បងរបស់លោក ត្រាំ នោះ ត្រូវបានគេដឹងថា ជាអ្នកផ្ដល់គំនិតសម្រាប់យុទ្ធនាការឃោសនាបោះឆ្នោត ដែលផ្ដោតទៅលើសារផ្សព្វផ្សាយលើបណ្ដាណព័ត៌មានសង្គម៕