មន្ត្រីជាន់ខ្ពស់អង្គការសហប្រជាជាតិថ្លែងថា មេដឹកនាំហ្វីលីពីន លោក រ៉ូឌ្រីហ្គោ ឌូទើតេ គួរតែទៅពិនិត្យបញ្ហាជំងឺផ្លូវចិត្ត ដោយសារតែការប្រើប្រាស់ពាក្យសម្តី និង ប្រតិកម្មមួយចំនួនហាក់ខុសប្រក្រតី។
មួយរយៈចុងក្រោយនេះ មន្ត្រីរបស់អង្គការសហប្រជាជាតិមានការប៉ះទង្គិចគ្នាទៅវិញទៅមក ជាមួយរដ្ឋាភិបាលហ្វីលីពីន ជុំវិញបញ្ហាសិទ្ធិមនុស្ស។ មន្ត្រីរបស់អង្គការសហប្រជាជាតិកំពុងតែស៊ើបអង្កេតជុំវិញករណីសង្គ្រាមគ្រឿងញៀនសម្លាប់មនុស្សក្រៅប្រព័ន្ធច្បាប់។
ការប្រឈមមុខដាក់គ្នារហូតដល់រដ្ឋាភិបាលហ្វីលីពីនបានចោទ អ្នករាយការណ៍ពិសេសអង្គការសហប្រជាជាតិលោកស្រី Victoria Tauli-Corpuz ថា បានចូលរួមជាមួយក្រុមភេរវកម្មនិងបះបោរ។
ប្រតិកម្មទៅនិងរដ្ឋាភិបាលរបស់លោក ឌូ ទើតេ គឺមន្ត្រីជាន់ខ្ពស់ឧត្តមស្នងការអង្គការសហប្រជាជាតិលោក Zeid Ra’ad Al Hussein ថ្លែងថា លោកស្នើឲ្យលោក ឌូ ទើតេ ទៅត្រួតពិនិត្យបញ្ហាជំងឺរោគចិត្ត។