អាមេរិកនៅថ្ងៃនេះ បានរិះគន់ដំណើរទស្សនកិច្ចរបស់ប្រធានាធិបតី លោក វ៉្លាឌីមៀ ពូទីន ទៅកាន់តំបន់អាប់ខាហ្ស៊ីរបស់ប្រទេសហ្សក់ហ្ស៊ីដែលស្ថិតក្រោមការគ្រប់គ្រងរបស់រុស្ស៊ី ដោយអាមេរិកចាត់ទុកថា ជាទង្វើ “មិនសមរម្យ”។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
កាលពីឆ្នាំ២០០៨ ប្រទេសរុស្ស៊ី និងហ្សកហ្ស៊ី បានធ្វើសង្គ្រាមនឹងគ្នាមួយប៉្រាវដណ្ដើមយកតំបន់នោះ ដែលលោក ពូទីន បានទៅទស្សនាកាលពីថ្ងៃពុធកន្លងមកនេះ ចំថ្ងៃចាប់ផ្ដើមនៃសង្គ្រាមរុស្ស៊ី-ហ្សក់ហ្ស៊ី។
ក្រសួងការបរទេសអាមេរិក បាននិយាយថា អាមេរិកជំរុញទៅរុស្ស៊ី ឲ្យដកកងទ័ពរបស់ខ្លួនទៅកាន់ទីតាំងនៅមុនសង្គ្រាម តាមកិច្ចព្រមព្រងបទឈប់បាញ់គ្នាកាលពីឆ្នាំ២០០៨ ហើយទទួលស្គាល់តំបន់អាប់ខាហ្ស៊ី និងអូសេទីខាងត្បូងជារបស់ប្រទេសហ្សកហ្ស៊ី។
តំបន់អាប់ខាហ្ស៊ី ត្រូវបានទទួលស្គាល់ជាអន្តរជាតិជាផ្នែកមួយនៃប្រទេសហ្សកហ្ស៊ីនៅក្រោមរបបសហភាពសូវៀត ប៉ុន្តែ រុស្ស៊ីបានចាត់ទុកជាប្រទេសបំបែកខ្លួន រួមគ្នាជាមួយតំបន់អូសេទីខាងត្បួង បន្ទាប់ពីសង្គ្រាមនៅត្បីលីស៊ី។
ក្រុងមូស្គូបានដាក់កងទ័ពរបស់ខ្លួនរាប់ពាន់នាក់នៅតំបន់បំបែកខ្លួនទាំងពីរ ដែលប្រទេសហ្សកហ្ស៊ីហៅថា កងទ័ពឈ្លានពាន ហើយរុស្ស៊ីក៏បានផ្ដល់ជំនួយហិរញ្ញវត្ថុដល់តំបន់ទាំងពីរនេះផងដែរ៕
ក្នុងដំណើរទៅទស្សនកិច្ចនៅទីក្រុង Pitsunda នៅសមុទ្រខ្មៅ លោក ពូទីន បានបញ្ជាក់ថា រុស្ស៊ីធានាយ៉ាងរឹងមាំចំពោះសន្តិសុខ និងការផ្ដាច់ខ្លួនរបស់តំបន់អាប់ខាហ្ស៊ី៕