ក្នុងកិច្ចសម្ភាសន៍បន្តផ្ទាល់កាលពីយប់ថ្ងៃទី៧ កញ្ញា តារាកំប្លែងភេទទី៣ កញ្ញាយ៉េយ៉េ ដែលមានឈ្មោះកំណើតថា ឃ្លោក មករា បានអះអាងថាកាលពីអំឡុងជាង៣ឆ្នាំមុន កញ្ញាមិនមានឱកាសរកលុយមានបានពីសិល្បៈបានច្រើនដូចពេលបច្ចប្បន្ននោះទេ ទើបក្នុងពេលម្ដាយនាងស្លាប់គឺមិនមានសូម្បីតែលុយសម្រាប់ទិញក្ដារមឈូសធ្វើបុណ្យអោយម្ដាយ។ នាងបានបង្ហាញពីអារម្មណ៍សង្វេគចិត្ត ខណៈដែលរដូវបុណ្យទានមកដល់ ហើយម្ដាយរបស់នាងទៅបាត់ ដោយមិនបានទទួលផ្លែផ្កាពីការប្រឹងប្រែងរបស់នាង។
កញ្ញាយ៉េយ៉េ និយាយថា មុនមានឱកាសបានឡើងទូរទស្សន៍កញ្ញារកប្រាក់បានត្រឹមតែបង់ថ្លៃផ្ទះ និងចាយវាយប្រចាំថ្ងៃប៉ុណ្ណោះ ដោយពេលម្ដាយរបស់នាងធ្លាក់ឈឺធ្ងន់ ហើយសម្រាកនៅក្នុងមន្ទីរពេទ្យគឺនាងបានត្រឹមតែរកលុយមកព្យាបាលជំងឺរបស់ម្ដាយក្នុងរូបភាពបណ្ដែតៗ ដោយមិនមានលុយព្យាបាលម្ដាយអោយពេញដៃពេញជើងនោះទេ។ ជាពិសេសក្នុងពេលដែលម្ដាយត្រូវសម្រាកនៅក្នុងមន្ទីរពេទ្យរហូតដល់រយៈពេលពីរបីឆ្នាំ គឺនាងរឹតតែប្រឈមនឹងរកលុយមកបំពេញបំណងរបស់ម្ដាយមិនបាន។ នាងថាជំងឺរបស់ម្ដាយកាន់តែធ្ងន់ៗដោយសារតែលទ្ធភាពព្យាបាលមិនសូវមានដិតដល់ ហើយទីបំផុតម្ដាយរបស់នាងក៏អស់ជីវិតកាលពីជាង៣ឆ្នាំមុន។ នាងនៅតែបង្ហាញអារម្មណ៍មិនអស់ចិត្ត ក្នុងពេលដែលរយៈពេលដែលម្ដាយស្លាប់គឺមិនដល់៣ឆ្នាំស្រួលបួលផង តែជីវភាពរបស់នាងបែរជាខុសគ្នាមេឃ និងដី ដែលនាងយល់ថាម្ដាយរបស់នាងមិនគួរលាចាកលោកទៅ ដោយមិនរង់ចាំទទួលផ្លែផ្កាពីការប្រឹងប្រែងរបស់នាងនៅក្នុងពេលនេះ។
នាងសារភាពថាក្នុងពេលម្ដាយស្លាប់គ្រួសាររបស់នាងអត់មានសូម្បីតែលុយទិញមឈូសអោយម្ដាយ ក្នុងពេលដែលម្ដាយនាងមុនស្លាប់ គឺបានមានក្ដីស្រម៉ៃចង់បានមឈូសមួយដើម្បីដាក់សពអោយបានសមរម្យ។ នាងនិយាយថា មុនពេលលាចាកលោកម្ដាយរបស់នាង គឺអ្នកស្រី ព្រៃ ណៃ ដែលបានទទួលមរណភាពកាលពីជាង៣ឆ្នាំក្នុងវ័យ៦៧ឆ្នាំ បានសួរនាងថា «បើម្ដាយស្លាប់តើកូនមានលុយទិញមឈូសអោយម្ដាយទេ ម្ដាយចង់បានមឈូសមួយគ្រាន់ល្អមើលតិច!»។ សម្ដីមួយម៉ាត់នេះ នាងថានៅស្រក់ទឹកភ្នែករាល់ពេលនឹកឃើញ ដោយសារតែក្នុងពេលនោះគឺនាងពិតជាមិនមានលទ្ធភាពទិញក្ដារមឈូសប្រាកដមែន ដោយសូម្បីតែក្ដារមឈូសដែលមានតម្លៃត្រឹមតែ៥០០ដុល្លារក៏នាងអត់មានតែម្ដងនៅក្នុងពេលនោះ។
នាងនិយាយថា«កាលពីម្ដាយខ្ញុំស្លាប់ហ្នឹងអត់យូរប៉ុន្មានទេ គឺទើបតែ៣ឆ្នាំជាងអីទេ តែកាលនុងបងប្អូនខ្ញុំក្រមែនទែន ហើយកាលនុងខ្ញុំស្រក់ទឹកភ្នែក ដោយសារតែក្ដារមឈូសត្រឹមតែតម្លៃ៥ដុល្លារសោះ ខ្ញុំអត់មានលុយទិញ!»។ នាងលើកឡើងទាំងអួលដើមករថាឈឺចាប់ណាស់ ដែលម្ដាយខ្លួនឯងស្លាប់បែរជាគ្មានលុយទិញក្ដារមឈូសអោយម្ដាយ ហើយអោយម្ដាយត្រូវដាក់ក្នុងក្ដារមឈូសរបស់វត្ត ប៉ុន្តែរំលងត្រឹមតែ២បីឆ្នាំសោះស្រាប់តែនាងមានការផ្លាស់ប្ដូរក្នុងការរកចំណូលដូចមេឃ និងដី។ នាងថាបើខ្លួននៅតែក្រដូចពេលម្ដាយស្លាប់ នោះការតូចចិត្តមិនមាននោះទេ ប៉ុន្តែដល់ពេលម្ដាយទើបតែស្លាប់ហើយនាងក៏បានល្បីឈ្មោះ និងមានលុយកាក់ពេញដៃ ទើបនាងកាន់តែមានការតូចចិត្ត។ នាងអះអាងថា ក្នុងពេលម្ដាយឈឺនាងបានហក់ចូលវិស័យសិល្បៈខ្លះៗមកហើយ ប៉ុន្តែការងារពេលនោះគឺរកមិនគ្រប់ទិញខោអាវតែម្ដង ដោយសារតែនាងមិនមានឱកាសបានឡើងលេងលើកញ្ចក់ទូរទស្សន៍ ហើយតម្លៃខ្លួនដែលគេហ៊ានជួលក៏អោយតិចតួច។
នាងទើបតែមានឱកាសបានឡើងទូរទស្សន៍កាលពីរង្វង់២ឆ្នាំមុនប៉ុណ្ណោះ ខណៈដែលក្នុងពេលនេះការងារសិល្បៈរបស់នាងក៏ជួយអោយានាងទទួលបានប្រាក់ចំណូលមិនក្រោម៤ពាន់ដុល្លារក្នុងមួយខែ ក្នុងពេលដែលក្នុងខែខ្លះក៏បានច្រើនជាងនេះដែលមិនធ្វើអោយនាងពិបាកដូចមុន។ នាងចង់អោយពេលវេលាវិលថយក្រោយ ជាពិសេសគឺចង់ទិដ្ឋភាពម្ដាយស្លាប់ត្រូវចំពេលដែលនាងរកចំណូលបានច្រើនដូចពេលនេះ ដើម្បីអោយនាងបានទិញក្ដារមឈូសអោយម្ដាយ និងបានធ្វើបុណ្យអោយម្ដាយអោយបានសមរម្យជាងមុន។ នាងថាខ្លួនបានធ្វើខុសចំពោះម្ដាយច្រើនណាស់ ដោយសារតែពេលដែលម្ដាយរបស់នាងនៅរស់ គឺម្ដាយនាងគ្រាន់តែជាអ្នករែកបបរ និងនំបញ្ចុក ដើរលក់តាមិចញ្ចើមថ្នល់ និងតាមភូមិតូចៗនៅភ្នំពេញ តែនាងដែលត្រូវអោយម្ដាយនៅចាំផ្ទះនៅខេត្តព្រះសីហនុ និងអោយរៀនសូត្រ បែរជាយកលុយម្ដាយផ្ញើអោយរាល់ខែ យកទៅដើរលេងមិនចូលសាលា។ នាងទើបតែបានភ្ញាក់ខ្លួនក្នុងពេលវ័យរបស់ខ្លួនកាន់តែធំ ហើយត្រូវបានម្ដាយអោយមកលេងផ្ទះជួលដែលម្ដាយស្នាក់នៅរួចក៏ឃើញពីទិដ្ឋភាពរកប្រាក់របស់ម្ដាយប៉ុណ្ណោះ ទើបនាងចាប់ផ្ដើមខឹងខ្លួនឯង ហើយសម្រេចចិត្តឈប់រៀន ដើម្បីជួយរែកបបរម្ដាយលក់នៅផ្សារស្ទឹងមានជ័យ។
នាងនិយាយថា«កាលពីមុនគ្រួសារខ្ញុំនៅកំពង់សោមទេ ដោយប៉ាខ្ញុំគាត់ចាស់ធ្វើអីមិនសូវបាន ហើយម្ដាយខ្ញុំមករែកបបរលក់នៅភ្នំពេញ ចំណែកខ្ញុំនៅរៀននៅនោះហើយអត់ដឹងសោះ ថាគាត់នៅភ្នំពេញលំបាកចឹង ទម្រាំដឹងហួសពេលបាត់!»។ ក្រោយពេលឈប់រៀននាងបានទៅរែកបបរលក់ជាមួយម្ដាយ ហើយដោយសារតែមាននិស្ស័យជាស្រីតាំងពីកំណើត ក៏ទៅគេធ្វើការនៅក្នុងហាងខារ៉ាអូខេ រហូតមានឱកាសបានស្គាល់មិត្តភ័ក្រ្តហើយត្រូវគេគេដឹកនាំអោយក្លាយជាតួល្ខោន និងជាអ្នកកំប្លែង។ យ៉ាងណាមិញ នាងអះអាងថាឱកាសរកប្រាក់បានច្រើនទើបតែកើតឡើងក្រោយពេលម្ដាយស្លាប់ប៉ុណ្ណោះ ទើបក្នុងពេលម្ដាយស្លាប់នាងមិនមានសូម្បីលទ្ធភាពទិញក្ដារមឈូសក្នុងពេលធ្វើបុណ្យអោយម្ដាយ។
កញ្ញា យ៉េយ៉េ ប្រកាសថានាងមានអារម្មណ៍សោកស្ដាយជាពន់ពេក ដែលពេលម្ដាយនៅរស់នៅគឺមានលទ្ធភាពធ្វើអោយម្ដាយសប្បាយចិត្តបានតិចបំផុត ជាពិសេសគឺរឿងមិនខំរៀន និងរឿងធ្វើខ្លួនជាស្រីជាដើមធ្វើអោយម្ដាយពិបាកចិត្ត។ យ៉ាងណាមិញ កញ្ញាថាម្ដាយនាងមុនស្លាប់គឺបានបង្ហាញពីការបារម្ភពីនាងដែលនាងសម្រេចចិត្តធ្វើស្រី១០០ភាគរយ ដោយបានទាំងទូន្មាននាងអោយធ្វើអំពើល្អ និងកុំខឹងអ្នកមើលងាយនាងពាក់ព័ន្ធនឹងរឿងរើសអើងភេទទី៣នោះផង។ នាងអះអាងថាមុនពេលម្ដាយស្លាប់ គឺបានមើលថែម្ដាយទាំងយប់ទាំងថ្ងៃ បើទោះជានាងមិនអស់ចិត្តពីរឿងដែលនាងមិនមានលទ្ធភាពទិញក្ដារមឈូសតម្លៃ៥០០មួយដាក់សពអោយម្ដាយក្នុងពេលធ្វើបុណ្យនោះក៏ដោយ៕