អ្នកឃ្លំាមើលព្រៃឈើបានអះអាងប្រហាក់ប្រហែលគ្នាថា នៅប៉ុន្មានខែចុងក្រោយនេះ បទល្មើសព្រៃឈើនៅខេត្តព្រះវិហារនិងខេត្តកំពង់ធំហាក់កើនឡើងជាធម្មតា ខណៈរដ្ឋាភិបាលកំពុងខ្វាយខ្វល់ពីការរំលាយបក្សសង្គ្រោះជាតិ។
ទីប្រឹក្សាសហគមន៍ប្រចំាខេត្តព្រះវិហារ អ្នកស្រី នួន ម៉ុន បានរៀបរាប់ថា បទល្មើសព្រៃឈើនៅក្នុងខេត្តរបស់គាត់នៅតែបន្តកើតមានពីមួយថ្ងៃទៅមួយថ្ងៃ ដោយថាឈ្មួញបានលួចចូលទៅកាប់ឈើគគី ឈើផ្តៀក ឈើទាល ធ្នុង នៅតំបន់ការពារ និងអភិរក្ស ដោយពុំមានអាជ្ញាធរភូមិ ឃុំ និងមន្ត្រីពាក់ព័ន្ធផ្សេងទៀត ចុះទប់ស្កាត់ឲ្យមានប្រសិទ្ធិភាពនោះទេ។
អ្នកស្រីនិយាយថា«មើលឃើញដឹករាល់តែយប់ រាល់តែថ្ងៃ អាជ្ញាធរភូមិឃុំអត់មាន[ទប់ស្កាត់]ទេ ដូចខ្ញុំថា បរិស្ថានគឺជាតួនាទីរបស់គាត់ហើយ ក្នុងព្រៃឈើ ប៉ុន្តែដូចខ្ញុំថា បើគាត់ឲ្យបងប្អូន កូនចៅ គាត់ចុះទៅ ដល់ពេលចាប់ គាត់ប្រលែងវិញ ដែលគេ[ជនល្មើស]បង់លុយ ដ៏ប្រលែងវិញ អាលើសដើមទៀត ដើម្បីស្រង់ដើម»។
ចំណែក ប្រជាសហគមន៍ព្រៃឡង់ប្រចំាខេត្តកំពង់ធំ លោក ហឿន សុភាព ក៏អះអាងប្រហាក់ប្រហែលនិងអ្នកស្រី នួន ម៉ុន ដែរថានៅខេត្តកំពង់ធំឈ្មួញបានដឹកឈើក្នុងមួយថ្ងៃ៥ទៅ៧គោយន្ត ដោយមិនខ្លាចអាជ្ញាធរនោះទេ។ លោកយល់ថា ការកាប់ឈើនៅតែបន្តកើតកើនឡើងច្រើនបែបនេះ ដោយសារអ្នករកស៊ីឃុបខិតគ្នាជាមួយអាជ្ញាធរមូលដ្ឋាន។
លោក ហឿន សុភាព បញ្ជាក់ថា បើរដ្ឋាភិបាលមិនទប់ស្កាត់ឲ្យទាន់ពេលទេ លោកថាយ៉ាងយូរ១០ឆ្នាំទៀត ព្រៃឈើនៅកម្ពុជានឹងហិនហោចអស់។
អ្នកស្រីនិយាយថា«ប្រសិនជាអត់មានចំណាត់ការទេ ខ្ញុំហ៊ាននិយាយថា តែ១០ឆ្នាំទៀតនិងត្រូវបាត់បង់ដើមឈើធំៗអស់ហើយ ព្រោះដើមឈើយើងមើលទៅ ចង់និយាយថា វានៅតែបាត់ស្ទើរជារៀងរាល់ថ្ងៃ បានន័យថា វាអត់ថយចុះ ហើយការបង្ក្រាបយើងអត់ឃើញមានចំណាត់ការខ្លំាងមែនទែនទេ វាគ្រាន់តែថា ការចុះបង្ក្រាប នៅតែធ្វើធម្មតាដូចមុនៗ»។
រដ្ឋាភិបាលបានសម្រេចបង្កើតគណៈកម្មការជាតិ ទប់ស្កាត់ និងបង្ក្រាបបទល្មើសព្រៃឈើ កាលថ្ងៃទី១៥ មករា ឆ្នាំ២០១៦ ដោយលោក សៅ សុខា ធ្វើជាប្រធានគណៈកម្មការនោះ។ ទោះជាយ៉ាងណា សហគមន៍អះអាងថា បទល្មើសព្រៃឈើនៅតែបន្តកើតមានច្រើនដដែល ដោយពុំមានការទប់ស្កាត់ពីអាជ្ញាធរនិងស្ថាប័នពាក់ព័ន្ធឲ្យមានប្រសិទ្ធិភាពនៅឡើយ។
ឆ្លើយតបនឹងករណីនេះលោក សៅ សុខា បានទទួលស្គាល់ថា បទល្មើសព្រៃឈើនៅកម្ពុជាពិតជានៅតែបន្តកើតមានមែន ប៉ុន្តែលោកថាមិនមានទ្រង់ទ្រាយធំនោះទេ។ ករណីនេះលោកថា អាជ្ញាធរមិនអាចទប់ស្កាត់បានទំាងអស់បានទេ ដរាបណាពលរដ្ឋមិនឈប់កាប់ព្រៃឈើ។
លោកនិយាយថា«ការអប់រំឲ្យយល់ពីតម្លៃធនធានធម្មជាតិ គឺសំខាន់ណាស់សម្រាប់ប្រជាជនរបស់យើងដែលគាត់ជាម្ចាស់ប្រទេស គាត់ជាម្ចាស់ទឹកដីផ្ទាល់ បើគាត់នៅតែដើរធ្វើតែចឹង[កាប់ឈើ] ឥឡូវបើឲ្យទៅចាប់អ្នកទំាងអស់ហ្នឹង ចាប់អ្នកដឹកឈើកំប៉ិចកំប៉ុកទំាងអស់ហ្នឹង ខ្ញុំថាប្រហែលជារកគុកដាក់គ្មានទេមានបាយឯណាឲ្យវាស៊ីទៀតហ្នឹង វាចង្រៃខុសរបៀប…និយាយឲ្យខ្លីទាល់តែប្រជាជនខ្លួនឯងឈប់កាប់ខ្លួនឯងតែម្តងទៅ ឥឡូវហ្នឹងបើថាឲ្យយកអនុវត្តច្បាប់មួយរយភាគរយ គ្មានអ្វីឲ្យស៊ីទេ គ្មានគុកដាក់ទេ ព្រោះពូកែដឹកម៉ូតូមួយថ្ងៃៗអត់គិតធ្វើអ្វីសោះចឹង ងាប់ហើយ»។
លោក សុខា បានបញ្ជាក់ដែរ ចាប់ពីបង្កើតគណៈ កម្មការជាតិ ទប់ស្កាត់ និងបង្ក្រាបបទល្មើសព្រៃឈើ រហូតមកដល់ថ្ងៃទី១០ ខែវិច្ឆិកានេះ ក្រុមការងារបានរឹបអូសឈើខុសច្បាប់ជិតមួយសែនម៉ែត្រគីប និងបញ្ជូនសំណុំរឿងទៅតុលាការជិត១០០ករណីនេះ ដោយថាក្នុងនោះអ្នកប្រព្រឹត្តបទល្មើសក៏មានមន្ត្រីពាក់សាក់ផងដែរ។
ក្នុងវេទិកាជាតិ «ស្តីពីការការពារ និងអភិរក្សធនធានធម្មជាតិ» ក្នុងរាជធានីភ្នំពេញ កាលពីថ្ងៃទី២២ខែសីហា លោកនាយករដ្ឋមន្ត្រី ហ៊ុន សែន រំឭកឲ្យមន្ត្រីរបស់ខ្លួន ឲ្យពង្រឹងប្រសិទ្ធភាព ទប់ស្កាត់បទល្មើសព្រៃឈើ ដោយថា ការបណ្តោយឲ្យមានការកាប់បំផ្លាញព្រៃឈើ លោកថា «ស្មើកាប់ក្បាលរបស់លោក»។
លើសពីនេះទៀត លោក ហ៊ុន សែន ក៏បានបញ្ជាឲ្យស្រង់ឈ្មោះមន្ត្រីខិលខូច និងឧកញ៉ាមួយចំនួន ដែលលោកថា ជួយកសាងបន្តិចបន្តួច តែបែរជាសង្ខំលាក់ខ្លួន ធ្វើជាឧក្រិដ្ឋជនបំផ្លាញព្រៃនៅតាមខេត្តមួយចំនួនទៅវិញ។
លោក ហ៊ុន សែន រំឭកថា ការបង្ក្រាបឧក្រិដ្ឋជនព្រៃឈើ មិនពិបាកដូចបង្ក្រាបឧក្រិដ្ឋជន ជួញដូរគ្រឿងញៀននោះទេ។
បើតាមរបាយការណ៍ ធនាគារពិភពលោក ឲ្យដឹងថា គម្របព្រៃឈើបានធ្លាក់ចុះពីជិត ៦០ភាគរយនៅក្នុងឆ្នាំ២០០៦ មកនៅតិចជាង ៤៧ភាគរយ នៅឆ្នាំ២០១៤ និងប្រមាណជា ៤៥ភាគរយនៃតំបន់ដីសើមធម្មជាតិកាលពីដើមរបស់កម្ពុជា ត្រូវបានបាត់បង់៕