រយៈពេលមួយសប្តាហ៍ហើយ ដែលនគរបាលចាប់ផ្តើមពង្រឹងការអនុវត្តច្បាប់ចរាចរណ៍ផ្លូវគោកថ្មីយ៉ាងតឹងតែង ដោយបានឃាត់ម៉ូតូល្មើសច្បាប់ចរាចរណ៍បានមិនតិចជា ១ពាន់គ្រឿង បញ្ជូនទៅស្នាក់ការនគរបាលចរាចរណ៍ផ្លូវគោកតាមខណ្ឌនីមួយៗ និងស្នងការដ្ឋាននគរបាលរាជធានីភ្នំពេញ ដើម្បីរក្សាទុកឲ្យម្ចាស់ម៉ូតូដោះស្រាយតាមច្បាប់។
ការពង្រឹងការអនុវត្តច្បាប់ចរាចរណ៍នេះ ធ្វើឡើងក្រោយពីលោកនាយករដ្ឋមន្ត្រី ហ៊ុន សែន កាលពីថ្ងៃទី៣ ខែមករា ឆ្នាំ២០១៨ បានព្រមានដកអភិបាលខណ្ឌដូនពេញលោក សុខ ពេញវុធ ដោយថា បើមិនរៀបចំសណ្តាប់ធ្នាប់ឲ្យបានល្អនៅម្តុំវិមានឯករាជ្យ ក្បែរផ្ទះរបស់លោកទេនោះ។
ក្រោយពីលោក ហ៊ុន សែន បញ្ជាឲ្យមន្ត្រីរបស់ខ្លួនឲ្យរៀបចំសណ្តាប់ធ្នាប់នៅក្បែរវិមានឯករាជ្យរួចមក អនុគណៈកម្មការទី២ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក ដែលដឹកនាំដោយអគ្គស្នងការនគរបាលជាតិ លោក នេត សាវឿន បានប្រកាសថា នឹងរឹតបន្តឹងការអនុវត្តច្បាប់ចរាចរណ៍នៅឆ្នាំ២០១៨នេះ ដោយដាក់ចេញនូវវិធានការដូចជា បើអ្នកបើកបរម៉ូតូគ្មានមួកសុវត្ថិភាពទេ ត្រូវធ្វើការផាកពិន័យ និងឃាត់ម៉ូតូទុករយៈពេល ២ ទៅ ៣ថ្ងៃ ហើយតម្រូវឲ្យអ្នកជិះម៉ូតូទៅទិញមួក ឬយកមួកសុវត្ថិភាព មកបង្ហាញសមត្ថកិច្ចទើបអនុញ្ញាតឲ្យយកម៉ូតូត្រឡប់ទៅវិញ។
ឈរនៅមុខច្រកចូលនៃស្នាក់ការនគរបាលចរាចរណ៍ផ្លូវគោក ខណ្ឌដូនពេញ លោក ទូច រ័ត្ន បានរៀបរាប់ប្រាប់អ្នកសារព័ត៌មានវីអូឌីថា គាត់ត្រូវបាននគរបាលចរាចរណ៍ឃាត់ម៉ូតូកាលពីថ្ងៃទី៦ ខែមករា នៅក្បែរផ្ទះលោក ហ៊ុន សែន ដោយសារជិះបញ្ច្រាសទិស។ លោកបន្តថា ក្រោយពីនគរបាលឃាត់ភ្លាម សមត្ថកិច្ចបានបញ្ជូនម៉ូតូរបស់លោកទុកនៅស្នាក់ការនគរបាលចរាចរណ៍ផ្លូវគោក រយៈពេល៣ថ្ងៃ ដើម្បីឲ្យម្ចាស់ទៅធ្វើកិច្ចសន្យាយកម៉ូតូមកផ្ទះវិញ។ ករណីនេះ លោកថា ធ្វើឲ្យគាត់ខាតពេលវេលា និងខាតថវិកាជាដើម។
លោករៀបរាប់ថា៖ «គ្រាន់តែប៉ុណ្នឹងដោះស្រាយទុកពន្យាពេល ធ្វើឲ្យវាមានផលវិបាកដល់យើងជាម្ចាស់ម៉ូតូវិញ ព្រោះបើយើងធ្វើការ…អត់បាន ព្រោះអីយើងនៅដោះស្រាយឲ្យចប់សិន ព្រោះអីយើងខាតពេលវេលា ខ្ញុំត្រូវទៅប្រឡងទៀត ព្រោះអីខ្ញុំនៅរៀន»។
តាមអនុក្រឹត្យស្តីពី «ការពិន័យអន្តរការណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោក» ចុះកាលពីឆ្នាំ២០១៥ បានចែងថា ទាំងអ្នកបើកបរ ទាំងអ្នករួមដំណើររាប់ចាប់ពីកុមារអាយុ ៣ឆ្នាំឡើងទៅ រួមទាំងព្រះសង្ឃផង ដែលមិនពាក់មួកសុវត្ថិភាព ឬពាក់មួកមិនត្រឹមត្រូវ នឹងត្រូវផាកពិន័យចំនួន ១៥ ០០០រៀល ដែលខ្ពស់ជាងការពិន័យតាមច្បាប់ចាស់ ៥ដង។ ឯអ្នកបើកបររថយន្តធុនស្រាល និងអ្នករួមដំណើរអង្គុយនៅខាងមុខដែលមិនពាក់ខ្សែក្រវាត់សុវត្ថិភាព ឬជិះបញ្ច្រាសទិស នឹងត្រូវផាកពិន័យចំនួន ២៥ ០០០រៀល ដែលកាលពីច្បាប់ចាស់ ពិន័យ ៥ ០០០រៀល។
លោក សឹម យ៉ាន់ ដែលអះអាងថា បើកបរបញ្ច្រាសទិសនៅម្តុំវិមានឯករាជ្យកាលពីថ្ងៃទី០១ ខែមករានោះ បានបញ្ជាក់ថា នគរបាលបានឃាត់ម៉ូតូរបស់លោក និងអ្នកផ្សេងទៀតជិត ១០គ្រឿង ហើយដឹកតាមរថយន្តយកទៅទុកនៅស្នងការដ្ឋាននគរបាលរាជធានីភ្នំពេញចំនួន ៤ថ្ងៃ ទើបធ្វើការដោះស្រាយ។ ប៉ុន្តែ លោកថា នៅពេលធ្វើកិច្ចសន្យាយកម៉ូតូមកវិញ នគរបាលទាមទារអត្តសញ្ញាណប័ណ្ណ និងប័ណ្ណសម្គាល់ម្ចាស់កម្មសិទ្ធិ ដោយផាកពិន័យលុយពីពួកគេចំនួន ៤៥ ០០០រៀល ជាថ្នូរយកម៉ូតូត្រឡប់ទៅផ្ទះវិញ។
លោកនិយាយថា៖ «គេផាកពិន័យយើង២៥០០០រៀល ថ្លៃយាម២០០០០រៀល ថ្លៃយាមម៉ូតូទំាងអស់ ៤៥០០០រៀល មិនដឹងយល់យ៉ាងម៉េចទេ បើខ្ញុំអត់យកទៅផ្ញើផង ហើយគេគិតថ្លៃយាម ចាប់របស់ខ្ញុំទៅហើយ គេ[នគរបាល]គិតថ្លៃយាមទៀត បើទូទៅគេឲ្យចឹងទំាងអស់ នៅស្នងការ[នគរបាលរាជធានីភ្នំពេញ]ចឹងទំាងអស់»។
អ្នកបើកបរល្មើសច្បាប់ចរាចរណ៍ទំាងនោះ បានលើកឡើងប្រហាក់ប្រហែលគ្នាថា ពួកគេចង់ឲ្យនគរបាលឃាត់ម៉ូតូដែលល្មើសច្បាប់ដូចជា មិនគោរពភ្លើងសញ្ញា គ្មានមួកសុវត្ថិភាព គ្មានស្លាកលេខ និងគ្មានកញ្ចក់ជាដើម ត្រូវធ្វើការផាកពិន័យជាប្រាក់ស្របតាម ច្បាប់កំណត់នៅនឹងកន្លែងកើតហេតុ ជាជាងចាប់ម៉ូតូបញ្ជូនទៅ ស្នាក់ការនគរបាលចរាចរណ៍ផ្លូវគោក ឬស្នងការដ្ឋាននគរបាលរាជធានីភ្នំពេញ ដោយថា កុំឲ្យប្រជាពលរដ្ឋខាតពេលវេលា និងថវិកា នៅពេលទៅដោះស្រាយជាមួយនគរបាល។
បណ្តើរម៉ូតូចេញពីកន្លែងផាកពិន័យ នៅស្នាក់ការនគរបាលចរាចរណ៍ផ្លូវគោក ខណ្ឌទួលគោក លោក ឆៃ នរៈ ដែលអះអាងថា បើកម៉ូតូមិនមានមួកសុវត្ថិភាព បានបង្ហាញការពេញចិត្តនឹងនគរបាល ដែលបានឃាត់ម៉ូតូរបស់លោក និងផាកពិន័យ ១៥ ០០០រៀលស្របតាមច្បាប់។ ប៉ុន្តែ លោកស្នើទៅសមត្ថកិច្ចគួរតែធ្វើការដោះស្រាយនៅនឹងកន្លែងកើតហេតុវិញ ដោយថា ដើម្បីឲ្យពលរដ្ឋចំណេញពេលវេលា។
លោកលើកឡើងថា៖ «ឲ្យគេ[នគរបាល]ដោះស្រាយនៅកន្លែង[កើតហេតុ]ភ្លាមៗក៏ចំណេញពេលវេលាយើងដែរ អត់សូវខាតពេលវេលាហើយក៏វាល្អដែរសម្រាប់អ្នកដែលនៅតាមខេត្ត ពិបាកយកអត្តសញ្ញាណប័ណ្ណ… ខ្ញុំនៅភ្នំពេញ ខ្ញុំអត់អីទេ ព្រោះជិតៗហ្នឹង យើងស្រួលដោះស្រាយ តែសម្រាប់បងប្អូនដែលនៅតាមខេត្តពិបាកបន្តិច ព្រោះគាត់ជិះយក[អត្តសញ្ញាណប័ណ្ណ កាតគ្រីម៉ូតូ]មកឲ្យយូរ ហើយយកមកឲ្យហើយដល់ម៉ោងគេបិទកន្លែងធ្វើការ អត់បានដោះស្រាយទៀត ដ៏ស្អែកពេលព្រឹកបានដោះស្រាយបន្តទៀត»។
របាយការណ៍សាលារាជធានីភ្នំពេញ ឲ្យដឹងថា នៅភ្នំពេញ ចំនួនរថយន្ត និងម៉ូតូមានប្រមាណជាង ៣.២លានគ្រឿង បូករួមជាមួយតាក់ស៊ី និងត្រីចក្រយាន ធ្វើដំណើរលើដងផ្លូវជារៀងរាល់ថ្ងៃ ស្របពេលបញ្ហាគ្រោះថ្នាក់ចរាចរណ៍ និងការកកស្ទះ បានក្លាយជា បញ្ហាពិបាកដោះស្រាយ។
ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ លោក រុន រ័ត្នវាសនា បានប្រាប់វីអូឌីកាលពីថ្ងៃទី២ខែមករានេះថា មនុស្សដល់ទៅ ១ ៧៨០នាក់ បានស្លាប់ ហើយមនុស្ស ៥ ៥៣៩នាក់ បានរងរបួសនៅក្នុងគ្រោះថ្នាក់ចរាចរណ៍ កាលពីឆ្នាំ២០១៧កន្លងមកនេះ ដោយចំនួនអ្នកស្លាប់បានកើនឡើង ៦៣នាក់ បើទោះបីចំនួនអ្នករងរបួសថយចុះក៏ដោយ បើធៀបទៅនឹងតួលេខឆ្នាំ២០១៦។
ទាក់ទងចរាចរណ៍នេះ ក្រសួងសេដ្ឋកិច្ច និងហិរញ្ញវត្ថុ បានចេញសេចក្ដីជូនដំណឹងមួយ កាលពីខែមករា ឆ្នាំ២០១៦ ប្រកាសឲ្យប្រជាពលរដ្ឋដែលបានធ្វើប័ណ្ណបើកបរម៉ូតូប្រភេទក១ គឺម៉ូតូកម្លាំងម៉ាស៊ីន ១២៥ សេសេ (CC) ចុះក្រោម ឲ្យទៅបំពេញនីតិវិធីដើម្បីទទួលយកថវិកាវិញ។ ការចេញសេចក្ដីជូនដំណឹងនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានថ្លែងជាសាធារណៈថា លោកសម្រេចលុបចោលមិនចាំបាច់ឲ្យមានប័ណ្ណបើកបរទៀតទេ ដើម្បីជួយកាត់បន្ថយការចំណាយថវិកា និងការលំបាករបស់ប្រជាពលរដ្ឋ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជាលោក សន ជ័យ យល់ថា ដើមចមដែលនាំឲ្យប្រជាពលរដ្ឋជាងមួយពាន់នាក់បើកបរល្មើសច្បាប់ចរាចរណ៍នៅក្នុងរាជធានីភ្នំពេញនាដើមឆ្នាំ២០១៨នេះ ទំនងជាពួកគេមិនយល់ពីច្បាប់ចរាចរណ៍ឲ្យបានច្បាស់ ដោយសារអ្នកបើកបរម៉ូតូក្រោម ១២៥សេសេ រដ្ឋាភិបាលមិនបាច់ឲ្យមានប័ណ្ណបើកបរនោះទេ។
ករណីនេះ លោក សន ជ័យ ហាក់មិនមានជំនឿលើការទប់ស្កាត់បទល្មើសចរាចរណ៍នេះឲ្យមានប្រសិទ្ធិភាពនោះទេ ដោយសារអ្នកបើកបរទំាងនោះភាគច្រើនមិនបានចូលរៀនបើកបរ និងខ្វះចំណេះដឹងផ្នែកចរាចរណ៍នេះ។ លោកថា ស្ថាប័នពាក់ព័ន្ធត្រូវធ្វើសិក្ខាសាលាថ្នាក់ជាតិមួយ ដើម្បីពិភាក្សារកដំណោះស្រាយពីអ្នកដែលនៅតែល្មើសច្បាប់ចរាចរណ៍ ទើបទទួលបានផលវិជ្ជមាន។
លោកយល់ថា៖ «ដរាបណាមានការសិក្សាស្រាវជ្រាវមួយ យកសំណូមពរពីអ្នកបើកបរទំាងឡាយ យកទៅរៀបចំជាគោលនយោបាយ ជាវិធានការ ខ្ញុំគិតថាជាជំរើសដែលអាចឈានដល់ការរកដំណោះស្រាយបានដែរ ប៉ុន្តែបើសិនជារឿងហ្នឹងនៅតែ អនុវត្តអនុសាសន៍[លោកនាយករដ្ឋមន្ត្រី ហ៊ុន សែន]ច្រើនជាងការអនុវត្តច្បាប់ដែលមានស្រាប់ បញ្ហាហ្នឹងមិនអាចដោះស្រាយបានទេ អាចថាវាក្តៅតែក្នុងរយៈពេលវេលាមួយ ហើយវាអាចផុតរលត់នៅក្នុងពេលវេលាមួយណាផ្សេងទៀតដែរ»៕