អ្នកវិភាគមួយចំនួនបង្ហាញការយល់ឃើញថា សង្គ្រាមស៊ីវិលនៅកម្ពុជា នឹងមិនកើតឡើងទេ ប្រសិនបើការបោះឆ្នោតខាងមុខ ជាការបោះឆ្នោតដែលមានភាពត្រឹមត្រូវ យុត្តិធម៌ តាមយន្តការប្រជាធិបតេយ្យ បើទោះបីពេលនេះ អ្នកនយោបាយខ្លះ គំរាមពីការកើតសង្គ្រាមបើខ្លួចចាញ់ឆ្នោតក៏ដោយ។
នៅប៉ុន្មានថ្ងៃចុងក្រោយនេះ លោកនាយករដ្ឋមន្ត្រី ហ៊ុន សែន បានព្រមានម្តងហើយម្តងទៀតពីលទ្ធភាពនៃសង្គ្រាមដែលអាចកើតមាននៅកម្ពុជា ថាបើគណបក្សរបស់លោកគ្មានសំឡេងគ្រប់គ្រាប់ បានបន្តកាន់អំណាចបន្តទៀតនោះ។
ការថ្លែងរបស់លោកថ្លែងសារដដែលៗ ពីលទ្ធភាពអាចផ្ទុះសង្គ្រាមស៊ីវិលឡើងវិញ នៅកម្ពុជា របស់មេដឹកនាំកំពុងគ្រប់គ្រងអំណាចនេះ គឺមានតែរយៈពេលមិនដល់មួយខែទៀតទេ ការបោះឆ្នោតក្រុមប្រឹក្សាឃុំសង្កាត់នឹងត្រូវចាប់ផ្តើមឡើង។
កាលពីថ្ងៃទី១០ ម្សិលមិញលោក ហ៊ុន សែន បានព្រមានខ្លាំងៗដល់ដោយមិនចំឈ្មោះ តែទំនងសំដៅទៅលើគណបក្សសង្គ្រោះជាតិ និងថាប្រសិនជាបក្សនេះឈ្នះឆ្នោតនោះសង្គ្រាមនឹងអាចកើតមានឡើងនៅកម្ពុជា។
អ្នកវិភាគឯករាជ្យលោកបណ្ឌិត ឡៅ ម៉ុងហៃ យល់ឃើញថា ក្រោយការបោះឆ្នោតខាងមុខនេះ លោកថា នឹងគ្មានសង្គ្រាម ឬបាតុកម្មទ្រង់ទ្រាយធំណាមួយប្រឆាំងនឹងលទ្ធផលបោះឆ្នោតដែរ ដោយលោកវិភាគថា ប្រព័ន្ធរៀបចំការបោះឆ្នោតពេលនេះ អាចទុកចិត្តបាន ដែលលោកថា ខុសពីការរៀបចំការបោះឆ្នោតនាពេលកន្លងទៅ។
លោកថា៖ «ការបោះឆ្នោតលើកក្រោយនេះអាចលទ្ធផលនោះគឺអាចច្បាស់លាស់ជាងគឺអាចសំដែងនូវឆន្ទៈប្រជាពលរដ្ឋបានច្រើនជាង … ហើយនេះគឺការដែលអាចជៀសវាងនូវការតវ៉ាបែបផែនទ្រង់ទ្រាយធំដូចកាលពីឆ្នាំ២០១៣ ដូច្នេះខ្ញុំថាមានបាតុកម្មមានអីលើកលែងតែគណបក្សណាមួយមិនទទួលស្គាល់អាហ្នឹងគឺអាចមានបាតុកម្មមានអីអញ្ចឹងទៅ»។
សាស្ត្រាចារ្យវិទ្យាសាស្ត្រនយោបាយលោក ឯម សុវណ្ណារ៉ា បានលើកឡើងថា លទ្ធភាពនៃសង្គ្រាមក្នុងស្រុក គឺមិនអាចកើតមាននោះទេ ដោយលោកវិភាគថា កម្ពុជាពេលនេះ គ្មានក្រុមឧទ្ទាម ឬកងកម្លាំងប្រឆាំងប្រដាប់អាវុធណាមួយនោះទេ។
តែលោកបានប្រមើលថា ប្រសិនជាកើតមានសង្គ្រាមនៅពេលដែលបក្សប្រជាជនចាញ់ឆ្នោត ដូចអ្វីដែលលោក ហ៊ុន សែន ថ្លែងនោះ លោកថា គឺជាសង្គ្រាមដែលមានការអុជអាលឡើងដោយបរទេសទៅវិញទេ។
លោកថា៖ «ដោយសារតែកម្លាំងម្ខាងទៀតអត់មានកម្លាំងអីទេ ឬក៏តតាំងទេ កាលណាផ្ទុះទាល់តែមានចលនាផ្សេងគាំទ្រ ឬក៏មានតែរបត់នៅខាងក្រៅប្រទេស ដែលមានឧបត្ថម្ភខាងសេដ្ឋកិច្ចជំនួយហ្នឹងខ្លាំងហើយគាត់គាំទ្រម្ខាងៗ គាត់ជម្រុញអាវុធអីមកអាហ្នឹង ទើបជម្រុញទៅជាសង្គ្រាម។ ឥឡូវនេះ កងកម្លាំងមានតែម្ខាង អត់អាចធ្វើសង្គ្រាមជាមួយខាងណា! គឺអត់មានទេ […]»។
ដូចគ្នាដែរអ្នកស្រាវជ្រាវពីការអភិវឌ្ឍន៍សង្គម លោកបណ្ឌិត មាស នី លើកឡើងថា លទ្ធភាពនៃសង្គ្រាមដែលអាចកើតមាននៅកម្ពុជានេះ លោកវិភាគថា មិនអាចកើតមាននោះទេ ដោយលោកថាតាមសមត្ថភាពរបស់បក្សប្រឆាំង គឺមិនអាចនាំឲ្យកម្ពុជាធ្លាក់ក្នុងសង្គ្រាមនោះឡើយ។
តែលោកវិភាគថា អ្វីដែលលោក ហ៊ុន សែន ព្រមានពីសង្គ្រាមញឹកញាប់នោះ លោកថា អាចមកពី លោក ហ៊ុន សែន បារម្ភពីផ្ទៃក្នុងរបស់ខ្លួនទៅវិញទេ។
លោកថា៖ «ប្រហែលជាសម្តេចនាយករដ្ឋអាចដឹងតាមប្រព័ន្ធចារកម្មរបស់លោកថា នឹងមានកងទ័ពកងកម្លាំងប្រដាប់អាវុធមួយចំនួនប្រហែលជាមិននៅស្មោះត្រង់ជាមួយហ្នឹងគាត់ទៀតទេ អញ្ចឹងបានជាគាត់ប្រកាសពីសង្គ្រាមម្តងហើយម្តងទៀត។ ព្រោះអីសង្គ្រាមទាល់តែមានកម្លាំងប្រដាប់អាវុធពីរតទល់គ្នា ហើយបើសិនជាកងកម្លាំងប្រដាប់អាវុធហ្នឹងនៅស្មោះត្រង់នឹងគាត់រហូត អាហ្នឹងឥតមានសង្គ្រាមអីទៅរួចទេមានតែការដណ្តើមអំណាចតែម្តងបើសិនជាចាញ់ឆ្នោត។ តែមើលមកហាក់បីដូចជាគាត់មើលឃើញថាមានតម្រុយអីតវ៉ាបះបោរប្រឆាំងអីអញ្ចឹង។ តែសម្រាប់ខ្ញុំៗមើលទៅថាមិនមានអីហាក់កើតទៅជាសង្គ្រាមកើតទេ»។
លោក មាស នី បង្ហាញការខកចិត្តថា ក្នុងនាមជាប្រមុខរដ្ឋាភិបាល គួរតែ ជម្រុញដល់ លើកទឹកចិត្តពលរដ្ឋ ឲ្យទៅបោះឆ្នោតដោយគ្មានការភ័យខ្លាច ជាជាងផ្ញើសារគំរាមពីសង្គ្រាម បើពលរដ្ឋលែងគាំទ្រគណបក្សខ្លួននោះ ។
គួររំលឹកថា ព្រះមហាក្សត្រកម្ពុជា តាមរយៈសារលិខិតមួយច្បាប់របស់ព្រះអង្គចុះថ្ងៃទី២០កុម្ភះ ព្រះអង្គបានជម្រុញទៅកាន់ពលរដ្ឋគ្រប់រូបឲ្យទៅបោះឆ្នោតនាពេលខាងមុខ ដោយប្រើសិទ្ធិសេរីភាពរបស់ខ្លួន និងទៅតាមសតិសម្បជញ្ញៈ និងសុំកុំឲ្យមានការព្រួយបារម្ភពីការគាបសង្កត់ ការគម្រាមកំហែង ឬសម្លុតពីជនណាម្នាក់ ឬបក្សណាមួយឲ្យសោះ៕