រដ្ឋាភិបាលកម្ពុជារំពឹងថា ដោយសារអត្រាកំណើនសេដ្ឋកិច្ចរឹងមាំ កម្ពុជានឹងប្រែក្លាយជាប្រទេសមានចំណូលមធ្យមនៅឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០។
ក្នុងពិធីបើកវេទិកាស្ដីពីអាស៊ាន នៅថ្ងៃព្រហស្បតិ៍ទី១១ឧសភាឆ្នាំ២០១៧ នារាជធានីភ្នំពេញ ក្រោមប្រធានបទ «យុវជន បច្ចេកវិទ្យា និងកំណើន៖ ការធានាពីគុណប្រយោជន៍ផ្នែកប្រជាសាស្ត្រ និងឌីជីថលរបស់អាស៊ាន» លោកនាយករដ្ឋមន្ដ្រី ហ៊ុន សែន ថ្លែងថា កម្ពុជាសម្រេចបានអត្រាកំណើនសេដ្ឋកិច្ចប្រមាណ៧ភាគរយក្នុងមួយឆ្នាំពីឆ្នាំ១៩៩៤ ដល់ឆ្នាំ២០១៦ និងព្យាករថា កម្ពុជានឹងក្លាយជាប្រទេសមានចំណូលមធ្យមនៅឆ្នាំ២០៣០។
លោកនាយរដ្ឋមន្ដ្រី ហ៊ុន សែន មានប្រសាសន៍ថា ដោយសារកំណើនសេដ្ឋកិច្ច ដែលត្រូវបានព្យាករថា នឹងនៅបន្ដរឹងមាំទៅមុខនេះ លោកថា កម្ពុជានឹងប្រែក្លាយជាប្រទេសមានចំណូលខ្ពស់នៅឆ្នាំ២០៥០។
លោកមានប្រសាសន៍ថា៖ «ដោយផ្អែកលើអត្រាកំណើនសេដ្ឋកិច្ចរឹងមាំជាមធ្យមក្នុងរង្វង់៧,៦% ក្នុងមួយឆ្នាំ។ ក្នុងគោលដៅធានាសម្រេចឲ្យបាននូវទស្សនៈវិស័យរយៈពេលវែងឆ្ងាយរបស់ខ្លួន ពោលគឺការឈាន ឡើងទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលខ្ពស់ នៅឆ្នាំ២០៥០»។
លោកនាយករដ្ឋមន្ដ្រីថា ការរំពឹងដូចនេះគឺដោយសារកម្ពុជាជាប្រទេសមានសេដ្ឋកិច្ចតូច និងបើកចំហ មានការគ្រប់គ្រងបំណុលសាធារណៈល្អប្រសើរ និងកាត់បន្ថយភាពក្រីក្រឆាប់រហ័ស។ លោកថា នេះហើយជាមូលហេតុសំខាន់ ដែលនាំឲ្យកម្ពុជាអាចចូលរួមក្នុងធ្វើសមាហរណកម្ម និងការតភ្ជាប់ក្នុតំបន់។
ការលើកឡើងរបស់លោកនាយករដ្ឋមន្ដ្រី ធ្វើឡើងក្នុងវេទិកាពិភពលោកស្ដីពីអាស៊ានក្នុងនាមកម្ពុជាជាម្ចាស់ផ្ទះ ដែលចាប់ផ្ដើមពីថ្ងៃទី១០ឧសភា នឹងត្រូវបញ្ចប់ទៅថ្ងៃទី១២ឧសភា ឆ្នាំ២០១៧៕