ស្ថានទូតអាមេរិកប្រចាំនៅកម្ពុជារំពឹងថា អាជ្ញាធរនឹងតាមចាប់ខ្លួនជនល្មើសពិតប្រាកដមកដាក់ទោស ក្នុងករណីឃាតកម្មអ្នកវិភាគបញ្ហានយោបាយដ៏ល្បីឈ្មោះ លោក កែម ឡី។
យោងតាមការចុះផ្សាយលើបណ្ដាញហ្វេសប៊ុករបស់ខ្លួន កាលពីថ្ងៃចន្ទម្សិលមិញ ស្ថានទូតអាមេរិកប្រចាំនៅកម្ពុជា បានផ្ញើសារចូលរួមរំលែកទុក្ខជាមួយប្រជាជនកម្ពុជានិងក្រុមគ្រួសារ ដែលបានប្រារព្ធខួប១ឆ្នាំ នៃបុណ្យសពអ្នកវិភាគនយោបាយលោកបណ្ឌិត កែម ឡី។
ស្ថានទូតអាមេរិកប្រចាំកម្ពុជាទទូចឲ្យអាជ្ញាធរតាមចាប់ខ្លួនអ្នកប្រព្រឹត្តល្មើសមកផ្ដន្ទាទោស ខណៈដែលក្រុមគ្រួសារថា មិនទាន់មានពន្លឺយុត្តិធម៌នៅឡើយ។
បើតាមហ្វេសប៊ុកស្ថានទូតអាមេរិកនៅកម្ពុជាបញ្ជាក់ថា៖ «យើងសូមសំដែងសមានទុក្ខសារជាថ្មីចំពោះគ្រួសាររបស់លោក កែម ឡី ដែលកំពុងរង់ចាំ ហើយសង្ឃឹមថា អ្នកប្រព្រឹត្តនឹងត្រូវបានចាប់អោយទទួលខុសត្រូវពេញលេញ ចំពោះអំពើលីលា និងដ៏កំសាកនេះ»។
ករណីនេះ ប្រធានគណបក្សសង្គ្រោះជាតិលោក កឹម សុខា ក៏បានទទូចឲ្យអាជ្ញាធរជួយរកយុត្តិធម៌សម្រាប់ក្រុមគ្រួសារលោក កែម ឡី ផងដែរ ដោយថា ការស៊ើបអង្កេតរបស់តុលាការ កាលពីពេលកន្លងទៅ នៅពុំទាន់មានយុត្តិធម៌ពេញលេញ និងមិនអាចទទួលយកបាន។ លោកថ្លែងដូចនេះ ពេលដឹកនាំគណៈប្រតិភូទៅគោរពវិញ្ញាណក្ខន្ធលោក កែម ឡី ឯស្រុកកំណើត ក្នុងខេត្តតាកែវ កាលពីថ្ងៃទី៩កក្កដា។
លោកថ្លែងថា៖ «យើងនៅតែទទូចទាមទារនូវយុត្តិធម៌ឲ្យរូបគាត់ឲ្យបាន ពីព្រោះខ្ញុំគិតថាវីរភាព
របស់លោកបណ្ឌិត កែម ឡី មិនអាចនរណាយកទៅជីកកប់វីរភាពគាត់បានទេ ហើយយកទៅលាក់បាំងបានទេ ហើយយុត្តិធម៌នឹង ទោះបីមិនរកឃើញពេលនេះក៏ប្រជាពលរដ្ឋខ្មែរនៅតែទាម ទាររកឱ្យឃើញដែរ»។
បន្ថែមលើសពីនេះ ក្នុងលិខិតចំហមួយ ចុះថ្ងៃទី៧ ខែកក្កដា បណ្ដុំអង្គការជាតិនិងអន្តរជាតិចំនួន១៦៤ស្ថាប័ន បានស្នើទៅរដ្ឋមន្ត្រីមហាផ្ទៃ លោក ស ខេង ឲ្យបង្កើតក្រុមស៊ើបអង្កេតឯករាជ្យមួយ ជុំវិញករណីឃាតកម្មនេះ។
ក្រុមអង្គការទាំងនោះក៏បានបង្ហាញក្ដីបារម្ភ ជុំវិញការវិវឌ្ឍតិចតួច នៅក្នុងការស៊ើបអង្កេតករណីឃាតកម្មនេះ ដោយថា ការស៊ើបអង្កេត និងសវនាការជំនុំជម្រះ មិនទាន់គ្រប់គ្រាន់ ដោយសារថា មានតែជនជាប់ចោទឈ្មោះ អឿត អាង ម្នាក់ប៉ុណ្ណោះ ត្រូវបានតុលាការផ្ដន្ទាទោសជាប់ពន្ធនាគារមួយជីវិត។
អ្នកនាំពាក្យក្រសួងមហាផ្ទៃលោក ខៀវ សុភ័គ បានឲ្យដឹងថា លោកមិនជំទាស់នឹងការស្នើសុំបង្កើតឲ្យមានគណៈកម្មការស៊ើបអង្កេតឯករាជ្យ ដើម្បីបើកការស៊ើបអង្កេតបន្ថែមទៀតលើករណីឃាតកម្មលោក កែម ឡី ទេ។ ប៉ុន្តែលោកថា កម្ពុជាមានសមត្ថភាពគ្រប់គ្រាន់ ដើម្បីធ្វើកិច្ចការនេះ និងថា បើមានអន្តរជាតិចូលរួមស៊ើបអង្កេត នោះកម្ពុជានឹងស្ថិតក្រោមអាណានិគមបរទេស។
លោកថា៖ «យើងមានស្ថាប័នរបស់យើងគ្រប់គ្រាន់ហើយ មានច្បាប់គ្រប់គ្រាន់ ទំាងច្បាប់នីតិវិធី ព្រហ្មទណ្ឌ ក្រមព្រហ្មទណ្ឌ មានតុលាការ មាននគរបាលគ្រប់គ្រាន់ ជាប្រទេសមួយធិបតេយ្យ ហើយទំរាន់បានជាប្រទេសធិបតេយ្យ តើយើងឆ្លងកាត់អ្វីខ្លះយើងដឹងហើយ ឆ្លងកាត់កិច្ចប្រជុំទីក្រុងប៉ារីសរហូតដល់មានរដ្ឋធម្មនុញ្ញ ដូច្នេះខ្ញុំយល់ថាបើការងារប៉ុណ្នឹង មានការស៊ើបអង្កេតអន្តរជាតិចូល វានាំឲ្យធិបតេយ្យភាពរបស់យើងធ្លាក់ចូលទៅក្នុងអាណានិគមនិយមបរទេសទៀត»។
ចំណែកអ្នកនាំពាក្យសាលាដំបូងរាជធានីភ្នំពេញលោក លី សុផាន់ណា ថា លោកមិនអាចបញ្ជាក់លម្អិតពីដំណើរការនីតិវិធីករណីឃាតកម្មនេះបានទេ ព្រោះជាការសម្ងាត់របស់តុលាការ។
ប៉ុន្ដែប្រធានគណបក្សសង្គ្រោះជាតិលោក កឹម សុខា មានប្រសាសន៍ថា ការស្នើឲ្យបង្កើតគណៈកម្មការស៊ើបអង្កេតឯករាជ្យណាមួយក្នុងករណីឃាតកម្មនេះ គឺជារឿងសមស្រប ដោយថា បញ្ហាសិទ្ធិមនុស្ស ជាបញ្ហាអន្ដរជាតិ មិនមែនជាការលូកដៃជ្រៀតជ្រែកកិច្ចការផ្ទៃក្នុងឡើយ។
កាលពីថ្ងៃចន្ទម្សិលមិញ ក្រុមអង្គការសង្គមស៊ីវិល គណបក្សនយោបាយ និងប្រជាពលរដ្ឋ ដែលអាណិតស្រឡាញ់លោកបណ្ឌិត កែម ឡី បានប្រារព្ធខួប១ឆ្នាំ នៃការស្លាប់របស់លោក បន្ទាប់ពីមានករណីបាញ់សម្លាប់កណ្ដាលថ្ងៃត្រង់ នៅស្ដារម៉ាតមួយកន្លែង ក្បែរស្ដុបបូកគោ រាជធានីភ្នំពេញ កាលពីថ្ងៃទី១០ កក្កដា ឆ្នាំ២០១៦ ដោយគិតមកទល់ពេលនេះ មានរយៈពេល១ឆ្នាំហើយ៕