មានការភ្ញាក់ផ្អើលគួរសមបន្ទាប់ពីកីឡាករជើងខ្លាំង ចេង គា ដែលត្រូវគេដឹងថាជាកីឡាករទើបឡើងកូដខ្លាំងនៅក្នុងពិភពប្រដាល់ផង បែរជាធ្លាក់ការប្រកួតក្នុងជុំដំបូង នៅក្នុងព្រឹត្តិការណ៍ប្រកួតជើងឯករបស់ប៉ុស្ដិ៍លេខ៥កាលពីថ្ងៃទី៩ ខែកញ្ញាមុននេះ ក្នុងពេលដែលគេប្រកាសថានឹងមិនភ័យសម្រាប់ការប្រកួតជម្រុះនោះនៅពេ
លការប្រកួតមិនទាន់ចាប់ផ្ដើម។ ក្រោយការប្រកួត៣ទឹក គេបានត្រឹមតែខកចិត្តប៉ុណ្ណោះ ដោយសារតែកីឡាករម្ខាងទៀតគឺ ទេស ជីវ៉ា ឈ្នះពិន្ទុទាំងប្រផិតប្រផើយ។
កីឡាករ ចេង គា ដែលឈរក្នុងបង្គោលខៀវបានអះអាងថា លោកប្រឹងហ្វឹកហាត់រហូតដល់ជាង១ខែ ដោយគ្រាន់តែបានទទួលការចុះបញ្ជីអោយប្រកួតនៅប៉ុស្ដិ៍លេខ៥ពីក្រុមគណៈកម្មការ គឺលោកអត់ទទួលការប្រកួតណាៗទាំងអស់ ដើម្បីសន្សំកម្លាំងឆ្លងវគ្គជម្រុះដែលតម្រូវអោយលោកឡើងប្រកួតក្នុងសប្ដាហ៍ទី២ បន្ទាប់ពីព្រឹត្តិការណ៍នេះបើកឆាកប្រកួតប្រជែងនៅសង្វៀនប៉ុស្ដិ៍លេខ៥ព្រែកកំពិស។ លោកថាការប្រកួតមួយនេះ
គឺខាងគណៈកម្មការជ្រើសរើសកីឡាករក្នុងប្រភេទទម្ងន់៦៥គីឡូក្រាមមកពីក្លិបផ្សេងគ្នា ដោយមានទាំងលោកម្នាក់ផង ហើយកំណត់អោយធ្វើការប្រកួតគ្នាចាញ់ធ្លាក់ៗដោយគ្មានការសន្សំពិន្ទុ។
នេះជាលើកទី១ដែលលោកចូលប្រកួតនៅក្នុងព្រឹត្តិការណ៍បែបនេះ ក្នុងពេលដែលលោកធ្លាប់តែឡើងប្រកួតដណ្ដើមជើងឯកតាមរូបមន្តចាប់ពូល ហើយប្រកួតសន្សំពិន្ទុដើម្បីស្វែងរកអ្នកមានពិន្ទុខ្ពស់ក្នុងពូលទៅប្រកួតវគ្គពាក់កណ្ដាលផ្ដាច់ព្រ័ត្រ។
អ៊ីចឹងហើយទើបលោកប្រឹងប្រែងហ្វឹកហាត់យ៉ាងលំបាកបន្ទាប់ពីបានដឹងថាលោកត្រូវគណៈកម្មការប៉ុស្ដិ៍លេខ៥
និងមន្ត្រីសហព័ន្ធជ្រើសអោយចូលប្រកួតក្នុងចំណោម៣២រូបដើម្បីប្រកួតប្រជែងយកពានជើងឯក។ លោកថាការប្រកួតមួយនេះ គឺតម្រូវអោយកីឡាករដែលមានឈ្មោះទាំងអស់ប្រកួតគ្នាចាញ់ធ្លាក់ៗ ដោយលោកត្រូវប្រកួតជាមួយកីឡាករ ទេស ជីវ៉ា ក្នុងសប្ដាហ៍ទី២ ខណៈដែលលោកបានសារភាពថាសម្រាប់ជំនួបជាមួយកីឡាករទេស ជីវ៉ា គឺមិនមែនជាឧបសគ្គធំដែលលោកត្រូវបារម្ភនោះទេ ដោយសារតែលោកធ្លាប់វាយស៊ីកីឡាករដែលមានសមត្ថភាពល្អជាងកីឡាកររូបនេះច្រើននាក់ទៅហើយ។
លោកចាត់ទុកការប្រកួតចាញ់កីឡាករបង្គោលក្រហម ទេស ជីវ៉ា គឺជាបទពិសោធន៍អាក្រក់មួយ ក្នុងពេលដែលលោកហ្វឹកហាត់ត្រៀមខ្លួនក៏ច្រើន ហើយសមត្ថភាពរបស់ ទេស ជីវ៉ា ក៏លោកគិតថាមិនគួរនឹងខ្លាច ប៉ុន្តែចុងក្រោយលោកបែរជាធ្លាក់ហាលអាវ។
កីឡាករ ចេង គា បានរៀបរាប់ក្រោយពេលប្រកួតធ្លាក់និងបាត់ឱកាសទៅប្រកួតបន្តថា លោកខឹងខ្លួនឯងយ៉ាងខ្លាំង ដែលធ្លាក់ហាលអាវបន្ទាប់ពីការប្រឹងប្រែងត្រូវបានធ្វើហើយ ហើយក៏បានត្រៀមខ្លួនគ្រប់គ្រាន់នៅមុនការប្រកួត។ យ៉ាងណាមិញ លោកក៏បានកោតសរសើរថាគូប្រកួតរបស់ខ្លួនមានសមត្ថភាពល្អជាងមុន និងល្អលើសអ្វីដែលលោកប៉ាន់ស្មានក្នុងពេលប៉ះជាមួយ ទើបលោកមិនអស់ចិត្តក្នុងពេលដែលកីឡាករ ទេស ជីវ៉ា គឺលោកគិតថាមិនពិបាកក្នុងទប់ទល់រហូតធ្វើអោយលោកត្រូវធ្លាក់ហាលអាវនោះទេ ប៉ុន្តែចុងក្រោយលោកបែរជាអ្នកធ្លាក់នៅក្នុងជុំជម្រុះដំបូង។
លោកនិយាយថា «ខ្ញុំមិនគិតថាការប្រកួតហ្នឹង ខ្ញុំចាញ់គាត់(ទេស ជីវ៉ា)ចឹងទេ នេះជាបទពិសោធន៍មួយដែលខ្ញុំគិតថា មិនអាចមើលស្រាលគូប្រកួតណាមួយបានទេ បើទោះជាធ្លាប់ឈ្នះគាត់ភាគច្រើនសុទ្ធតែចាញ់ក្រោមដៃខ្ញុំ!»។
លោកសម្ដែងការសោកស្ដាយដែលការប្រកួតជម្រុះសម្រាប់ការដណ្ដើមជើងឯកមួយនេះ លោកទៅមិនរួចក្នុងជុំដំបូង ក្នុងពេលដែលលោកស្រម៉ៃថារហូតដល់ជុំជម្រុះ៨នាក់ យក៤នាក់ ទើបលោកពិបាកសង្ឃឹម។ ក្នុងចំណោមសមាសភាព៣២រូបដែលត្រូវប្រកួតគ្នា លោកសារភាពថា ទេស ជីវ៉ា ជាបេក្ខភាពដែលលោកយល់ថាមានសំណាងដោយសារតែការចាប់គូប៉ះគ្នាដែលពិតជាធ្វើអោយលោកបានឆ្លងវគ្គ៣២យក១៦នាក់ដោយមិនលំបាក ប៉ុន្តែចុងក្រោយកីឡាករដែលលោកគិតថាមិនមែនជាឧបសគ្គបានធ្វើរំលាយក្ដីស្រមៃរបស់លោកអោយជ្រុះបាត់។
យ៉ាងណាមិញ លោកបានទទួលស្គាល់ថាលទ្ធផលចាញ់ពិន្ទុបង្គោលក្រហម ទេស ជីវ៉ា សំខាន់មិនមែនកើតឡើងដោយសារតែគណៈកម្មការផ្ដល់ពិន្ទុមិនសុគ្រិត ឬអាជ្ញាកណ្ដាលលម្អៀងនោះទេ ប៉ុន្តែកើតឡើងពីថ្វីដៃរបស់គូប្រកួត ដែលលោកក៏មិនស្មានដល់ថាការប៉ះជាមួយគ្នានៅលើសង្វៀននោះ គឺមិនអាចអោយលោកវាយមិនបែកបែបហ្នឹងសោះ។
លោកប្រកាសពង្រឹងសមត្ថភាពបន្ថែមទៀត បន្ទាប់ពីមានឈ្មោះបោះសំឡេងនៅលើសង្វៀនរាប់មិនអស់មកហើយ ប៉ុន្តែបែរជាឆ្លងមិនផុតវគ្គដំបូង៣២នាក់យក១៦នាក់ នៅប៉ុស្ដិ៍លេខ៥។
លោក សេង កដិកា អ្នករៀបចំការប្រកួតបានអះអាងថាការប្រកួតដណ្ដើមជើងឯកមួយនេះ លោកបានជ្រើសរើសកីឡាករក្នុងប្រភេទ៦៥គីឡូក្រាមចំនួន៣២រូបមកពីក្លឹបផ្សេងគ្នានៅទូទាំងប្រទេស ដោយក្នុងចំណោមនោះគឺមានសុទ្ធសឹងតែជាកីឡាករដែលមានឈ្មោះបោះសំឡេងតែម្ដង ដូចជាកីឡាករ ធា នុរាជ កីឡាករ ម៉ន ចាន់ដារ៉ា កីឡាករ ផាន់ គ្រាន់ កីឡាករ រឿម វណ្ណៈ កីឡាករ មាស ច័ន្ទមាន និងកីឡាករ ចេង គា ជាដើម ប៉ុន្តែពេលនេះជើងខ្លាំង ចេង គា បានធ្លាក់មួយហើយ បន្ទាប់ពីចាញ់ការប្រកួតក្នុងជុំដំបូងកាលពីថ្ងៃសៅរ៍ទី៩ កញ្ញា
ខណៈដែលកីឡាករជាច្រើនរូបទៀតនឹងឡើងប្រកួតជម្រុះគ្នាបែបនេះបន្តទៀតនៅរាល់ល្ងាចថ្ងៃសៅរ៍ រហូតទាល់តែរកឃើញអ្នកមិនដែលចាញ់សោះអោយធ្វើម្ចាស់ពានជើងឯក៕