លោកនាយករដ្ឋមន្ត្រី ហ៊ុន សែន បានធ្វើដំណើរទៅដល់ប្រទេសចិនហើយនៅព្រឹកថ្ងៃនេះ តែមួយសប្ដាហ៍ប៉ុណ្ណោះក្រោយពីប្រទេសចិនបានថ្លែងការពារចំណាត់ការរបស់រដ្ឋាភិបាលទៅលើមេដឹកនាំបក្សប្រឆាំង លោក កឹម សុខា។
លោក កឹម សុខា ត្រូវបានសមត្ថកិច្ចចាប់ខ្លួនកាលពីយប់ឈានចូលថ្ងៃទី០៣ ខែកញ្ញា ដោយត្រូវរដ្ឋាភិបាលចោទថា «ក្បត់ជាតិ» ជុំវិញការថ្លែងរបស់លោកកាលពីឆ្នាំ២០១៣។
ការចាប់ខ្លួនមេដឹកនាំបក្សប្រឆាំងរូបនេះ បានជំរុញឲ្យមានការថ្កោលទោសពីសហគមន៍អន្តរជាតិ ប៉ុន្តែ ប្រទេសចិនបានថ្លែងការពារចំណាត់ការរបស់រដ្ឋាភិបាលកម្ពុជាថា ជាការការពារសន្តិសុខ និងស្ថេរភាពជាតិ។
ទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន បានរៀបរាប់ថា លោកបានធ្វើដំណើរទៅដល់ទីក្រុងណាននីង ខេត្តក្វាងស៊ី ហើយ នៅវេលាម៉ោង ១១និង៤៧នាទីថ្ងៃនេះ។
លោក ហ៊ុន សែន បញ្ជាក់លើទំព័រហ្វេសប៊ុកលោកថា លោកអញ្ចើញទៅចូលពិព័ណ៌ពាណិជ្ជកម្អាស៊ាន-ចិនលើកទី៤ នៅទីក្រុងណាននីង ប្រទេសចិន តបទៅតាមការអញ្ចើញពីមេដឹកនាំចិន៕