ក្រសួងកសិកម្មបានបន្ថែមក្រុមអ្នកនាំពាក្យនិងឆ្លើយឆ្លងព័ត៌មានដោយដាក់មនុស្សជិត៥០នាក់ ខណៈក្រសួងបរិស្ថានបានបន្ថែមដល់៩នាក់ក្នុងការឆ្លើយតបជាមួយអ្នកសារព័ត៌មាន។
ក្នុងសេចក្តីសម្រេចចុះថ្ងៃទី២ មករា ឆ្នាំ២០១៧ ក្រសួងកសិកម្មបានឲ្យដឹងថាខ្លួនបានសម្រេចកែសម្រួលនិងបំពេញបន្ថែមក្រុមអ្នកនាំពាក្យនិងឆ្លើយឆ្លងព័ត៌មានរបស់ក្រសួងចំនួន៤៦នាក់ ក្នុងការងារឆ្លើយឆ្លងជាមួយអ្នកសារព័ត៌មាន ស្រាវជ្រាវ ចងក្រង និងរក្សាទុកព័ត៌មានការងាររបស់ក្រសួងកសិកម្ម។
ក្រុមអ្នកនាំពាក្យនិងឆ្លើយឆ្លងទាំងនោះ រាប់ចាប់ពីអគ្គលេខាធិការរហូតដល់នាយកសាកលវិទ្យាល័យកសិកម្ម ប្រធាននាយកដ្ឋានជំនាញនីមួយៗ រហូតដល់ប្រធានមន្ទីរកសិកម្មតាមខេត្តទាំងអស់។
អនុប្រធានក្រុមអ្នកនាំពាក្យក្រសួងកសិកម្ម លោក ចាន់ ហេង បានឲ្យដឹងថា មូលហេតុដែលក្រសួងសម្រេចឲ្យមានអ្នកនាំពាក្យនិងអ្នកឆ្លើយឆ្លងព័ត៌មានរហូតដល់ទៅជិត៥០នាក់នេះ ក៏ព្រោះតែក្រសួងចង់សម្រួលដល់អ្នកសារព័ត៌មានក្នុងការផ្តល់ព័ត៌មានដែលចំជំនាញនិងចំខេត្តដែលអ្នកសារព័ត៌មានចង់ដឹងពីបញ្ហា។ លោកបន្ថែមថា កន្លងទៅការដែលមានតែអ្នកនាំពាក្យនៅត្រឹមថ្នាក់ក្រសួង បានធ្វើឲ្យការឆ្លើយឆ្លងព័ត៌មានជាមួយអ្នកកាសែតមានការលំបាក ដោយហេតុថាមិនសូវច្បាស់ដូចជាអ្នកធ្វើការនៅថ្នាក់ខេត្តដោយផ្ទាល់។
លោកថា៖ «ដោយសារតែក្រសួងកសិកម្មធំ ហើយព័ត៌មានវាមានពាក់ព័ន្ធផ្សេងៗគ្នាច្រើន ឧទាហរណ៍ព័ត៌មានវាមានពាក់ព័ន្ធក្នុងខេត្តណាអញ្ចឹងទៅយើងអាចមានមន្ទីរកសិកម្មណាមួយយើងអាចបំភ្លឺជូន ហើយវាពាក់ព័ន្ធជំនាញណា! ពាក់ព័ន្ធនឹងរឿងព្រៃឈើ ខាងជលផលអីគឺឲ្យព្រៃឈើ និងជលផលបំភ្លឺជូន មានជំនាញច្រើន។ … ពីមុនដោយសារមានតែនៅខាងថ្នាក់កណ្តាល វាមិនដល់តាមខេត្តក្រោម អញ្ចឹងទេនៅពេលមានព័ត៌មាននៅតាមខេត្តតាមអីយើងក៏មិនច្បាស់ដូចគេនៅតាមមូលដ្នានចឹងបានចាត់បញ្ចូលប្រធានមន្ទីរតាមរាជធានីខេត្តទាំង២៥ជាសមាជិកអ្នកនាំពាក្យរបស់ក្រសួងផងដែរ»។
នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មានលោក មឿន ឈានណារិទ្ធិ បានគាំទ្រទៅនឹងការបង្កើតឲ្យមានអ្នកនាំពាក្យនេះ តែលោកបារម្ភថាចំនួនអ្នកនាំពាក្យនិងឆ្លើយឆ្លងព័ត៌មានច្រើនមិនប្រាកដថាមានប្រសិទ្ធភាពនោះទេ។
លោកថា៖ «យើងក៏ចង់ឲ្យមានការពន្លើនច្បាប់ទទួលបានព័ត៌មានផងដែរ! ពីព្រោះអីបើសិនជាយើងរៀបចំឲ្យមានតែអ្នកនាំពាក្យ តែបើសិនជាអ្នកនាំពាក្យខ្វះជំនាញវិជ្ជាជីវៈនៅក្នុងការផ្តល់ព័ត៌មានគាត់មិនយល់ច្បាស់ពីព្រំដែននៃសិទ្ធិរបស់គាត់ថាតើគាត់អាចរាយការណ៍ព័ត៌មានប្រភេទណាខ្លះនោះពេលនោះការបង្កើតអ្នកនាំពាក្យនោះក៏មិនសូវមានប្រសិទ្ធភាពដែរ»។
លោក មឿន ឈានណារិទ្ធិ បន្តថាកន្លងមកមានអ្នកសារព័ត៌មានមួយចំនួនថាខ្លួនមានការលំបាកក្នុងការទំនាក់ទំនងទៅកាន់ក្រសួងមួយចំនួនដោយសារក្រសួងមួយចំនួនមិនមានអ្នកនាំពាក្យ ហើយអ្នកនាំពាក្យខ្លះឆ្លើយតបទៅកាន់អ្នកសារព័ត៌មានមានការបិទបាំងច្រើន៕
