សាលាឧទ្ធរណ៍នៅថ្ងៃសុក្រនេះ បានសម្រេចទម្លាក់ចោលការចោទប្រកាន់លើថ្នាក់ដឹកនាំរបស់អង្គការសមធម៌ចំនួន៣នាក់ ពីបទបរិហារកេរ្តិ៍ ដែលប្ដឹងដោយអតីតបុគ្គលិកម្នាក់នៃអង្គកានោះ។
កាលពីថ្ងៃទី២២ ខែសីហា ឆ្នាំ២០១៦ សាលាដំបូងរាជធានីភ្នំពេញ បានផ្ដន្ទាទោសជានាយកប្រតិបត្តិនៃអង្គការសមធម៌ លោក អៀង វុទ្ធី ប្រធានកម្មវិធីឃ្លាំមើលការអភិវឌ្ឍ លោក ផែន គឹមសុង និងប្រធានការិយាល័យរដ្ឋបាល និងធនធានមនុស្ស លោក ឈាង ភា និងបង្គាប់ឲ្យអ្នកទាំង៣ម្នាក់ៗបង់ប្រាក់ចូលរដ្ឋ៨លានរៀលនិងបង់ទៅដើមបណ្តឹង១០លានរៀល ពាក់ព័ន្ធនឹងបទបរិហារកេរ្តិ៍ជាសាធារណៈប្ដឹងដោយអតីតបុគ្គលិកម្នាក់នៃអង្គការនោះ ឈ្មោះ ចាន់ វិចិត្រ។
លោក ចាន់ វិចិត្រ បានប្តឹងអ្នកទាំងបីពាក់ព័ន្ធ ការគៀបសង្កត់លើបុគ្គលិក បញ្ឈប់បុគ្គលិករបស់ខ្លួនទាំងតក់ក្រហល់ចេញលិខិតព្រមានភ្លាមក៏បញ្ឈប់ភ្លាម និងមិនបានផ្តល់ប្រាក់អតីតភាព តាមគោលការណ៍របស់អង្គការ។
ដោយមិនសុខចិត្ត ចំពោះការសម្រេចរបស់ចៅក្រមសាលាដំបូងរាជធានីភ្នំពេញ ពួកគេបានប្ដឹងជំទាស់មកសាលាឧទ្ធរណ៍។
នៅថ្ងៃសុក្រនេះ ប្រធានក្រុមប្រឹក្សានៃសាលាឧទ្ធរណ៍បានសម្រេចទម្លាប់ចោលការចោទប្រកាន់លើថ្នាក់ដឹកនាំរបស់អង្គការសមធម៌បុគ្គលិកពីរនាក់ទៀត ដោយយល់ឃើញថា ពួកគេមិនបានប្រព្រឹត្តបទល្មើសដូចការចោទប្រកាន់របស់ចៅក្រមសាលដំបូង រាជធានីភ្នំពេញនោះទេ។
ប្រធានក្រុមប្រឹក្សាជំនុំជម្រះនៃសាលាឧទ្ធរណ៍៖ «ក្រុមប្រឹក្សាជំំនុំជម្រះបដិសេធចំពោះសាលក្រមសាលាដំបូរាជធានី ភ្នំពេញកាលពីថ្ងៃទី២២ ខែសីហា ឆ្នាំ២០១៦ ហើយសម្រេចទម្លាប់ចោលការចោទប្រកាន់លើលោក អៀង វុទ្ធី នាយកប្រតិបត្តិនៃអង្គការសមធម៌ លោក ផែន គឹមសុង ប្រធានកម្មវិធីឃ្លាំមើលការអភិវឌ្ឍ និង លោក ឈាង ភា ប្រធានការិយាល័យរដ្ឋបាល និងធនធានមនុស្ស ដោយក្រុមប្រឹក្សាយល់ថា ពុំមានភ័ស្ដុតាងអ្វីបញ្ជាក់ពីបទបរិហារកេរ្តិ៍ទេ»។
នាយកប្រតិបត្តិនៃអង្គការសមធម៌ លោក អៀង វុទ្ធី ប្រាប់អ្នកសារព័ត៌មាន បន្ទាប់ពីស្ដាប់ចៅក្រមសាលាឧទ្ធរណ៍ប្រកាសសាល ដីកា ថា លោកនិងបុគ្គលិកពីរនាក់ទៀត មិនបានបរិហារកេរ្តិ៍លោក ចាន់ វិចិត្រ នោះទេ។ លោកចាត់ទុកការសម្រេចសាលា ឧទ្ធរណ៍ ថាបានផ្ដល់យុតិ្តធម៌ឲ្យរូបលោក និង បុគ្គលិកពីរនាក់ទៀតផងដែរ។
អង្គការសមធម៌កម្ពុជាបានបង្កើតឡើងនៅក្នុងឆ្នាំ២០១២ ដើម្បីលើកកម្ពស់ និងការពារសិទ្ធិរបស់ប្រជាពលរដ្ឋកម្ពុជាពីការរំលោភបំពានដីធ្លី។ អង្គការនេះ មានសកម្មភាពក្នុងការផ្តល់ជំនួយផ្នែកច្បាប់ដល់ប្រជាពលរដ្ឋដែលរងគ្រោះ ដោយសារ បញ្ហាដីធ្លី ជាពិសេសពលរដ្ឋរាប់រយគ្រួសារដែលមានទំនាស់ដីធ្លីជាមួយក្រុមហ៊ុនស្ករអំពៅរបស់ឧកញ៉ា លី យ៉ុងផាត់ ដែលទទួលបានដីសម្បទានជាង២ម៉ឺនហិកតា ដើម្បីដាំអំពៅក្នុងខេត្តកំពង់ស្ពឺ៕
កាលពីថ្ងៃទី២៨ខែកញ្ញា ឆ្នាំ២០១៧ ក្រសួងមហាផ្ទៃបានសម្រេចព្យួរឬ ឲ្យអង្គការនេះផ្អាកបណ្តោះអាសន្ន ដោយចោទថា បានធ្វើសកម្មភាពបំពានច្បាប់ស្តីពីអង្គការសមាគម និង អង្គការមិនមែនរដ្ឋាភិបាល និងលក្ខន្តិកៈរបស់អង្គការ៕