រដ្ឋមន្ត្រីក្រសួងដែនដី នគរូបនីយកម្ម និងសំណង់បញ្ជាក់ជំហរចុងក្រោយប្រាប់ពលរដ្ឋថា រដ្ឋាភិបាលអាចផ្ដល់ជាសំណងឲ្យអ្នករស់នៅអាគារប៊ូឌីញក្នុង១ម៉ែត្រការ៉េតត្រឹម១.៤០០ដុល្លារអាមេរិកប៉ុណ្ណោះ ខណៈពលរដ្ឋមួយចំនួននៅមិនទាន់ទទួលយកនៅឡើយ។
នៅក្នុងកិច្ចប្រជុំមួយនៅក្រសួងដែនដី នាថ្ងៃទី១២ខែឧសភានេះ រដ្ឋមន្ត្រីក្រសួងដែនដី លោក ជា សុផារ៉ា មានប្រសាសន៍ថា ពលរដ្ឋដែលព្រមទទួលយកសំណងនេះ អាចបំពេញបែបបទ ដើម្បីទទួលប្រាក់នៅពេលខាងមុខ ដោយលោកទុករយៈពេលឲ្យ១ខែសម្រាប់រើផ្ទះចេញពីអគារនេះ។
លោក ជា សុផារ៉ា ឲ្យដឹងទៀតថា ពលរដ្ឋដែលព្រមរើសផ្ទះចេញ លោកនឹងជួយប្រាក់ ១គ្រួសារ ១០០ដុល្លារ បន្ថែមទៀតសម្រាប់រើអីវ៉ាន់។
លោកបន្តថា «សម្រេចចិត្តចុងក្រោយខ្ញុំគិតថា បើ១៤០០ អស់ត្រូវ គិតទៀត ចាំមើលទៅរកអ្នកណាលើសហ្នឹងទៀត ចំពោះខ្ញុំមានតែរំសាយអង្គប្រជុំ ព្រោះអីមិនអាចទៅមុខទៀតទេអស់ត្រឹមហ្នឹង»។
លោក ជា សុផារ៉ា បន្តទៀតថា ចំពោះពលរដ្ឋដែលមិនទាន់ទទួលយកសំណង លោកអះអាងថា ទុករឿងនេះមួយឡែកសិន ដោយចាំដោះស្រាយនៅពេលក្រោយ។
ពលរដ្ឋម្នាក់អ្នកស្រី ទូច រស្មី ដែលមិនព្រមទទួលយកសំណង ប្រាប់អ្នកសារព័ត៌មាន បន្ទាប់ពីបញ្ចប់កិច្ចប្រជុំពិភាក្សានោះថា តម្លៃដែលអ្នកស្រីអាចទទួលយកគឺ ១ ម៉ែត្រការ៉េត ត្រឹម២០០០ដុល្លារអាមេរិក ប្រសិនបើមិនបានទេគាត់មិនចាកចេញពីអគារនោះឡើយ។
អ្នកស្រីបន្តថា នៅមានពលរដ្ឋជាង៥០ភាគរយទៀត ដែលមិនព្រមទទួលយកសំណងនោះ ដោយអ្នកស្រីយល់ថា តម្លៃដែលក្រសួងឲ្យមិនអាចយកទៅទិញផ្ទះបានវិញឡើយ។
អ្នកស្រីថា «អ្វីដែលបងចង់បានអត់ឲ្យលើសពីទីផ្សារទេ អ្វីដែលបងបានគឺលក់កន្លែងហ្នឹងបងអាចទៅទិញបាននៅកន្លែងផ្សេង ប៉ុន្តែក៏មិនសង្ឃឹមថាទិញបាននៅក្នុងក្រុងដែលលុយប៉ុណ្នឹងប្រាកដជាទិញបាននៅជាយក្រុងហើយ ប៉ុន្តែធ្វើម៉េចឲ្យយើងទិញបាននៅតម្លៃនៅទីផ្សារ។ ដូចលូវ ដូចមិញចឹងគាត់ឲ្យយើងពិភាក្សាគ្នានៅខាងក្រៅ ដើម្បីមិនយល់ព្រមតម្លៃហ្នឹង ដល់ពេលចូលមកវិញគាត់មិនឲ្យយើងឡើងតវ៉ា។ ប៉ុន្តែដឹងតែពួកខ្ញុំមិនព្រមហើយ នៅប៉ុន្មានគ្រួសារដែលនៅជិតគ្នាហ្នឹង គឺអត់ព្រមហ្នឹងតម្លៃហ្នឹងទេ ព្រោះគិតថាបើយើងចេញក៏អត់ទៅទិញផ្ទះអីបានដែរ»។
ពលរដ្ឋម្នាក់ទៀត កញ្ញាលើកឡើងប្រហាក់ប្រហែលគ្នាថា សម្រាប់អ្នកដែលមានផ្ទៃបន្ទប់ធំ គឺព្រមទទួលដោយ លុយដែលឲ្យនោះពួកគាត់អាចទៅទិញផ្ទះរស់នៅបានសមរម្យ ប៉ុន្តែសម្រាប់អ្នកដែលមានបន្ទប់តូចពួកគាត់ព្រមចេញនោះ ដោយសារ គាត់ទទួលបានលុយតិចមិនអាចយកលុយទៅទិញផ្ទះវិញបានឡើយ។
កញ្ញាថា «ឯកឧត្ដមមានដំណោះស្រាយបែបណាឲ្យអ្នកនៅខាងក្រោមគាត់ទទួលយកបានដែរ ចុះបើលូវខាងគេព្រមអស់អ្នកខាងក្រោមគេមិនព្រមចេញអត់រួចដដែល ដល់ចេញមិនរួចចឹងមកវាយប៊ូឌីញ ឬ មួយមានការអ្នកខាងក្រោមបានលុយហើយតែអស់ព្រមចេញអាហ្នឹងអត់មានរឿងហ្នឹងកើតឡើងទេ។ ចង់ឲ្យឯកឧត្ដមគាត់គិតឡើងវិញថា អាលូវហ្នឹងបើអ្នកខាងក្រោមមានត្រឹមតែ ១០ ការ៉េ ២០ ការ៉េ គុណលុយទៅអ្នកខ្លះបានលុយត្រឹម ១ ម៉ឺនជាង អ្នកខ្លះ ២ ម៉ឺនជាង ដុល្លារមេរិក។ សួរថាយកលុយនេះទៅទិញអីបាន មានតែទៅទិញដីស្រែដូចគាត់និយាយធ្វើចង្កាន់បាយមុន ខ្ញុំនៅខាងក្រោម ខ្ញុំមិនមែនតវ៉ាតែម្នាក់ឯងទេ គឺខ្ញុំតំណាងឲ្យប្រជាពលរដ្ឋនៅខាងក្រោមគឺគាត់មិនយល់ព្រមទាំងអស់»។
ប្រធានក្រុមការងារពិសេសសិទ្ធិលំនៅឋាន លោក សៀ ភារម្យ សារទ ចំពោះដំណោះស្រាយរបស់រដ្ឋមន្ត្រីក្រសួងដែនដីដែលបានបង្ហាញឆន្ទះ ដើម្បីដោះស្រាយឲ្យប្រជាពលរដ្ឋនោះ។
លោកថា «នីតិវិធីល្អខ្ញុំគាំទ្រ ព្រោះយន្តកាលរបស់ឯកឧត្ដមរដ្ឋមន្ត្រីវាជាចំណុចល្អ ជាដំណើរការល្អពីព្រោះដើម្បីពន្លឿការដោះស្រាយហ្នឹងឲ្យបានឆាប់ចប់គឺត្រូវតែដឹងដែរ។ថាតើពេលដែលគេឲ្យតម្លៃប៉ុណ្ណឹងគាត់ពេញចិត្តប៉ុន្មាននាក់ ប៉ុន្មានភាគរយគេនឹងអាចដឹងវាស់ស្ទង់មើលថាតើចំនួនប៉ុន្មានដែលបានមកចុះឈ្មោះមកទទួលយកចំនួន១៤០០ ដុល្លារហ្នឹង។ គេហ្នឹងមាននីតិវិធីចចារបន្តទៀតឬមួយអីគេមានយន្តកាលបែបណាទៀតអាហ្នឹងជារឿងធម្មតាទេវាជាលំនាំនៃដំណើរការចចារ នៃការដោះស្រាយខ្ញុំគិតថាល្អហើយយើងគាំទ្រចំណាត់ការបែបនេះ»។
អាគារប៊ូឌីញ(ស) ត្រូវបានរដ្ឋាភិបាលប្រគល់សិទ្ធិឲ្យក្រុមហ៊ុនជប៉ុនឈ្មោះ Arakawa អភិវឌ្ឍក្នុងទឹកប្រាក់៨០លានដុល្លារ ។
គម្រោងនេះ រួមមានការសាងសង់ទីតាំងស្នាក់នៅបណ្តោះអាសន្ន និងអគារថ្មីកម្ពស់២១ជាន់ ដែលក្នុងនោះទុកធ្វើទីតាំងចំណតរថយន្ដ៣ជាន់ កន្លែងលក់ដូរ១ជាន់ និងកន្លែងស្នាក់នៅ៥ជាន់៕