រថយន្តរបស់ស្ថាបនិកបណ្តាញព្រះសង្ឃឯករាជ្យដែលសកម្មនឹងកិច្ចការសង្គមនិងបរិស្ថាន ព្រះតេជគុណ ប៊ុត ប៊ុនតិញ ត្រូវបានជនមិនស្គាល់មុនគប់បំផ្លាញកញ្ចក់ បន្ទាប់ពីព្រះអង្គបានថ្លែងពន្យល់ពុទ្ធបរិស័ទនៅខេត្តកំពង់ឆ្នាំងឲ្យការពារពុទ្ធបដិមាបុរាណ។
ក្នុងហ្វេសបុករបស់ព្រះអង្គបានឲ្យដឹងថា កាលពីយប់ថ្ងៃទី១១ កក្កដា វេលាម៉ោងប្រមាណ១០និង២៣នាទីយប់ រថយន្តរបស់ព្រះអង្គត្រូវបានជនមិនស្គាល់មុខគប់បំបែកកញ្ចក់ខាងស្តាំផ្នែកកណ្តាលនៃឡាន កើតឡើងនៅជិតវត្តសិរីពោធិព្រឹក្ស ឃុំបន្ទាយដែក ស្រុកកៀនស្វាយ ខេត្តកណ្ដាល។ ព្រះអង្គបានបន្ថែមថា ហេតុការណ៍នេះបានកើតឡើង បន្ទាប់ពីក្រុមការងារបណ្ដាញព្រះឯករាជ្យដើម្បីយុត្តិធម៌សង្គមបាននិមន្តចុះពន្យល់ពុទ្ធបរិស័ទឱ្យរួមគ្នាការពាររូបបដិមាបូរាណ មួយរូបនៅឃុំដា ស្រុកកំពង់លែង ខេត្តកំពង់ឆ្នាំង។
ព្រះអង្គបានចាត់ទុកសកម្មភាពនេះជាការគំរាមកំហែង បង្កអសន្តិសុខដល់ព្រះអង្គ និងក្រុមការងាររបស់ព្រះអង្គ និងបានចាត់ទុកថាសកម្មភាពនេះមានជាប់ទាក់ទងជាមួយនយោបាយ ហើយរដ្ឋាភិបាលត្រូវទទួលខុសត្រូវប្រសិនជាមានបញ្ហាទាក់ទងនឹងសុវត្ថិភាពរបស់ព្រះអង្គ៕