នៅទីបំផុតជំនួបលើកទី៣ រវាងកីឡាករជើងខ្លាំង២រូបគឺកីឡាករកម្ពុជា ចាន់ ស៊ីណាត និងកីឡាករថៃ KamlaiYuok កីឡាករកម្ពុជា បានក្លាយជាអ្នកយកឈ្នះគួរឲ្យភ្ញាក់ផ្អើល ក្នុងពេលដែល២ទឹកដំបូងមិនមានអ្នកទស្សនាច្រើនឡើយថាលោកនឹងឈ្នះការប្រកួត។ អ្នកទាំងពីរជួបគ្នា៣លើកមកហើយ ដោយ២លើកន្លងទៅកីឡាករថៃសុទ្ធតែឈ្នះជាប់គ្នាតែម្ដង។
ជំនួបដែលបានធ្វើឡើងនៅថ្ងៃរសៀលនៅទូរទស្សន៍អាស៊ីអាគ្នេយ៍នោះ កីឡាករចាន់ ស៊ីណាត ប៊ិះនឹងអស់ឱកាសសងសឹកដោយសារតែការប្រកួត២លើកកន្លងនៅលើសង្វៀនរបស់ស្ថាប័នមួយនេះទទួលលទ្ធផលចាញ់រហូត ហើយការប៉ះគ្នាលើកទី៣កាលពីថ្ងៃទី១២មីនា ក៏មើលទៅទំនងមិនសមនឹងឈ្នះ។ ២ទឹកដំបូងកីឡាករចាន់ ស៊ីណាតប្រឹងប្រឹងប្រកួតសម្បើមណាស់ ប៉ុន្តែលទ្ធផលដែលគេធ្វើបានមិនសូវលេចធ្លោប៉ុន្មានទេ ដោយសារតែកីឡាករថៃក៏ធ្វើបានល្អក្នុងការវាយបក។
ទាំងជើង និងកណ្ដាប់ដៃកីឡាករថៃនៅតែធ្វើបានល្អ ដែលផ្ទុយពីកីឡាករកម្ពុជាស្ទុះវាយចេញច្រើនតែតួលេខវាយត្រូវនៅមានកម្រិត។ បើទោះជាកីឡាករចាន់ ស៊ីណាត វាយកែង និងកណ្ដាប់ដៃបានរហ័សត្រូវចំគោលដៅ ក៏កីឡាករថៃនៅតែបានវាយបកធ្វើអោយកីឡាករកម្ពុជាចង់ដាច់ផ្ងារដោយអន្លើរ។ ការប្រកួតមួយគូរនេះអ្នកណាក៏ចាប់អារម្មណ៍ថាទាក់ទាញ ដោយសារតែអ្នកទាំងពីរសុទ្ធតែបញ្ចេញអស់រៀងខ្លួន ព្រោះតែហេតុម្នាក់ម្នាក់ចង់សងសឹកអោយបានដាច់ខាត ហើយម្នាក់ទៀតចងការពារជ័យជម្នះកុំអោយប្រែប្រួល។
២ទឹកដំបូងកីឡាករថៃមានប្រៀបល្អដាច់ ដោយអ្នកណាក៏មើលដឹងថាចាន់ ស៊ីណាត នឹងមិនអាចសងសឹកបាននោះឡើយ ប៉ុន្តែចុងក្រោយនៅទឹកទី៣ កីឡាករកម្ពុជាបែរជាមានឱកាសវាយត្រូវគុមថ្គាមហើយបណ្ដាលអោយកីឡាករថៃដួលសន្លប់ងើបមិនរួច។ កីឡាករថៃវាយល្អ តែភ្លាត់ត្រូវប៉ុន្មានដៃក្នុងទឹកទី៣ ក៏ដេកដួលលើរេញ ហើយបណ្ដាលអោយរាប់ដល់១០មិនគួរអោយជឿ ទើបធ្វើអោយកីឡាករកម្ពុជាអាចបញ្ចប់ការប្រកួតដោយឈ្នះកីឡាករថៃក្នុងទឹកទី៣។
លោក រាជ សូផែន អ្នកគ្រប់គ្រងវិន័យ និងគណកម្មការប្រដាល់ប្រចាំនៅទូរទស្សន៍អាស៊ីអាគ្នេយ៍បានអះអាងថាការប្រកួតជាលើកទី៣រវាងកីឡាករចាន់ ស៊ីណាត និងកីឡាករថៃ KailaiYuok ប្រសិនបើកីឡាករថៃឈ្នះទៀត នោះគណកម្មការនឹងមិនរៀបអោយប៉ះគ្នាជាថ្មីទៀតទេ ដោយសារតែច្បាប់ការប្រកួតបើកីឡាករម្នាក់ចាញ់ការប្រកួត៣លើកជាប់គ្នាគឺមិនអនុញ្ញាតិអោយប្រកួតគ្នាទៀតទេ។
យ៉ាងណាមិញ លោកថាដោយសារតែកីឡាករចាន់ ស៊ីណាត ទទួលជ័យជម្នះសម្រាប់ការប្រកួតនៅថ្ងៃទី១២ មីនា នោះ ទើបគម្រោងអោយកីឡាករទាំងពីរប៉ះគ្នានឹងត្រូវធ្វើឡើងជាថ្មីក្នុងពេលខាងមុខ។ លោកថាការប្រកួតរបស់ពួកគេនឹងប៉ះគ្នាជាលើកទី៤ ដោយសារកីឡាករថៃប្រកាសសុំសងសឹក។ លោកមិនទាន់ច្បាស់ថា កីឡាករថៃ និងចាន់ ស៊ីណាត អាចប៉ះគ្នាជាថ្មីនៅពេលណានោះទេ ដោយសារតែភាពជាក់ស្ដែងគឺទាល់តែកីឡាករទាំងពីរមានពេលត្រូវគ្នា និងស្ថិតក្នុងបរិយាកាសស្របគ្នាសិន។
លោកសម្ដែងការអបអរសាទរដែលកីឡាករ ចាន់ ស៊ីណាត អាចឈ្នះសម្រាប់ការប្រកួតលើកទី៣ តែលោកថាជ័យជម្នះដែលគេធ្វើបាន នៅមិនទាន់ជាមោទនភាពនោះទេ ដោយសារតែការប្រកួតដែលបានធ្វើឡើងគឺកីឡាករថៃបរាជ័យព្រោះតែភាពភ្លាត់ស្នៀតប៉ុណ្ណោះ។ លោកទទូចឲ្យ ចាន់ ស៊ីណាត ប្រឹងប្រែងបន្ថែមទៀតប្រសិនបើចង់ទទួលជ័យជម្នះលើកីឡាករថៃ KamlaiYuok ក្នុងការជួបប្រកួតជាលើកទី៤។
កីឡាករ ចាន់ ស៊ីណាត និយាយថាលោកនឹងត្រៀមខ្លួនប៉ះគ្នាជាថ្មីម្ដងទៀត ប្រសិនបើកីឡាករថៃទាមទារសងសឹក ក្រោយពីលោកប្រកួតឈ្នះក្នុងជំនួបលើកទី៣។ លោកសារភាពកីឡាករថៃខ្លាំង និងពូកែគេច តែលោកក៏ប្រើបច្ចេកទេសអស់ពីសមត្ថភាពណាស់ដែរទម្រាំបានឈ្នះក្នុងទឹកទី៣នាថ្ងៃនោះ៕