អង្គការសុខភាពពិភពលោក បានប្រកាសនៅថ្ងៃនេះថា ការកែលម្អដ៏សមរម្យ គឺជាភាពចាំបាច់ក្នុងការធានាការប្រើប្រាស់ទឹកស្អាត និងអនាម័យនៅទូទាំងពិភពលោក ដោយអង្គការនេះព្រមានថា មនុស្សជិត ២ពាន់លាននាក់ បច្ចុប្បន្ននេះ កំពុងប្រើប្រាស់ទឹកផ្ទុកទៅដោយកាលសំណល់។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
អង្គការនេះ បាននិយាយថា មនុស្សរាប់រយពាន់នាក់ បានស្លាប់ក្នុងមួយឆ្នាំៗ ដោយសារតែពួកគេបង្ខំចិត្តទទួលទានទឹកកខ្វក់ ដោយអង្គការនេះបានជំរុញឲ្យមានការវិនិយោគធំ ដើម្បីជួយឲ្យពិភពលោកទទួលបានទឹកបរិភោគដោយសុវត្ថិភាព។
ប្រមុខនាយកដ្ឋានសុខភាពសាធារណៈអង្គការសុខភាពពិភពលោក អ្នកស្រី Maria Neira បាននិយាយនៅក្នុងសេចក្ដីថ្លែងការណ៍មួយថា បច្ចុប្បន្ននេះ មនុស្សជិត ២ពាន់លាននាក់ ប្រើប្រាស់ប្រភពទឹកបរិភោគផ្ទុកដោយសារធាតុកខ្វក់ ដែលធ្វើឲ្យពួកគេប្រឈមមុខនឹងជំងឺរាគរូស ក្អួតចង្អោរ ជំងឺគ្រុនពោះវៀន និងជំងឺឆ្អឹងខ្នង។
អ្នកស្រីបន្ថែមថា ទឹកកខ្វក់ ត្រូវបានគេវាយតម្លៃថាបង្កឲ្យមានមនុស្សស្លាប់ជាង ៥០ម៉ឺននាក់ក្នុងមួយឆ្នាំៗ និងជាកត្តាដ៏ធំមួយនៅក្នុងជំងឺត្រូពិកជាច្រើន ក្នុងនោះមានទាំងសត្វល្អិតក្នុងពោះវៀនផងដែរ៕
