កម្មកររោងចក្រហ្គាវ័ន្តជាង៣០០នាក់ធ្វើបាតុកម្មបិទផ្លូវ ២១០ ស្ថិតនៅក្រុងតាខ្មៅនៅព្រឹកថ្ងៃនេះ ដើម្បីដាក់សម្ពាធឲ្យស្ថាប័នពាក់ព័ន្ធជំរុញទៅថៅកែរោងចក្របើកប្រាក់ខែឲ្យពួកគេ ។
កម្មកររោងចក្រហ្គាវ័ន្តលោក ឃឹម មករា បានប្រាប់វីអូឌីឱ្យដឹងថាថៅកែរោងចក្ររបស់ខ្លួនបានកុហកកម្មករជាច្រើនលើកច្រើនសាថានឹងបើកប្រាក់ខែឱ្យ ប៉ុន្តែជាក់ស្តែងមិនដូច ជាការសន្យានោះទេ។
កម្មករបានបញ្ជាក់ថា ពួកមិនមានប្រាក់សម្រាប់ការចំណាយលើកន្លែងស្នាក់នៅ និង ហូបចុក ទើបសម្រេចនាំគ្នាបិទផ្លូវសុំឲ្យស្ថាប័នពាក់ព័ន្ធអន្តរាគមន៍ថៅកែរោងចក្រឲ្យពន្លឿនបើកប្រាក់ខែ។
លោកឃឹម មករា ឲ្យដឹងទៀតថា ប្រាក់ខែសម្រាប់ខែមេសា ថៅកែ បានបើកឲ្យតែ២០ដុល្លារម្នាក់ប៉ុណ្ណោះ ចំណែកប្រាក់នៅសល់ដំបូងថា បើកឲ្យនៅថ្ងៃទី១២ខែឧសភា ប៉ុន្តែរហូតដល់ថ្ងៃទី១៣នេះមិនទាន់បើកឲ្យនៅឡើយទេ។ លោកថា ក្នុងកម្មករម្នាក់ប្រាក់ខែជាមធ្យមគឺទទួលបាន១៨០ដុល្លារក្នុង១ខែ។