អតីតនាយករដ្ឋមន្ត្រីប៉ាគីស្ថាន លោក ណាវ៉ាស ហ្សារីហ្វ បានប្រាប់ក្រុមអ្នកគាំទ្ររាប់ពាន់នាក់ថា លោកនឹងផ្លាស់ប្ដូរវាសនាប្រទេសជាតិ បើទោះបីជារូបលោកត្រូវបានតុលាការកំពូលបណ្ដេញចេញពីអំណាចក៏ដោយ ខណៈដែលលោកបញ្ចប់ពិធីដង្ហែក្បួនបួនថ្ងៃមួយ ដង្ហែពីទីក្រុងអ៊ីស្លាម៉ាបាដ ទៅទីក្រុងឡាហ័រ កាលពីថ្ងៃម្សិលមិញនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
លោក ហ្សារីហ្វ បានថ្លែងទៅកាន់មហាជននៅតាមដងផ្លូវដែលភ្ជាប់រដ្ឋធានីអ៊ីស្លាម៉ាបាដ ទៅនឹងមូលដ្ឋានដ៏រឹងមាំរបស់គណបក្សលោកស្ថិតនៅភាគខាងកើត បន្ទាប់ពីតុលាការកំពូលប៉ាគីស្ថាន បានសម្រេចបណ្ដេញរូបលោកចេញពីតំណែងកាលពីខែមុន ក្រោយពីមានការស៊ើបអង្កេតលើអំពើពុករលួយ។
លោកថ្លែងថា លោកមិនភ័យខ្លាចនោះឡើយ ហើយលោកនឹងមិនអង្គុយនៅក្នុងផ្ទះនោះឡើយ រហូតទាល់តែលោកផ្លាស់ប្ដូរវាសនាប្រទេសជាតិ។
លោកថ្លែងបន្តថា ប្រទេសនេះគឺជារបស់ប្រជាជន ២០០លាននាក់ មិនមែនជារបស់មនុស្សពីរបីនាក់ដែលបណ្ដេញលោកចេញ ដោយមិនគោរពការបោះឆ្នោតរបស់ប្រជាជននោះទេ។
លោក ហ្សារីហ្វ ត្រូវបានតុលាការកំពូលសម្រេចដកហូតអំណាចកាលពីថ្ងៃទី២៨ ខែកក្កដា ជុំវិញរឿងអាស្រូវពុករលួយ ដែលការសម្រេចនេះបណ្ដាលឲ្យប្រទេសមាននុយក្លេអ៊ែរមួយនេះ ធ្លាក់ចូលទៅក្នុងស្ថានភាពនយោបាយមិនច្បាស់លាស់។
លោក ហ្សារីហ្វ គឺជានាយករដ្ឋមន្ត្រីទី១៥ នៅក្នុងប្រវត្តិសាស្ត្រ ៧០ឆ្នាំរបស់ប៉ាគីស្ថាន ដែលត្រូវបានបណ្ដេញចេញពីតំណែងនៅមុនបញ្ចប់អាណត្តិ៕