ព្យុះនិងភ្លៀងកំពុងតែបង្កបញ្ហាខ្លាំងនៅរដ្ឋមួយចំនួនរបស់សហរដ្ឋអាមេរិក ដែលបានបំផ្លាញទ្រព្យសម្បត្តិ សម្លាប់ជីវិត ហើយបណ្តាលឲ្យពលរដ្ឋប្រមាណជិត៧លាននាក់កំពុងតែប៉ះពាល់។
តាមការចុះផ្សាយរបស់សារព័ត៌មាន BBC បានឲ្យដឹងថា នៅរដ្ឋហ្វ័ររីដា ពលរដ្ឋជាច្រើនត្រូវបង្ខំចាកចេញពីផ្ទះ ហើយផ្ទះនៅក្នុងរដ្ឋនេះប្រមាណ១ភាគ៤អាចនឹងត្រូវបំផ្លាញដោយសារខ្យល់ព្យុះ Irma និងជំនន់ទឹកភ្លៀងកម្រិតខ្លាំង។ ខ្យល់ព្យុះកំពុងបោកបក់ក្នុងល្បឿនខ្លាំង ១៩២គីឡូម៉ែត្រក្នុង១ម៉ោង។
ក្រុមជួយសង្គ្រោះកំពុងបន្តការជួយជម្លៀសពលរដ្ឋចេញពីតំបន់មានគ្រោះធម្មជាតិនេះ ចំណែកក្រុមផ្គត់ផ្គង់អាហារនិងទឹកស្អាតក៏មមាញឹកក្នុងការជួយ។
មនុស្សប្រមាណ៦,៩លាននាក់កំពុងតែរស់នៅដោយមិនមានអគ្គសនីប្រើប្រាស់ នៅក្នុងរដ្ឋចំនួន៥គឺ Florida, Georgia, North Carolina, South Carolina និង Alabama។
ខ្យល់ព្យុះ Irma ចាប់ផ្តើមបោកបក់តាំងពីថ្ងៃអាទិត្យមក ហើយបានបណ្តាលឲ្យមនុស្សចំនួន១៨នាក់បានស្លាប់ ដែលក្នុងនោះ១២នាក់ស្លាប់នៅរដ្ឋ Florida។
ប្រធានាធិបតីសហរដ្ឋអាមេរិកលោក ដូណល ត្រាំ និងភរិយារបស់លោក នឹងធ្វើដំណើរទៅរដ្ឋ Florida ដើម្បីសួរសុខទុក្ខ និងត្រួតពិនិត្យស្ថានភាពគ្រោះធម្មជាតិនេះ។ នេះជាដំណើរទស្សនកិច្ចទី៣ហើយរបស់លោក ត្រាំ ដើម្បីសួរសុខទុក្ខ អ្នករងគ្រោះដោយសារខ្យល់ព្យុះ និងទឹកជំនន់៕