រូបវិទូដ៏ល្បីល្បាញរបស់អង់គ្លេស លោក Stephen Hawking ដែលមានរាងកាយពិការ ប៉ុន្តែ ខួរក្បាលដ៏អស្ចារ្យនោះ បានស្លាប់នៅអាយុ ៧៦ឆ្នាំ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ដោយបានដកស្រង់សម្ដីក្រុមគ្រួសារលោកនៅថ្ងៃនេះ។
ល្បីល្បាញដោយសារសៀវភៅរបស់លោកក្រោមចំណងជើងថា «ប្រវត្តិសង្ខេបនៃពេលវេលា» បោះពុម្ពផ្សាយនៅឆ្នាំ១៩៨៨ ហើយបានក្លាយជាសៀវភៅលក់ដាច់បំផុតនៅទូទាំងពិភពលោកនោះ លោក Hawking បានបូជាជីវិតរបស់លោក ដើម្បីបកស្រាយអាថ៌កំបាំងនៃចក្រវាឡ។
របកគំឃើញរបស់លោក បានធ្វើឲ្យលោកត្រូវបានគេយកទៅប្រៀបធៀបទៅនឹងអ្នកវិទ្យាសាស្ត្រ Albert Einstein និងរូបវិទូ Sir Isaac Newton។
កូនៗរបស់លោក Hawking បាននិយាយក្នុងសេចក្ដីប្រកាសព័ត៌មានមួយថា លោក Hawking បានបាត់បង់ជីវិតយ៉ាងស្ងប់ស្ងាត់នៅឯផ្ទះរបស់លោកស្ថិតនៅសាកលវិទ្យាល័យខេមប៊្រីជដ៍ នៅព្រឹកថ្ងៃពុធនេះ៕