នៅសប្តាហ៍នេះ យ៉ាងហោចណាស់មានមនុស្ស២នាក់បន្ថែមទៀតត្រូវបានសមត្ថកិច្ចចាប់ខ្លួន ដោយចោទថាពួកគេគំរាមសម្លាប់និងប្រមាថមើលងាយ លោកនាយករដ្ឋមន្រ្តី ហ៊ុន សែន។
ស្ត្រីម្នាក់ដែលបាននិយាយបង្ហោះវីដេអូនៅថ្ងៃបុណ្យខួបគំរប់១ឆ្នាំ លោក កែម ឡី កាលពីថ្ងៃទី១០កក្កដា ថា គ្រួសារលោក ហ៊ុន សែន ជាអ្នកនៅពីក្រោយឃាតកម្មលើអ្នកវិភាគរូបនោះ ត្រូវបានសមត្ថកិច្ចចាប់ខ្លួន បញ្ជូនទៅតុលាការឃុំខ្លួនបណ្តោះអាសន្ន កាលពីថ្ងៃទី១៣កក្កដា ពោលតែពីរថ្ងៃប៉ុណ្ណោះក្រោយមានសកម្មភាព។
ជាមួយគ្នានោះ បុរសម្នាក់ទៀតនៅខេត្តព្រះសីហនុ ដែលបង្ហាញរូបកំាភ្លើងលើហ្វេសប៊ុក គំរាមសម្លាប់លោក ហ៊ុន សែន ក៏ត្រូវបានសមត្ថកិច្ចចាប់ខ្លួនផងដែរ។
សាស្ត្រាចារ្យនយោបាយ លោក ឯម សុវណ្ណារ៉ា យល់ថា អ្នកអនុវត្តច្បាប់នៅក្នុងប្រទេសកម្ពុជាបច្ចុប្បន្ននេះ មានទំនោរទៅរកតែអ្នកកាន់អំណាច ដោយថាអ្នកក្រីក្រឬអ្នកតូចតាចតែងតែរងភាពអយុត្តិធម៌។ ករណីនេះលោកថា ធ្វើឲ្យពលរដ្ឋអស់ជំនឿលើការដឹកនាំរបស់រដ្ឋាភិបាល។
លោកយល់ថា «កាលណាសង្គមមិនបានបែងសិទ្ធិស្មើភាពគ្នាចំពោះពលរដ្ឋទូទៅនៅក្នុងសង្គមទេ ធ្វើឲ្យពលរដ្ឋពេញចិត្តបានទំាងអស់គ្នាទេ ហើយពលរដ្ឋភាគច្រើនដែលពុំសូវបានសមភាពដោយត្រឹមត្រូវ ផ្លូវច្បាប់ស្មើភាពគ្នាទេ ធ្វើឲ្យពលរដ្ឋទំាងអស់នោះមានការអាក់អន់ស្រពោនចិត្ត បើកាលណាគាត់អាក់អន់ស្រពោនចិត្ត គឺបាត់ជំនឿទៅលើការដឹកនាំ[រដ្ឋាភិបាល]»។
គេនៅចំាបានថា ករណីគំរាមសម្លាប់នេះ ក៏បានកើតមានជាបន្តបន្ទាប់ទៅលើអ្នកវិភាគនយោបាយ លោក អ៊ូ វីរៈ លោកបណ្ឌិត ឡៅ ម៉ុងហៃ លោក ជុន ច័ន្ទបុត្រ នាយកគ្រប់វិទ្យុអាស៊ីសេរីជាភាសាខ្មែរ ព្រះតេជគុណ ប៊ុត ប៊ុនតិញ ប្រធានបណ្តាញព្រះសង្ឃឯករាជ្យ និងមេដឹកនាំគណបក្សសង្គ្រោះជាតិ លោក កឹម សុខា ជាដើម។
អ្នកដែលគំរាមសម្លាប់អ្នករិះគន់រដ្ឋាភិបាល ត្រូវបានមជ្ឈដ្ឋានជាច្រើនស្គាល់ថា មនុស្សមួយចំនួននោះគឺ ស្ថិតនៅក្នុងជួរដ្ឋាភិបាល និងជាអ្នកគាំទ្រគណបក្សកាន់អំណាច ហើយបានបង្ហាញរូបកំាភ្លើង គ្រាប់ និងសរសេរអក្សរគំរាមសម្លាប់ លោក កឹម សុខា និងអ្នកវិភាគមួយចំនួន ប្រហែល១ឆ្នាំហើយពោលតាំងក្រោយពេលមានឃាតកម្មលើលោកបណ្ឌិត កែម ឡី។ ប៉ុន្តែរហូតដល់ពេលនេះសមត្ថកិច្ចមិនបានចាប់ខ្លួន ឬតុលាការក៏មិនចោទប្រកាន់ ជនដែលគំរាមសម្លាប់មនុស្សទាំងនោះដាក់ពន្ធនាគារ ដូចករណីអ្នករិះគន់ និងអ្នកគំរាមសម្លាប់ លោក ហ៊ុន សែន នោះទេ។
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្ស អង្គការលីកាដូ លោក អំ សំអាត មានប្រសាសន៍ថា ការចាប់ខ្លួនអ្នករិះគន់លោក ហ៊ុន សែន នៅលើបណ្តាញសង្គមជាបន្តបន្ទាប់ គឺជាការបិទសិទ្ធិសេរីភាពបញ្ចេញមតិ។ លោក សំអាត ក៏បានប្រៀបធៀបអ្នករិះគន់លោក ហ៊ុន សែន និងអ្នករិះគន់លោក កឹម សុខា រួមទំាងបុគ្គលផ្សេងទៀត មានន័យរឿងដូចគ្នា ប៉ុន្តែអ្នកអនុវត្តច្បាប់ បែជាអនុវត្តបែបស្តង់ដារពីរទៅវិញ។
លោកនិយាយថា «កន្លងមកខ្ញុំឃើញការលើកឡើង និងការរិះគន់ ការគំរាមកំហែងប្រហាក់ប្រហែលគ្នាដែរបើសិនពាក់ព័ន្ធទៅលើដូចជា ឯកឧត្តម កឹម សុខា ទាក់ទងទៅនឹងការគំរាមកំហែងដោយអាវុធ តាមប្រព័ន្ធបណ្តាញសង្គមដែរ គំរាមបាញ់ដែរ ហើយមានសកម្មជន ឬក៏អ្នកនយោបាយមួយចំនួនទៀត ដែលមានការគំរាមកំហែងដូចគ្នា ប៉ុន្តែចំណាត់ការហាក់បីដូចជាមិនទាន់មានតុល្យភាព ជាការកត់សំគាល់យើងកាលណា បើសិនជាមានការអនុវត្តច្បាប់មានស្តង់ដារពីរ វាធ្វើឲ្យមានការរិះគន់ ហើយក៏វាអត់មាន តម្លាភាពដែរ យើងសង្គមស៊ីវិល យើងគ្រាន់តែទទួច បើអនុវត្តច្បាប់ យើងត្រូវអនុវត្តឲ្យវាមានស្តង់ដារ ដូចគ្នា»។
កាលពីថ្ងៃទី១៥ កក្កដា ឆ្នាំ២០១៤ មានហិង្សាមួយកើតឡើងនៅក្បែរទីលានប្រជាធិបតេយ្យរវាងក្រុមបាតុនិងសន្តិសុខខ័ណ្ឌដូនពេញ។ ក្រោយហិង្សាបក្សប្រឆំាងដាក់ពាក្យបណ្តឹង ដើម្បីប្តឹងកងសន្តិសុខទំាងនោះដែរ ប៉ុន្តែតុលាការមិនចាត់ការនោះទេ ។ ប៉ុន្តែករណីដូចគ្នានេះ ចៅក្រមសាលាដំបូងរាជធានីភ្នំពេញបានទទួលពាក្យបណ្តឹង ពីក្រុមសន្តិសុខដែលប្តឹងសកម្មជនបក្សប្រឆំាង។ ភ្លាមៗនោះតុលាការបានបើកសវនាការ ដោយសម្រេចផ្តន្ទាទោសសកម្មជនទាំង១១នាក់របស់គណបក្សសង្គ្រោះជាតិឲ្យជាប់ពន្ធនាគារម្នាក់ៗពី៧ទៅ២០ឆ្នាំក្រោមបទចោទចូលរួមនិងដឹកនាំកុប្បកម្មនៅក្បែរទីលានប្រជាធិបតេយ្យកាលពីថ្ងៃទី១៥ កក្កដា ឆ្នាំ២០១៤។
លើសពីនេះទៀត នៅចុងខែកុម្ភៈឆ្នាំ២០១៧ អ្នកស្រី ទេព វន្នី ក៏ត្រូវបានសាលាដំបូងរាជធានីភ្នំពេញកាត់ទោស ដោយដាក់ពន្ធនាគារចំនួន២ឆ្នាំកន្លះ ដោយចោទថាប្រើអំពើហិង្សាលើសន្តិសុខខណ្ឌដូនពេញពីរនាក់ឲ្យរងរបួស កាលពីថ្ងៃទី១៣ខែមីនាឆ្នាំ២០១៣។ ប៉ុន្តែសំរឿងហិង្សាផ្សេងទៀតដែលស្រ្តីសកម្មជនដីធ្លីប្តឹងទៅលើសន្តិសុខដែលប្រើហិង្សាវិញ ត្រូវបានតុលាការទាត់ចោល។
អ្នកប្រឹក្សាយោបល់ឯករាជ្យ ផ្នែកសិទ្ធិមនុស្ស លោក សួន ប៊ុនស័ក្តិ មានប្រសាសន៍ថា បើអ្នកអនុវត្តច្បាប់មានស្តង់ដារពីរនិងធ្វើឲ្យលទ្ធិប្រជាធិបេតេយ្យដើរថយក្រោយ ហើយថាសហគមន៍អន្តរជាតិ ក៏រិះគន់លើប្រព័ន្ធគ្រប់គ្រងរដ្ឋរបស់រដ្ឋាភិបាលផងដែរ។ ករណីនេះលោកថា កម្ពុជាគួរតែអនុវត្តច្បាប់ឲ្យស្របតាមគោលការនីតិរដ្ឋ ជាជាងអនុវត្តទំនោទៅអ្នកមានអំណាច។
លោកនិយាយថា «យើងត្រូវប្រកាន់គោលការណ៍ជាធំមួយ គឺគោរពគោលការណ៍នីតិរដ្ឋ បានសេចក្តីថា បើកាលណាមានច្បាប់ចែងជាធរមាន ថារដ្ឋត្រូវបំរើរាស្ត្រយ៉ាងម៉េច គឺធ្វើយ៉ាងម៉េចឲ្យបានដូចគ្នាទៅ គឺនៅពេលអ្នកណាមានបញ្ហា រដ្ឋត្រូវផ្តល់សេវាកម្មឲ្យបានដូចគ្នា មើលការខុសត្រូវឲ្យបានដូចគ្នា ជាការគោរពគោលការណ៍នីតិរដ្ឋ ហើយជាការលើកកម្ពស់លើវិស័យសិទ្ធិមនុស្សរួមគ្នា សម្រាប់ប្រជាពលរដ្ឋដែរ»។
គួររំឮកថា យុវជនខ្មែរដែលទៅធ្វើការនៅប្រទេសថៃ លោក វ៉ែន សុភាព ហៅ សាម ភាព ដែលបង្ហោះ សារដាក់បណ្តាសារលោកនាយករដ្ឋមន្ត្រី ហ៊ុន សែន នៅតាមបណ្តាញសង្គមហ្វេសប៊ុកកាលពីឆ្នាំ២០១៦ ត្រូវបានតុលាការចោទប្រកាន់ពីបទគំរាមកំហែងថានឹងសម្លាប់និងបទញុះញង់ឲ្យមានការរើសអើង ដោយប្រឈមនឹងទោសដាក់ពន្ធនាគារពី៦ខែដល់៣ឆ្នាំ និងអាចត្រូវពិន័យជាប្រាក់ពី១លានដល់៦លានរៀល។
ក្រោយមកទៀត យុវជនម្នាក់ទៀតនៅខេត្តកំពង់ធំ ឈ្មោះ ម៉ាន់ សំអ៊ន់ ត្រូវបានឃាត់ខ្លួន ហើយតុលាការក្រុងភ្នំពេញចោទប្រកាន់ ពីបទគំរាមសម្លាប់ លោក ហ៊ុន សែន នៅក្នុងសារតាមហ្វេសប៊ុកផងដែរ។
និយាយជារួម ទំាងអ្នកវិភាគ និងមន្ត្រីសង្គមស៊ីវិល បានបង្ហាញការព្រួយបារម្ភប្រហាក់ប្រហែលគ្នាថា បើកម្ពុជាអនុវត្តច្បាប់បែបស្តង់ដារពីរ ហើយអ្នកក្រីក្រនិងអ្នកគ្មានអំណាច មិនទទួលបានយុត្តិធម៌នោះ នឹងធ្វើឲ្យសង្គមពោពេញដោយនិទណ្ឌភាព អសន្តិសុខសង្គម និងលទ្ធិប្រជាធិបតេយ្យដើរថយក្រោយ៕