ក្រុមប្រឹក្សាឃ្លាំមើលកម្ពុជាដែលមានមូលដ្ឋាននៅឯក្រៅប្រទេស បានចោទរដ្ឋាភិបាលកម្ពុជាថា បានរំលោភលើឆន្ទៈពលរដ្ឋជុំវិញការបន្តបោះបង្គោលព្រំដែនជាមួយប្រទេសវៀតណាម ខណៈដែលប្រទេសនេះកំពុងប្រឈមមុខនឹងភាពតានតឹងខាងនយោបាយ។
លោកនាយករដ្ឋមន្ត្រី ហ៊ុន សែន បានរៀបរាប់នៅលើទំព័រហ្វេសប៊ុកផ្លូវការរបស់លោកថា លោកបានជួបពិភាក្សាជាមួយនាយករដ្ឋមន្ត្រីវៀតណាម លោក ង្វៀន ស៊ុនហ៊្វុក នៅឯក្រៅកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក នៅទីក្រុងហាណូយ កាលពីថ្ងៃទី១១ ខែវិច្ឆិកាកន្លងមកនេះ។
លោក ហ៊ុន សែន រៀបរាប់ថា រូបលោក និងមេដឹកនាំវៀតណាម បានប្ដេជ្ញាជំរុញការបោះបង្គោលព្រំដែនគោករវាងប្រទេសទាំងពីរបានរួចរាល់នៅរដូវប្រាំងឆ្នាំ២០១៨ខាងមុខ ដោយថា ដើម្បីធ្វើឲ្យតំបន់ព្រំដែននៃប្រទេសទាំងពីរក្លាយជាតំបន់មានសន្តិភាព និងតំបន់ផ្លាស់ប្ដូរពាណិជ្ជកម្ម។
ទោះជាយ៉ាងណា ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ដែលមានមូលដ្ឋាននៅប្រទេសន័រវេ កាលពីថ្ងៃម្សិលមិញនេះ បានថ្កោលទោសចំពោះសេចក្ដីសម្រេចបែបនេះរបស់លោក ហ៊ុន សែន ដោយចាត់ទុកជាការរំលោភលើឆន្ទៈពលរដ្ឋ និងផ្ទុយពីកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ខណៈដែលកម្ពុជាកំពុងស្ថិតក្នុងស្ថានភាពមួយ ដែលលោក ម៉ែន ណាត ហៅថា «វិបត្តិនយោបាយ»។
ក្រុមប្រឹក្សាឃ្លាំមើលបញ្ហាព្រំដែនកម្ពុជាមួយនេះ បានអំពាវនាវទៅរដ្ឋាភិបាលកម្ពុជា ឲ្យបញ្ឈប់ការបង្គោលព្រំដែនជាមួយវៀតណាម រហូតទាល់តែប្រទេសកម្ពុជាមានឯភាពជាតិ និងមានស្ថានភាពនយោបាយប្រក្រតីឡើងវិញ។
ប្រធានគណៈកម្មាធិការព្រំដែនកម្ពុជា លោក វ៉ា គឹមហុង ចាត់ទុកការលើកឡើងរបស់ក្រុមប្រឹក្សាឃ្លាំមើលបញ្ហាព្រំដែនកម្ពុជាថាផ្ទុយពីការពិត ដោយលោកថា បច្ចុប្បន្ននេះ ប្រទេសកម្ពុជាមានឯកភាពជាតិរួចហើយ។
លោកថា«អង្កាលបានមានឯកភាពជាតិ អ្នកណាមិនទាន់មានឯកភាពជាមួយអ្នកណា នៅត្រង់ ពេលណា ថាអត់មានឯកភាពជាតិ បើបោះឆ្នោតគាំទ្រអីអត់អាលីងហើយ។ វាថាតែមាត់ វាចេះតែថាទៅ…នាំខាតពេលវេលាចឹងបានហើយ ខ្ញុំមិនខាតពេលនឹងរឿងចឹងៗទេ»។
អនុប្រធានគណៈកម្មាធិការព្រំដែនកម្ពុជា អ្នកស្រី កុយ ពិសី ត្រូវបានសារព័ត៌មាន Fresh News ដកស្រង់សម្ដីចុះផ្សាយកាលពីថ្ងៃទី៩ ខែវិច្ឆិកាថា ការបោះបង្គោលព្រំដែនកម្ពុជា-វៀតណាម នៅខេត្តក្រចេះ និងព្រៃវែង បានបញ្ចប់រួចរាល់ ១០០ភាគរយហើយ ហើយភាគីទាំងពីរបានប្ដេជ្ញាបោះបង្គោលព្រំដែនរវាងប្រទេសទាំងពីរ ឲ្យបានចប់រួចរាល់នៅដំណាច់ឆ្នាំ២០១៧នេះ។
អ្នកស្រាវជ្រាវពីការអភិវឌ្ឍន៍សង្គម លោកបណ្ឌិត មាស នី ប្រាប់វីអូឌីកាលពីថ្ងៃទី១០ ខែវិច្ឆិកាថា ការបោះបង្គោលព្រំដែន វាជាកាតព្វកិច្ចរបស់រដ្ឋាភិបាលក្នុងការធ្វើ ប៉ុន្តែ មិនគួរត្រូវបានធ្វើឡើងនៅក្នុងស្ថានភាពមួយដែលលោកហៅថា «មិនទាន់មានឯកភាពជាតិ» នោះទេ។ លោកបានស្នើទៅរដ្ឋាភិបាលឲ្យពន្យាពេលក្នុងការបោះបង្គោលព្រំដែន ដោយរង់ចាំឲ្យប្រទេសមានឯកភាពជាតិជាមុនសិន។
លោកថា៖ «និយាយត្រង់ទៅ វាមិនទាន់មានឯកភាពជាតិគ្រប់គ្រាន់។ អញ្ចឹងនៅក្នុងស្ថានភាពបែបនេះ យើងដឹងហើយនៅក្នុងប្រទេសខ្មែរ បញ្ហាព្រំដែន គឺវាជាការប្រទាញប្រទុងគ្នារវាងគណបក្សនយោបាយខ្មែរនៅឡើយ។ អញ្ចឹងការបោះបង្កោលព្រំដែន វាជាតួនាទីរដ្ឋាភិបាល ប៉ុន្តែ ជាការព្រួយបារម្ភ ក្រែងការបោះបង្គោលព្រំដែននេះវាមិនបានផ្ដល់និរន្ត៍ភាពសម្រាប់រយៈពេលយូរអង្វែង ថ្ងៃក្រោយទៅមានបញ្ហាអីទៅ មានខ្មែរណាមួយមកអះអាងព្រំដែននេះបោះដោយរដ្ឋាភិបាលនេះ វាមិនបានត្រឹមត្រូវ ចឹងទៅក៏ចេះតែមានរឿងតទៅទៀតមិនចេះចប់មិនចេះហើយ»។
ការប្ដេជ្ញាចិត្តចំពោះការបោះបង្គោលព្រំដែនកម្ពុជា-វៀតណាមបែបនេះរបស់រដ្ឋាភិបាលកម្ពុជា ត្រូវបានធ្វើឡើងចំពេលដែលស្ថានភាពនយោបាយមានភាពតានតឹង ក្រោយពីការចាប់ខ្លួនមេដឹកនាំគណបក្សសង្គ្រោះជាតិ លោក កឹម សុខា ក្រោមការចោទប្រកាន់ពីរដ្ឋាភិបាលថា «ក្បត់ជាតិ» ហើយគណបក្សប្រឆាំងដ៏ធំមួយនេះប្រឈមមុខនឹងការរំលាយចោល៕