រដ្ឋមន្ត្រីអប់រំកម្ពុជា បានលើកឡើងថា រដ្ឋាភិបាលសម្រេចជោគជ័យក្នុងការជំរុញកុមារឲ្យចុះឈ្មោះចូលរៀន ប៉ុន្តែ លោកថា ជួបការលំបាកក្នុងរក្សាពួកគេឲ្យសិក្សារហូតដល់ចប់បាក់ឌុប ខណៈដែលក្រុមសង្គមស៊ីវិល បានភ្ជាប់បញ្ហានេះទៅនឹងភាពក្រីក្រ។
ថ្លែងក្នុងសន្នីសីទបិទបញ្ចប់កម្មវិធីផ្តល់ឱកាសអប់រំដល់កុមារបាត់បង់ឱកាសនៅកម្ពុជានៅព្រឹកថ្ងៃទី១៣ ធ្នូនេះ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន មានប្រសាសន៍ថា កុមារកម្ពុជា ៩៨ភាគរយ បានទៅឈ្មោះចូលរៀន ដែលលោកហៅថា ជាជោគជ័យរបស់ប្រទេសកម្ពុជា ប៉ុន្តែលោកបញ្ជាក់ថា កុមារកម្ពុជា ៨០ភាគរយប៉ុណ្ណោះ បានបញ្ចប់ការសិក្សាថ្នាក់បឋម។
លោក ហង់ ជួនណារ៉ុន ថ្លែងថា៖ «បើយើងគិតពីអត្រាចុះឈ្មោះចូលរៀន យើងសម្រេចបាន ៩៨ភាគរយ ដែលសល់ ២ភាគរយទៀតដែលមិនបានចូលរៀន តែនៅក្នុង ៩៨ភាគរយនេះ អត្រាបញ្ចប់ការសិក្សាកម្មវិធីសិក្សាបានតែ ៨០ភាគរយទេ។ អញ្ចឹងបានន័យថា ក្នុងចំណោមសិស្សបឋមសិក្សាទាំង ២លាននាក់ អ្នកដែលចប់ហ្នឹងបានត្រឹមតែ ៨០ភាគរយនៃ ២លាននាក់ទេ»។
នាយកប្រចាំប្រទេសនៃអង្គការ Aide et Action (AEA) លោក វង់ សំភាស់ បានឲ្យដឹងថា កុមារកម្ពុជាជាង ២៥ម៉ឺននាក់ បានបោះបង់ការសិក្សារបស់ខ្លួននៅកម្រិតបឋមសិក្សា ហើយនៅក្នុងរយៈពេលត្រឹមតែ ៤ឆ្នាំចុងក្រោយនេះប៉ុណ្ណោះ អង្គការរបស់លោក បានជួយកុមារកម្ពុជាជាង ៥ម៉ឺន ៧ពាន់នាក់ ឲ្យបានត្រឡប់ទៅសាលារៀនវិញ ក្នុងនោះមានកុមារីជិតពាក់កណ្ដាល។
មន្ត្រីសង្គមស៊ីវិលរូបនេះ បានបន្ទោសបញ្ហានេះថា បណ្តាលមកពីភាពក្រីក្រ និងបញ្ហាលំបាកនៅក្នុងសាលារៀន ហើយថា ការជំរុញពីអង្គការ និងរដ្ឋាភិបាលក្នុងការកែប្រែប្រព័ន្ធសិក្សា និងហេដ្ឋារចនាសម្ព័ន្ធសាលារៀន អាចជួយដល់កុមារមួយចំនួន ឲ្យវិលត្រឡប់ចូលសាលារៀនវិញបាន។
លោកថា៖ «ជនជាតិភាគតិច បញ្ហាដែលគាត់ប្រឈម គឺភាសា ព្រោះគ្រូយើងនិយាយភាសាខ្មែរ សាលាយើងនិយាយភាសាខ្មែរ កម្មវិធីសិក្សារបស់យើង និយាយភាសាខ្មែរ។ គាត់ចេះភាសាកំណើតរបស់គាត់ អញ្ចឹងគាត់អត់អាចចូលរៀនបានទេ។ អញ្ចឹង យើងត្រូវរកគាត់ឲ្យឃើញ។ …ហើយយើងត្រូវធ្វើអន្តរាគមន៍ចម្រុះតែម្តង ដើម្បីជួយពួកគាត់តាមតម្រូវការតាមស្ថានភាពដែលយើងអាចធ្វើបាន ដូចកុមារដែលពិការកាយសម្បទាជិះរទេះ ពេលខ្លះ យើងធ្វើតែជម្រាលទេរ ធ្វើជម្រាលធ្វើបង្កាន់ដៃ យើងបណ្តុះបណ្តាលគ្រូៗ ឲ្យគាត់អាចរៀនបានហើយ ប៉ុន្តែ កុមារពិការសតិបញ្ញាផ្សេង យើងត្រូវការវិធីពិសេស»។
នាយកសាលាបឋមសិក្សា ហ៊ុន សែន សែនមនោរម្យ ស្ថិតក្នុងខេត្តមណ្ឌលគីរី លោក សាង រ៉ា មានប្រសាសន៍ថា នៅឆ្នាំ២០១៧នេះ សាលាលោកបានទទួលចុះឈ្មោះដល់សិស្សដែលគ្រប់អាយុចុះឈ្មោះថ្មី បានជាង ១ពាន់នាក់ ប្រហាក់ប្រហែលទៅនឹងឆ្នាំមុនដែរ ខណៈចំនួនសិស្សបោះបង់ការសិក្សាមានចំនួនតិច ដោយថា ភាគច្រើនជាសិស្សដែលធ្វើចំណាកស្រុក។
លោកថា៖ «បោះបង់ភាគច្រើន គឺជនចំណាកស្រុកទេ ដែលគាត់មកតាមឪពុកម្តាយ មកស៊ីឈ្នួលចាំចំការឲ្យគេ អញ្ចឹងទៅ ដល់គាត់ធ្វើបានពីរបីខែអញ្ចឹងទៅ គាត់មើលតែពិបាកពេក គាត់ត្រលប់ទៅស្រុកគាត់វិញ»។
ប្រធានស្តីទីគ្រូបង្រៀនកម្ពុជាឯករាជ្យអ្នកស្រី អ៊ុក ឆាយ៉ាវី មានប្រសាសន៍ថា តាមការសង្កេតរបស់អ្នកស្រី ចំពោះការបោះបង់ការសិក្សារបស់សិស្ស គឺបណ្តាលមកពីភាពក្រីក្រ ការអស់អារម្មណ៍នឹងសិក្សាបន្តដោយសារកង្វះការងារនៅក្នុងប្រទេស បញ្ហានយោបាយ និងភាពមានកម្រិតនៃវិស័យអប់រំ។
អ្នកស្រីថា៖ «ពេលដែលគាត់រៀនដល់ថ្នាក់ទី៨ ទី៩ គាត់បោះបង់ថ្នាក់បណ្តើរៗហើយ តែដល់ពេលដែលគាត់ចូលថ្នាក់ទី១១ ឃើញថា បោះបង់ច្រើន»។
របាយការណ៍អង្គការយូណេស្គូតាមដានជាសកលប្រចាំឆ្នាំ២០១៧ ឲ្យដឹងថា អត្រាបញ្ចប់ការសិក្សនៅទូទាំងពិភពលោកមាន ៨៣ភាគរយសម្រាប់កម្រិតបឋមសិក្សា ៦៩ភាគរយសម្រាប់មធ្យមសិក្សាបឋមភូមិ និង៤៥ភាគរយសម្រាប់មធ្យមសិក្សាទុតិយភូមិ៕
