ស្ថានទូតសហរដ្ឋអាមេរិកនៅកម្ពុជា បានហៅការរាប់សន្លឹកឆ្នោតឡើងវិញរបស់គណៈកម្មាធិការជាតិរៀបចំការបោះឆ្នោត (គ.ជ.ប) ថាជាការជួយឲ្យពលរដ្ឋខ្មែរកាន់តែមានទំនុកចិត្តខ្លាំង លើការបោះឆ្នោត ក្រោយបក្សធំពីរមិនសុខចិត្តនឹងលទ្ធផលឆ្នោតនៅតាមឃុំសង្កាត់មួយចំនួន។
ឆ្លើយតបនឹងសំនួរអ្នកសារព័ត៌មានវីអូឌី នៅក្នុងសន្នីសិទសារព័ត៌មានមួយកាលពីថ្ងៃទី១៣មិថុនា ក្នុងខេត្តសៀមរាប ឯកអគ្គរដ្ឋទូតសហរដ្ឋអាមេរិក លោក William A. Heidt មានប្រសាសន៍ថា ការរាប់សន្លឹកឆ្នោតឡើងវិញរបស់គ.ជ.ប ដែលជាយន្តការដោះស្រាយបណ្តឹងរបស់បក្សនយោបាយ គឺជួយប្រជាជនកាន់តែមានទំនុកចិត្តខ្លាំងឡើង ចំពោះការបោះឆ្នោតនៅកម្ពុជា។
លោកមានប្រសាសន៍ថា៖ «តាមពិតបក្សនយោបាយ ដែលកំពុងជម្រុញឲ្យមានការរាប់សន្លឹកឆ្នោតឡើងវិញ គឺមិនមែនជារឿងដែលមិនល្អនោះទេ ហើយទង្វើទាំងនេះ គឺជួយឲ្យពលរដ្ឋខ្មែរកាន់តែមានទំនុកចិត្តខ្លាំងឡើងលើកការបោះឆ្នោត។ ហើយរឿងសំខាន់បំផុតសម្រាប់គ.ជ.ប គឺធ្វើការឲ្យល្អ ដូចពីពេលធ្វើកន្លងទៅ [ការបោះឆ្នោត២០១៧]…ដើម្បីបង្ហាញភាពជាក់លាក់ ការរៀបចំការបោះឆ្នោត គឺត្រូវធ្វើឲ្យល្អ ដូចការរាប់សន្លឹកឆ្នោតឡើងវិញអញ្ចឹង»។
ខណៈដែល គ.ជ.ប ចាស់ ត្រូវបានប្រជាជនភាគច្រើនដកសេចក្តីទុកចិត្តបន្ទាប់ពីការបោះឆ្នោតឆ្នាំ២០១៣ នោះគ.ជ.បថ្មី ដែលត្រូវបានធ្វើកំណែទម្រង់ទៅជាស្ថាប័នធម្មនុញ្ញ ហើយ សមាជិកនៃគណកម្មាធិការនេះ បានកើតចេញចំរុះពីគណបក្សនយោបាយ និងសង្គមស៊ីវិលមក ហាក់កំពុងធ្វើការទាញយកទំនុកចិត្តពីពលរដ្ឋឡើងវិញ។ ក្នុងនោះ ជោគជ័យដែល គ.ជ.ប ថ្មី ទទួលបាននោះ គឺទំនងជាការបោះឆ្នោតឆ្នាំ២០១៧ ដែលទទួលបានការសាទរពីស្ថាប័នជាតិ និងអន្តរជាតិជាច្រើន ដែលខុសពី គ.ជ.ប ចាស់។
មន្ដ្រីជាន់ខ្ពស់ផ្នែកអង្កេតរបស់អង្គការខុមហ្វ្រែលលោក កង សាវាង្ស មើលឃើញថា គ.ជ.ប បច្ចុប្បន្ននេះ កំពុងខំប្រឹងប្រែងធ្វើកិច្ចការខ្លួនដើម្បីកសាងឲ្យមានតម្លាភាព និងសេចក្តីទុកចិត្តពីពលរដ្ឋ និងគណបក្សនយោបាយ។ លោកបន្ថែមថា តាមរយៈយន្តការដែល គ.ជ.ប ថ្មីកំពុងតែអនុវត្តន៍នេះ បានធ្វើឲ្យមានការទុកចិត្តច្រើនពីជាតិ និងអន្តរជាតិ។
លោកថា៖ «អ្វីដែលយើងមើលឃើញ កន្លងមកយើងឃើញថា គ.ជ.បមានការខិតខំប្រឹងប្រែងហើយយើងឃើញថាប្រជាពលរដ្ឋ ក៏លោកខិតខំស្វែងយល់ដែរតាមរយៈ ការបង្ហាញរបស់គជប ហើយអាហ្នឹងក៏វាជាការបង្ហាញរបស់ គ.ជ.ប ដែរដែលការខិតខំប្រឹងប្រែងរបស់ខ្លួនហ្នឹងជាការខិតខំប្រឹងប្រែងឲ្យមានតម្លាភាពឲ្យមានភាពស្នើគ្នា យល់ព្រមសេចក្តីទុកចិត្តពីប្រជាពលរដ្ឋ ពីព្រោះកិច្ចការងារបោះឆ្នោតក៏ដោយ បើសិនជាប្រជាពលរដ្ឋក៏ដោយគណបក្សក៏មិនទុកចិត្ត យើងឃើញថាលទ្ធផលគឺមានបញ្ហាហើយដូចឆ្នាំ២០១៣ចឹងយើងឃើញថាពលរដ្ឋមានការចេញមកតវ៉ា ឃើញមានបញ្ហាបាត់ឈ្មោះឬចំណុចផ្សេងៗហ្នឹង អាហ្នឹងហើយដែលជាចំណុចមួយដែលហៅថាការបញ្ហាហ្នឹងវាអត់មានតម្លាភាពឲ្យបានល្អសម្រាប់ជាសេចក្តីទុកចិត្តរបស់ប្រជាពលរដ្ឋ»។
យោងតាមសេចក្ដីប្រកាសព័ត៌មានចេញផ្សាយនៅថ្ងៃពុធទី៧មិថុនា គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា ខ្លួនបានទទួលដោះស្រាយបណ្ដឹងចំនួន៧១ ក្នុងនោះ២៨បណ្ដឹង ដោយប្ដឹងសុំរាប់សន្លឹកឆ្នោតឡើងវិញ ចំណែក៤៣បណ្ដឹងទៀត ប្ដឹងសុំដាក់ពិន័យលើអ្នកប្រព្រឹត្ដបទល្មើសព្រហ្មទណ្ឌ ផ្ទុយនឹងច្បាប់បោះឆ្នោតឃុំសង្កាត់។
បើតាមសេចក្ដីប្រកាស ក្នុងចំណោមបណ្ដឹង២៨ ក្នុងនោះ១៨បណ្ដឹង ជារបស់គណបក្សប្រជាជន ដែលប្ដឹងសុំរាប់សន្លឹកឆ្នោតតាមការិយាល័យមួយចំនួន ដូចជា ក្នុងខេត្តបាត់ដំបង មាន១៧ការិយាល័យ ភ្នំពេញ មាន៩ការិយាល័យ និងកំពង់ធំ មាន៧ការិយាល័យ។ ចំណែក គណបក្សសង្គ្រោះជាតិ ក៏ប្ដឹងសុំរាប់សន្លឹកឆ្នោតឡើងវិញដែរ តាមការិយាល័យសរុបចំនួន១៦ ដូចជា ក្នុងខេត្តស្ទឹងត្រែង កោះកុង សៀមរាប តាកែវ និងរាជធានីភ្នំពេញ៕