ក្រុមហ៊ុន Honda Motor បាននិយាយកាលពីថ្ងៃម្សិលមិញថា ក្រុមហ៊ុននេះនឹងប្រមូលរថយន្ត ២លាន ១សែនគ្រឿង ត្រឡប់មកវិញ នៅទូទាំងពិភពលោក ដើម្បីផ្លាស់សេនស័រប្ដូរអាគុយ ដែលអាចបង្កជាអគ្គិភ័យ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
អ្នកនាំពាក្យក្រុមហ៊ុនផលិតរថយន្តជប៉ុនមួយនេះ បានឲ្យដឹងថា ការប្រមូលរថយន្តត្រឡប់មកវិញនេះ រួមមានរថយន្តម៉ាក Honda Accord ចំនួន ១លាន ១៥ម៉ឺនគ្រឿង ស៊េរីឆ្នាំ២០១៣ ដល់ឆ្នាំ២០១៦ នៅសហរដ្ឋអាមេរិក និងរថយន្តស៊េរីដដែលនេះជិត ១លានគ្រឿងទៀត នៅទីផ្សារដទៃទៀត ដើម្បីផ្លាស់ប្ដូរសេនស័រអាគុយ ១២វ៉ុល។
ក្រុមហ៊ុននេះនិយាយថា ខ្លួនបានទទួលសេចក្ដីរាយការណ៍អំពីបញ្ហាអគ្គិភ័យឆេះម៉ាស៊ីនរថយន្តចំនួន ៤ករណី នៅអាមេរិក និងមួយករណីទៀតនៅកាណាដា ប៉ុន្តែ ពុំបណ្ដាលឲ្យមនុស្សរងគ្រោះថ្នាក់នោះឡើយ។
ក្រុមហ៊ុនបន្ថែមថា រថយន្តជិត ៤ពាន់គ្រឿងទៀតដែលមានប័ណ្ណធានានៅអាមេរិក ក៏មានបញ្ហាបែបនេះផងដែរ៕