សហគមន៍អ៊ឺរ៉ុបទម្លាក់លុយជាង៥លានអ៊ឺរ៉ូដល់អង្គការសង្គមស៊ីវិលសម្រាប់រយៈពេលប្រាំឆ្នាំ ក្នុងកិច្ចការពារបរិស្ថានព្រៃឈើ និងលើកកម្ពស់ជីវភាពប្រជាពលដែលរស់នៅតាមប្រទេសដងទន្លេមេគង្គ។
ក្នុងសេចក្តីប្រកាសព័ត៌មាននៅថ្ងៃទី១៥មិថុនានេះ សហគមន៍អ៊ឺរ៉ុប បានឲ្យដឹងថា ខ្លួនសម្រេចផ្តល់ថវិកាចំនួន៥លានអ៊ឺរ៉ូដល់សង្គមស៊ីវិល និងសហគមន៍ព្រៃឈើសម្រាប់គម្រោង «សំឡេងព្រៃទន្លេមេគង្គ» ក្នុងការលើកកម្ពស់សមត្ថភាពរបស់អង្គការអង្គការទាំងនេះ ក្នុងការសហការគ្នាដើម្បីចូលរួមត្រួតពិនិត្យ និងធ្វើឲ្យខ្លាំងនូវការគ្រប់គ្រងរដ្ឋបាលព្រៃឈើ។
ឯកអគ្គរដ្ឋទូតសហគមន៍អ៊ឺរ៉ុបប្រចាំកម្ពុជាលោក ចច អ៊ឺហ្គើ (George Edgar) ត្រូវបានដកស្រង់ប្រសាសន៍ថា សង្គមស៊ីវិលមានភាពចាំបាច់ជាខ្លាំងដែលមានឥទ្ធិពល និងទ្រទ្រង់រដ្ឋបាលព្រៃឈើ ហើយវាសំខាន់ ក្នុងការធ្វើឲ្យប្រាកដពីការទ្រទ្រង់ការរស់នៅ សម្រាប់សហគមន៍ជនបទ ដែលរស់នៅជិតព្រៃឈើ។ លោកបន្ថែមថា ការផ្តល់ចំណេះដឹងពីព្រៃឈើ សម្រាបសហគមន៍ក្នុងការគ្រប់គ្រងដំណើរការព្រៃឈើ គឺវាចាំបាច់សម្រាប់ការទ្រទ្រង់ និងអភិរក្សព្រៃឈើ។
បើតាមសេចក្តីប្រកាសព័ត៌មាននោះ តំបន់ទន្លេមេគង្គជាតំបន់ដែលមានប្រជាជនជាង៨៥លាននាក់ ដែលមានមនុស្សជាង៣០% នៃតំបន់នេះរស់នៅក្នុងភាពក្រីក្រ ព្រៃឈើបាត់បង់ជិត៥% ចន្លោះពីឆ្នាំ១៩៩០ ដល់ឆ្នាំ២០១៥ ហើយសហគមន៍ព្រៃឈើនៅតាមដងទន្លេមេគង្គប្រឈមនិងគ្រោះថ្នាក់ជាច្រើន ក្នុងការទាញយកផលប្រយោជន៍ព្រៃឈើដើម្បីរស់នៅ។
ខណៈពេលដែលបញ្ហាទាំងនេះកំពុងត្រូវបានដោះស្រាយ ការគ្រប់គ្រងព្រៃឈើគឺនៅតែជាចំណុចប្រឈមនៅក្នុងតំបន់នេះ ដែលអ្វីទាំងនេះវាទាមទារឲ្យមានការចូលរួម និងមានការគាំទ្រខ្លាំងពីរដ្ឋាភិបាល សង្គមស៊ីវិលដើម្បីដោះស្រាយធ្វើបញ្ហាទាំងនេះ៕