ក្រសួងព័ត៌មានបានស្នើទៅកាន់ក្រសួងការបរទេសឲ្យជួយអន្តរាគមន៍ទៅកាន់វិទ្យុអាស៊ីសេរី តាមរយៈស្ថានទូតអាមេរិកប្រចាំនៅកម្ពុជា ឲ្យវិទ្យុមួយនេះ កែតម្រូវអត្ថបទរបស់ខ្លួនដែលបានចុះផ្សាយជុំវិញបញ្ហាជម្លោះដីធ្លីនៅខេត្តក្រចេះកាលពីសប្ដាហ៍មុន។
ក្រសួងព័ត៌មានបានចេញលិខិតមួយចុះថ្ងៃទី១៥ ខែ មីនា ផ្ញើទៅកាន់រដ្ឋមន្រ្តីក្រសួងការបរទេស ដោយលើកឡើងថា កាលពីថ្ងៃទី០៨ ខែមីនា វិទ្យុអាស៊ីសេរី បានផ្សាយព័ត៌មានមិនពិតថា មានពលរដ្ឋ ៦នាក់ ត្រូវបានសម្លាប់ និង ៤០នាក់ទៀតរងរបួសក្នុងហេតុការណ៍ប្រឈមមុខដាក់គ្នាដោយហិង្សារវាងអ្នកភូមិ និងសមត្ថកិច្ចចម្រុះ ជុំវិញជម្លោះដីធ្លីនៅស្រុកស្នួល ខេត្តក្រចេះ។
ក្នុងលិខិតនោះ ក្រសួងព័ត៌មានបានបន្តថា តាមចម្លើយរបស់សាក្សីឈ្មោះ គិន សុភ័ក្រ ដែលធ្វើបទសម្ភាសជាមួយវិទ្យុអាស៊ីសេរី បានសារភាពប្រាប់ព្រះរាជអាជ្ញាខេត្តក្រចេះថា មុនពេលមានហិង្សាកើតឡើងរវាងអាជ្ញាធរជាមួយពលរដ្ឋ មានអ្នកយកព័ត៌មានអាស៊ីសេរីម្នាក់ឈ្មោះ អេង បានដើរបំផុសបំផុល ញុះញង់ឲ្យពលរដ្ឋតស៊ូប្រឆាំងនឹងអាជ្ញាធរ មិនទទួលយកដំណោះស្រាយរហូតឈានដល់ផ្ទុះហិង្សា។
ក្នុងលិខិតដដែល ក្រសួងព័ត៌មានបន្តថា ក្រោយផ្ទុះហិង្សា ក្រុមអ្នកយកព័ត៌មានអាស៊ីសេរី ប្រាប់អ្នកស្រី គិន សុភ័ក្រ ទទួលទូរស័ព្ទសម្ភាសជាមួយអាស៊ីសេរី ដោយបង្គាប់ឲ្យរាយការណ៍ថា មានមនុស្ស ៦នាក់ស្លាប់ និងរងរបួស ៤០នាក់ នៅក្នុងការប៉ះទង្គិចនោះ។
ជាមួយគ្នានោះ ក្រសួងព័ត៌មានក៏លើកឡើងដែរថា អំពើហិង្សាជុំវិញទំនាស់ដីធ្លីនេះ គឺជាផែនការរបស់វិទ្យុអាស៊ីសេរី ដែលបានឃុបឃិតជាមួយបក្សប្រឆាំង រៀបចំឡើងជាបន្តបន្ទាប់ បំផុសបំផុលឲ្យពលរដ្ឋប្រឆាំងនឹងរដ្ឋាភិបាល និងអាជ្ញាធរមានសមត្ថកិច្ច បង្កឲ្យមានហិង្សា ដើម្បីទម្លាក់កំហុសប៉ុនប៉ងផ្តួលរលំរដ្ឋាភិបាល។
ក្នុងលិខិតដដែលនោះក្រសួងព័ត៌មានក៏បានលើកឡើងដែរថា វិទ្យុអាស៊ីសេរី ផ្សាយមិនពិត ដែលផ្សាយថា ជារឿងនយោបាយ ជុំវិញការចាប់ខ្លួនប្រធានបក្សប្រឆាំង លោក កឹម សុខា និងការរំលាយបក្សប្រឆាំង ការហាមធ្វើនយោបាយចំពោះមន្រ្តីបក្សប្រឆាំង ១១៨រូប ដោយចោទថាជាប់ពាក់ព័ន្ធនឹងទោសក្បត់ជាតិ ឃុបឃិតជាមួយបរទេសប៉ុនប៉ង ធ្វើបដិវត្តពណ៌ផ្តួលរលំរដ្ឋាភិបាល៕