ខណៈការបោះឆ្នោតជ្រើសរើសក្រុមប្រឹក្សាឃុំសង្កាត់កាន់តែជិតមកដល់ អតីតមេដឹកនាំបក្សប្រឆាំង លោក សម រង្ស៊ី ដែលកំពុងនិរទេសខ្លួន បានបន្តលើកឡើងបែបឌឺដងឲ្យគូប្រកួត គឺគណបក្សប្រជាជនថា បក្សកាន់អំណាចនេះ «ចំណុះឲ្យយួន»។
លោក សម រង្ស៊ី ដែលបានប្រកាសលាលែងតំណែងពីប្រធានគណបក្សសង្គ្រោះជាតិ ក្រោយពីបក្សកាន់អំណាចកែច្បាប់គណបក្សនយោបាយ ផាត់លោកចេញពីឆាកនយោបាយនោះ បានសរសេរលើបណ្តាញសង្គមរបស់លោកថា៖ «ថ្ងៃ១៧មេសា២០១៧ នេះគឺជាខួបទី៤២ នៃថ្ងៃឡើងកាន់អំណាច របស់ពួកខ្មែរក្រហម ដឹកនាំដោយ ប៉ុល ពត កាលពីឆ្នាំ១៩៧៥ ដែលជាថ្ងៃចាប់ផ្តើមការសម្លាប់រង្គាលមកលើប្រជារាស្ត្រខ្មែរ។ក្រោយពីរបបខ្មែរក្រហមដឹកនាំដោយ ប៉ុល ពត (កុម្មុយនីស្តចំណុះចិន) បានដួលរលំ នៅឆ្នាំ១៩៧៩ របបថ្មីដែលមកជំនួសដឹកនាំដោយ ហេង សំរិន (កុម្មុយនីស្តចំណុះយួន)»។
លោក សម រង្ស៊ី អះអាងទៀតថា របបទាំងពីរនេះ កើតចេញមកពីប្រភពកុម្មុយនីស្តតែមួយក្នុងឆ្នាំ១៩៥១។
ទោះជាលោក សម រង្ស៊ី មិនបានបញ្ជាក់ថា នៅឆ្នាំ១៩៥១មានព្រឹត្តិការណ៍អ្វីកើតឡើង ក៏ប៉ុន្តែកន្លងទៅ អ្នកនយោបាយខ្លះធ្លាប់លើកឡើងថា ឈ្មោះគណបក្សប្រជាជន ត្រូវបានបក្សកុម្មុយនីស្តវៀតណាម បង្កើតឡើងតាំងពីឆ្នាំ១៩៥១។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានច្រានចោកការលើកឡើងនេះ ដោយចាត់ទុកថា ការលើកឡើងរបស់លោក សម រង្ស៊ី ថាជាការកេងចំណេញនយោបាយ ប្រាសចាកពីការពិត និងបានវាយបកធ្ងន់ៗវិញ ដូចនេះថា៖ «សម រង្ស៊ី មិនធ្លាប់ឆ្លងកាត់របបប្រល័យពូជសាសន៍ ប៉ុល ពត ទេ។ អញ្ចឹង សម រង្ស៊ី ភ្លឺទាំងស្រុងហ្មង ព្រោះ សម រង្ស៊ី គ្មានស្គាល់ការលំបាកអីបន្តិច។ ពេលថ្ងៃ១៧មេសាម្តងៗ គាត់ធ្វើពិធីបង្សុកូលរំឭកវិញ្ញាណក្ខន្ធអី [អានេះ] យកចំណេញនយោបាយ ។អញ្ចឹងសុំផ្តាំផ្ញើប៉ុណ្ណឹង សម រង្ស៊ី មិនដឹងក្បាលកន្ទុយស្អីទេ»។
ដោយឡែក សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណារ៉ា បានអះអាងថា អ្វីដែលលោក សម រង្ស៊ី លើកឡើង លោកថាជាការពិតនៃប្រវត្តិសាស្ត្រ ដែលបានកើតឡើងកន្លងទៅពិតមែន។
លោកថា៖ «រឿងព្រឹត្តិការណ៍ប្រវត្តិសាស្ត្រជារឿងត្រឹមត្រូវ ដែលគាត់លើកឡើងជារឿងត្រឹមត្រូវ ព្រោះបក្សកុម្មុយនីស្តឥណ្ឌូចិនហ្នឹងកើតឡើង [នៅឆ្នាំ] ៥១ ហ្នឹងហើយ ដែលបែកទៅជាក្រុមខ្មែរក្រហម ហើយក្រោយមកមានបែកទៅជាចលនាតស៊ូវៀតណាម។ អាហ្នឹង គឺយល់ព្រឹត្តិការណ៍៧៨មក។ […] ប៉ុន្តែរឿងមួយទៀតដែលគាត់លើកឡើងជិតបោះឆ្នោតហ្នឹង គឺគាត់ចង់បញ្ជាក់ថា អ្នកកាន់អំណាចបច្ចុប្បន្នហ្នឹងកើតចេញពីរបបកុម្មុយនីស្ត។ អញ្ចឹងទេ របបប្រជាធិបតេយ្យឲ្យប្រជាពលរដ្ឋជាម្ចាស់ឆ្នោតហ្នឹងពិចារណា គិតរកអ្នកដឹកនាំបែបប្រជាធិបតេយ្យ»។
លោកថា សាររបស់លោកសម រង្ស៊ី អាចទាក់ទាញសំឡេងគាំទ្របានច្រើន ដោយថា សារនោះអាចឲ្យពលរដ្ឋដឹងថា គណបក្សណាដែលកើតចេញពីរបបកុម្មុយនីស្ត និងគណបក្សណាដែលកើតចេញពីរបបប្រជាធិបតេយ្យ។
បើតាមលលោក ឯម សុវណ្ណារ៉ា អ្នកនយោបាយណាក៏ដោយ ទាំងគណបក្សបក្សកាន់អំណាច ទាំងបក្សប្រឆាំង លោកថា ពួកគេតែងតែប្រើគ្រប់មធ្យោបាយ នូវអ្វីដែលពួកគេអាចធ្វើទៅបាន ដើម្បីទាក់ទាញប្រជាប្រិយភាព ឆ្ពោះទៅរកការឈ្នះការបោះឆ្នោត ក្នុងប្រទេសដែលប្រកាន់លទ្ធិប្រជាធិបតេយ្យ៕
