មេដឹកនាំបក្សកាន់អំណាច លោក ហ៊ុន សែន និងអតីតមេដឹកនាំបក្សប្រឆាំង លោក សម រង្ស៊ី នៅតែបង្ហាញសារនយោបាយមិនស៊ីសង្វាក់គ្នា ទាក់ទិនទៅនឹងជម្លោះនយោបាយបច្ចុប្បន្ន បើទោះបីការបោះឆ្នោតជាតិ នៅសល់តែជាង ២ខែទៀតប៉ុណ្ណោះ។
បើគ្មានអ្វីប្រែប្រួលទេ រដ្ឋាភិបាលនឹងរៀបចំការបោះឆ្នោតជ្រើសតាំងតំណាងរាស្ត្រអាណត្តិទី៦នេះ នៅថ្ងៃទី២៩ខែកក្កដាឆ្នាំ២០១៨ ប៉ុន្តែ រហូតមកដល់ពេលនេះ គណបក្សសង្គ្រោះជាតិ ដែលត្រូវបានតុលាការកំពូលសម្រេចរំលាយចោលនោះ នៅតែមិនទាន់ត្រូវបានអនុញ្ញាតឲ្យវិលត្រឡប់មកប្រកួតប្រជែងជាមួយគណបក្សប្រជាជនកម្ពុជានៅឡើយទេ។
ខណៈដែលជម្លោះនយោបាយនៅជាប់គាំងដដែលនោះ លោកនាយករដ្ឋមន្ត្រី ហ៊ុន សែន ដែលជាមេដឹកនាំបក្សកាន់អំណាចផងនោះ បានបង្ហោះរូបថតរបស់លោកកាលនៅពីក្មេង មានក្រវ៉ាត់កាំភ្លើងខ្លីជាប់នឹងចង្កេះ និងបានសរសេរថា ថ្ងៃទី១៦មេសា ២០១៨នេះ ជាខួបលើកទី៤៣ឆ្នាំនៃការធ្លាក់ខ្លួនពិការភ្នែក។លោកថា របួសនេះ ជារបួសលោកទី៥ នៃការប្រយុទ្ធក្នុងសមរភូមិចំនួន១០៥លើករបស់លោក។
លោករំឭកថា៖ «ខ្ញុំនៅចាំបានថា ម៉ោង ៦ និង១៥នាទីព្រឹកថ្ងៃ១៦ មេសា១៩៧៥ មានការប្រយុទ្ឋស្លាប់រស់នៅសមរភូមិប៉មទន្លេបិទដែលពេលនេះក្បែគល់ស្ពានគីហ្សូណា។ ពេលនោះហើយដែលខ្ញុំត្រូវរបួសជាលើកទី៥ នៃការប្រយុទ្ឋ១០៥លើកក្នុងរយៈពេល ៥ឆ្នាំនៃការប្រយុទ្ឋជាមួយពួកបរទេសឈ្លានពាន និងបរិវារ»។
លោក ហ៊ុន សែន រំឭកទៀតថា យុវជនជំនាន់មុន បានក្លាយជាចំណាប់ខ្មាំងនៃសង្រ្គាម គ្មានសិទ្ឋិជ្រើសរើសដូចយុវជនសម័យសន្តិភាពនេះឡើយ ហើយលោកក៏អំពាវនាវផងដែរឲ្យរួមគ្នារក្សាសន្តិភាព និងទប់ស្កាត់កុំឲ្យសង្រ្គាមកើតឡើងវិញ ទោះបីត្រូវបង់ថ្លៃប៉ុណ្ណាក៏ដោយ។
សាររបស់មេដឹកនាំបក្សកាន់អំណាចនេះ ចំពេលដែលបណ្តាប្រទេសជាច្រើននៃប្រទេសលោកសេរី កំពុងព្រួតគ្នាថ្កោលទោស និងគំរាមដាក់ទណ្ឌកម្មសេដ្ឋកិច្ច បើរដ្ឋាភិបាលមិនបើកលំហប្រជាធិបតេយ្យឡើងវិញ តាមរយៈបើកផ្លូវឲ្យគណបក្សប្រឆាំង ដែលមានអ្នកគាំទ្រជិតពាក់កណ្តាលប្រទេស បានចូលរួមប្រកួតការបោះឆ្នោតឡើងវិញ ។
លោក សម រង្ស៊ី ដែលកំពុងនិរទេសខ្លួនឯងនោះ បានលើកឡើងតាមវីដេអូឃ្លីបបង្ហោះលើបណ្តាញសង្គមអំឡុងជួបសំណេះសំណាលជាមួយអ្នកគាំទ្រ នៅប្រទេសជប៉ុន កាលពីថ្ងៃម្សិលមិញថា សហគមន៍អន្តរជាតិកំពុងដាក់សម្ពាធ ឲ្យរបបលោក ហ៊ុន សែន ស្តារប្រជាធិបតេយ្យឡើងវិញ តាមរយៈការដោះលែងលោក កឹម សុខា និងឲ្យគណបក្សសង្គ្រោះជាតិ បានចូលរួមបោះឆ្នោតឡើងវិញ ដោយគ្មានការគំរាមកំហែង ។
លោក សម រង្ស៊ី ថ្លែងទៀតថា បើលោក ហ៊ុន សែន មិនទទួលយកមតិយោបល់ពីប្រទេសលោកសេរី ហើយអាងតែមហាអំណាចចិនតែម្នាក់ លោកថា របបដឹកនាំនេះ នឹងជាន់ដានរបប ប៉ុល ពត ។
លោកថា៖ «កាល ប៉ុល ពត ៗ ខ្មែរក្រហម ធ្វើបាបរាស្ត្រខ្មែរណាស់ គេថ្កោលទោស ប៉ុល ពត ប៉ុន្តែ ប៉ុល ពត ថា អត់ខ្វល់ព្រោះមានចិនជួយ។ ឥឡូវ ហ៊ុន សែន ដូចគ្នាអញ្ចឹង។ ហ៊ុន សែន ធ្វើបាបរាស្ត្រខ្មែរតាមចិត្ត។ គេថ្កោលទោសគ្រប់ទិសទី ហ៊ុន សែន ថា អត់ខ្វល់ ព្រោះមានចិន ហ្នែ! គ្រោះថ្នាក់ធំណាស់។ ពឹងចិន ចុះខ្មែរងាប់ប៉ុន្មានលាននាក់ យើងវេទនាដល់ណា ឥឡូវ ហ៊ុន សែន ដើរតាមគន្លង ប៉ុល ពត ហើយរាស្ត្រខ្មែរក៏អត់សុខចិត្ត អន្តរជាតិក៏អត់សុខចិត្តដែរ»។
អ្នកវិភាគវ័យក្មេងលោក ហង្ស វិទូ លើកឡើងកាលពីសប្តាហ៍មុនថា អ្នកនយោបាយខ្មែរគួរប្រើពេលវេលាបង្កើតវប្បធម៌ជជែកទល់មុខគ្នា ឈានទៅផ្សះផ្សាជាតិឡើងវិញ ជាជាងប្រើកម្លាំងបាយកម្ទេចខ្មែរគ្នាឯង ដើម្បីបន្តគ្រប់គ្រងអំណាច ហើយបណ្តោយឲ្យប្រទេសជាតិ ធ្លាក់ក្នុងវិបត្តិហំព័ទ្ធសេដ្ឋកិច្ច ពីសហគមន៍អន្តរជាតិ ។
លោក ហង្ស វិទូ រំឭកទៀតថា អ្នកនយោបាយ គួរចេះរកច្រកចេញដោយខ្លួនឯង រៀបចំការបោះឆ្នោតមួយ ឲ្យដំណើការទៅតាមយន្តការប្រជាធិបតេយ្យ ដើម្បីឲ្យប្រាកដថា អ្នកចាញ់ៗ ដោយអស់ចិត្ត រីឯអ្នកឈ្នះៗដោយកិត្តិយស។
លោកថា៖ «ប្រសិនបើគាត់ព្យាយាមឈ្លោះគ្នា ហើយមិនព្រមសម្បទានឲ្យគ្នាទៅវិញទៅមកទេ ខ្ញុំយល់ថា វាអត់អាចទៅរួចទេ ពីព្រោះខ្ញុំយល់ថា ការងារនេះវាមិនចាំតែគេមកប្រាប់យើងទេ ខ្មែរយើងដឹងច្បាស់ជាងគេទៀត។ អញ្ចឹង មានន័យថា គណបក្សទាំងពីរគ្មានអ្វីក្រៅពីគាត់សម្របសម្រួលគ្នាទេ»។
របត់នយោបាយនៅកម្ពុជានេះ ជំរុញឲ្យសមាជិកក្រុមប្រឹក្សាសិទ្ធិមនុស្សរបស់អង្គការសហប្រជាជាតិចំនួន៤៥ ប្រទេស ក្នុងចំណោម ៤៧កាលពីថ្ងៃទី២១ខែមិនា បានជំរុញឲ្យរដ្ឋាភិបាលកម្ពុជា ប្រញាប់ចាត់វិធានការនានា បញ្ឈប់ការធ្វើទុក្ខបុកម្នេញលើគណបក្សប្រឆាំង និងអង្គការសង្គមស៊ីវិល ដើម្បីកសាងលទ្ធិប្រជាធិបតេយ្យឡើងវិញ ក្រោយពីគណបក្សប្រឆាំងដ៏ធំមួយត្រូវបានរំលាយ។
ជាងនេះទៅទៀត រដ្ឋមន្ត្រីការទូតជប៉ុន លោក តារ៉ូ កូណូ ក្នុងពិធីចុះហត្ថលេខាលើកិច្ចព្រមព្រៀងផ្ដល់ជំនួយឥតសំណង និងកម្ចីហិរញ្ញប្បទានសរុបជាង ៩០លានដុល្លារ កាលពីថ្ងៃទី៨ ខែមេសានោះ បានជំរុញមេដឹកនាំកម្ពុជាម្តងទៀត ឲ្យរៀបចំការបោះឆ្នោតដោយសេរីត្រឹមត្រូវនាពេលខាងមុខនេះ និងបានរំឭកថា ការបោះឆ្នោតនាពេលខាងមុខ គួរតែឆ្លុះបញ្ចាំងឲ្យត្រឹមត្រូវពីឆន្ទៈរបស់ប្រជាពលរដ្ឋ៕