រដ្ឋមន្ត្រីការបរទេសអូស្ត្រាលី អ្នកស្រី Julie Bishop បានថ្លែងកាលពីថ្ងៃម្សិលមិញថា ជនដៃដល់ដែលបានបាញ់ទម្លាក់យន្តហោះម៉ាឡេស៊ី MH17 កាលពីឆ្នាំ២០១៤នោះ អាចត្រូវបានគេកាត់ទោសដោយកំបាំងមុខ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
យន្តហោះ MH17 របស់ក្រុមហ៊ុនអាកាសចរណ៍ម៉ាឡេស៊ី ត្រូវបានបាញ់ទម្លាក់នៅភាគខាងកើតប្រទេសអ៊ុយក្រែន កាលពីថ្ងៃទី១៧ ខែកក្កដា ឆ្នាំ២០១៤ ដោយបានសម្លាប់មនុស្សទាំង ២៩៨នាក់នៅលើយន្តហោះនោះ ដែលអ្នកដំណើរភាគច្រើនជាជនជាតិហូឡង់ និងមនុស្សមកពីបណ្ដាប្រទេស ១៧ផ្សេងទៀត ក្នុងនោះមានទាំងជនជាតិអូស្ត្រាលី ៣៨នាក់ផងដែរ។
Reuters បានឲ្យដឹងថា ក្រុមប្រឹក្សាសុវត្ថិភាពបានសន្និដ្ឋានថា យន្តហោះប្រភេទ Boeing 777 នោះ ត្រូវបានបាញ់ទម្លាក់ដោយគ្រាប់មីស៊ីលផលិតនៅក្នុងប្រទេសរុស្ស៊ី នៅភាគខាងកើតប្រទេសអ៊ុយក្រែន ដែលកាន់កាប់ដោយពួកផ្ដាច់ខ្លួនគាំទ្រប្រទេសរុស្ស៊ី។
កាលពីខែមិថុនាកន្លងមក ប្រទេសហូឡង់បាននិយាយថា ជនសង្ស័យនៅក្នុងករណីនេះ នឹងត្រូវនាំទៅកាត់ទោសនៅក្នុងតុលាការហូឡង់ និងក្រោមច្បាប់ហូឡង់។
អ្នកស្រី Julie Bishop បាននិយាយថា ដំណើរផ្លូវច្បាប់គ្រប់ប្រភេទ កំពុងត្រូវបានព្យាយាមធ្វើ និងជំរុញទៅរុស្ស៊ី ឲ្យអនុវត្តទៅតាមសេចក្ដីសម្រេចរបស់ក្រុមប្រឹក្សាសន្តិសុខអង្កការសហប្រជាជាតិ ដែលស្នើឡើងដោយប្រទេសអូស្ត្រាលី។
អ្នកស្រីបន្តថា នេះមានន័យថា ជាការអំពាវនាវទៅរដ្ឋទាំងអស់ឲ្យសហការគ្នាដើម្បីធានាថា អ្នកទាំងឡាយដែលទទួលខុសត្រូវចំពោះការសម្លាប់មនុស្ស ត្រូវបាននាំទៅកាត់ទោស៕
