អន្តរជាតិ

កាណាដាកំពុងប្រយុទ្ធនឹងភ្លើងឆេះព្រៃ បង្ខំមនុស្សរាប់ពាន់នាក់ចាកចេញ

លោក ឌិត សុខធី
| ១៧ កក្កដា ២០១៧
ម៉ោង ១៧:១២

មនុស្សរាប់ពាន់នាក់ បានភៀសខ្លួនចេញពីផ្ទះសម្បែងរបស់ពួកគេនៅភាគខាងលិចប្រទេសកាណាដា នៅចុងសប្ដាហ៍កន្លងមកនេះ ខណៈដែលខ្យល់បោកបក់ខ្លាំងបង្កឲ្យមានភ្លើងឆេះព្រៃកាន់តែធំធេងនៅក្នុងខេត្តប៊្រីធីស កូឡុំប៊ី អស់រយៈពេលជាង ១សប្ដាហ៍មកហើយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។

AFP បន្តថា ភ្លើងឆេះព្រៃនោះ បានជំរុញឲ្យអាជ្ញាធរចាត់វិធានការអាសន្នថ្មី ដោយបញ្ជាឲ្យជម្លៀសមនុស្ស ២ម៉ឺន ៤ពាន់នាក់ នៅក្នុងតំបន់ ក្នុងនោះមានទាំងទីក្រុង Williams Lake ផងដែរ ដែលមានប្រជាជនប្រហែល ១១០០០នាក់។

ពលរដ្ឋប្រហែល ៦០ភាគរយ ដែលរស់នៅតំបន់រងភ្លើងឆេះព្រៃនោះ ត្រូវបានទូរទស្សន៍កាណាដា CBC ផ្សាយថា បានចាកចេញពីផ្ទះសម្បែងរបស់ពួកគេរួចរាល់ហើយ។

អាជ្ញាធរខេត្តនេះ បាននិយាយកាលពីថ្ងៃម្សិលមិញថា មនុស្សចន្លោះពី ៣៦០០០ ទៅ ៣៧០០០នាក់ ត្រូវបានបង្ខំឲ្យចាកចេញពីផ្ទះរបស់ពួកគេ ចាប់តាំងពីកើតមានភ្លើងឆេះព្រៃដោយសាររដូវក្ដៅ កាលពីថ្ងៃទី៧ ខែកក្កដានេះ។

អាជ្ញាធរតំបន់នោះ បាននិយាយថា ភ្លើងបានឆេះព្រៃ ១៦២កន្លែងគិតត្រឹមថ្ងៃនេះ ក្នុងនោះ ១៥កន្លែងបានបង្កការគំរាមកំហែងដល់តំបន់អ្នកស្រុករស់នៅ។ ក្រុមអ្នកពន្លត់អគ្គិភ័យប្រហែល ៣ពាន់នាក់ កំពុងតែព្យាយាមពន្លត់ភ្លើង៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។