អ្នកប្រើប្រាស់បណ្តាញសង្គមមួយចំនួនបានចែករំលែក វីដេអូ និងសសេរសារ រិះគន់សមត្ថកិច្ចជុំវិញ ឃាតកម្មតារាស្រី សាន ស្រីឡៃ និងឃាតកម្មអ្នកវិភាគបញ្ហាសង្គមដ៏ល្បីលោក កែម ឡី ដោយថា វីដេអូឃាតកម្មលើអ្នកវិភាគរូបនោះហាក់ស្ថិតនៅក្នុងស្ថានភាពអាថ៌កំបំាង។
ការរិះគន់នេះធ្វើឡើងបន្ទាប់ពីសមត្ថកិច្ចបញ្ចេញវីដេអូពាក់ព័ន្ធសកម្មភាព អតីតស្វាមីបាញ់សម្លាប់ តារាស្រី សាន ស្រីឡៃ កាលពីថ្ងៃទី១៦ខែតុលា នៅរាជធានីភ្នំពេញ ក្រោយពីបាញ់សម្លាប់ប្រហែលកន្លះម៉ោង ខណៈសំណុំរឿងឃាតកម្មលោក កែម ឡី នៅក្នុងស្តាម៉ាត ក្បែរស្តុបបូកគោ ជិតមួយឆ្នាំទើបសមត្ថកិច្ចបញ្ចេញវីដេអូបាញ់សម្លាប់នៅក្នុងសវនាការទំាងស្រពិចស្រពិល។
អ្នកប្រើប្រាស់បណ្តាញសង្គមហ្វេសប៊ុក ដែលបានបង្ហោះវីដេអូ ពាក់ព័ន្ធឃាតកម្ម សាន ស្រីឡៃ បៀបធៀបនិងឃាតកម្មលោក កែម ឡី ថា ឃាតកម្មតារាស្រីរូបនោះត្រូវសមត្ថកិច្ចបញ្ចេញវីដេអូបានយ៉ាង ឆាប់រហ័ស ខណៈសំណុំរឿងឃាតកម្មលោក កែម ឡី សមត្ថកិច្ចបញ្ចេញវីដេអូ មិនទាន់ច្បាស់លាស់នៅឡើយ។
សារលើហ្វេសប៊ុកមួយចំនួនបានបង្ហាញសារក្រោយឃាតករបាញ់សម្លាប់ សាន ស្រីឡៃ មានខ្លឹមសារថា «ឃាតកម្ម សាន ស្រីឡៃ ក្រោយពីកើតហេតុការណ៍មិនបានកន្លះម៉ោងផង គេបង្ហាញវីដេអូពីកាមេរ៉ាសុវត្ថិភាព នៃសកម្មភាពបាញ់សម្លាប់យ៉ាងឆាប់រហ័ស ផ្ទុយស្រឡះពីឃាតកម្មលោកបណ្ឌិត កែម ឡី។ តើមកពីហេតុអ្វី?កាមេរ៉ាសុវត្ថិភាពនៅស្ដារម៉ាត កាលតិចមិនល្អឬយ៉ាងណា? ឬក៏អាជ្ញាធរដែលទៅអន្តរាគមន៍ឃាតកម្មនៅស្ដារម៉ាត អសមត្ថភាព និងគ្មានជំនាញ?»។
ដោយឡែក ក្នុងវីដេអូនិងរូបភាព ពាក់ព័ន្ធឃាតកម្មលើលោក កែម ឡី ដែលត្រូវបានអ្នកប្រើហ្វេសប៊ុក គូសជារង្វង់នៅត្រង់ស្បែកជើងរបស់ ជួប សំលាប់ ព្រមទំាងសសេរលើបណ្តាញសង្គមថា មានភាពខុសគ្នា នៅពេលធ្វើសកម្មភាពចូលបាញ់សម្លាប់លោក កែម ឡី ក្នុងស្តាម៉ាត និងរូបភាពសមត្ថកិច្ចចាប់បាន។
សារនោះមានខ្លឹមសារថា «ស្បែកជើងអាឃាតកពិតស្បែកជើងបាតពណ៌ស អាក្លែងក្លាយបាតពណ៌ខ្មៅ សម្ដែងភ្លាត់ស្នៀតខុសស្បែកជើង ទៅថតម្ដងទៀតទៅថតខុសហើយ រៀបចំអោយត្រូវហើយសមជាងហ្នឹងតិចទៅ អ្នកកាត់តនៅខ្សោយបន្តិច អ្នកដឹកនាំឆាកល្ខោនមិនបានល្អជាដើម»។
អ្នកនាំពាក្យក្រសួងមហាផ្ទៃលោក ខៀវ សុភ័គ មានប្រសាសន៍ថា សំណុំរឿងឃាតកម្មតារាស្រី សាន ស្រីឡៃ ត្រូវបានគេបង្ហាញវីដេអូភ្លាមៗក្រោយពីឃាតកម្មនោះ លោកមិនទាន់ទទួលរបាយការណ៍ជាក់លាក់នៅឡើយ ប៉ុន្តែលោកថា មានតម្រុយខ្លះហើយជុំវិញឃាតកម្មនោះ។
ចំណែក សំណុំរឿងលោក កែម ឡី លោក សុភ័គ អះអាងថា សមត្ថកិច្ចមិនបង្ហាញវីដេអូភ្លាមៗឲ្យសាធារណៈជនមើល ដោយសារ សំណុំរឿងនោះស្ថិតនៅដំណាក់កាលស៊ើបអង្កេត ខណៈជនល្មើសត្រូវបានចាប់ខ្លួនបានភ្លាមៗ ក្រោយពីឃាតកម្ម។
មន្ត្រីស៊ើបអង្កេតជាន់ខ្ពស់នៅសមាគមអាដហុកលោក សឹង សែនករុណា មានប្រសាសន៍ថា សមត្ថកិច្ចគួរតែបង្ហាញវីដេអូឃាតកម្មលើលោក កែម ឡី ឲ្យច្បាស់ជាងវីដេអូនៅក្នុងអង្គសវនាការកន្លងទៅ ដូចវីដេអូឃាតកម្មលើតារាស្រី សាន ស្រីឡៃ ដោយថាកុំឲ្យសាធារណៈជនមានមន្ទិលជុំវិញឃាតករដែលបាញ់សម្លាប់អ្នកវិភាគរូបនោះ។
លោក ករុណា យល់ថា បើសមត្ថកិច្ចមិនបង្ហាញវីដេអូឃាតកម្មលោក កែម ឡី ឲ្យសាធារណៈជនមើល ឲ្យច្បាស់ដូចវីដេអូតារា សាន ស្រីឡៃ ទេ លោកថានឹងធ្វើឲ្យសាធារណៈជនអស់ជំនឿលើអ្នកគ្រប់គ្រងរបស់ស្ថាប័នរដ្ឋ។
លោកមានប្រសាសន៍ថា «ពលរដ្ឋមានភាពមិនទុកចិត្តអំពីកិច្ចការរបស់ពួកគាត់[សមត្ថកិច្ច]ទំាងបច្ចេកទេសការងារ ទំាងការអនុវត្តច្បាប់កន្លងមក ដូចជារឿងអ្នកវិភាគសង្គម[កែម ឡី]ដែលលោកត្រូវបានឃាតកបាញ់សម្លាប់តំាងពីកើតហេតុមកដល់ពេលនេះ ជម្រះមន្ទិលសង្ស័យចំពោះរឿងហ្នឹង នៅតែមានក្នងសតិអារម្មណ៍ប្រជាពលរដ្ឋ អត់ទាន់មានរសាត់ទៅទីណាទេ ព្រោះរឿងហ្នឹងគឺគាត់បានតាមដានយ៉ាងយកចិត្តទុកដាក់គ្រប់ៗគ្នា»។
តារាចម្រៀង សាន ស្រីឡៃ ត្រូវបានអតីតស្វាមីបាញ់ចំនួន៣គ្រាន់ និងឃាតករបាញ់សម្លាប់ខ្លួនឯង បណ្តាលឲ្យស្លាប់ភ្លាមៗ កាលពីថ្ងៃទី១៦ ខែតុលា នៅហាងកែសម្ភស្ប៍មួយកន្លែង ក្បែរស្ថានីយ៍ទូរទស្សន៍អប្សរា ស្ថិតនៅសង្កាត់បឹងកេងកង១ ខណ្ឌចំការមន រាជធានីភ្នំពេញ។
ចំណែក លោក កែម ឡី អ្នកវិភាគបញ្ហាសង្គមដ៏ល្បី ត្រូវបានខ្មាន់កាំភ្លើងបាញ់សម្លាប់នៅស្ដារម៉ាត ក្បែរស្ដុបបូកគោ រាជធានីភ្នំពេញ កាលពីថ្ងៃទី១០ ខែកក្កដា ឆ្នាំ២០១៦។ ក្រោយហេតុការណ៍ អាជ្ញាធរបានចាប់ខ្លួនបុរសតែម្នាក់ឈ្មោះ «អឿត អាង» ហៅ «ជួប សំលាប់» ។
ជាញឹកញាប់ ជួប សំលាប់ តែងបានអះអាងថា ខ្លួនជាអ្នកសម្លាប់លោក កែម ឡី ហើយមិនមានអ្នកណាបញ្ជាឬនៅពីក្រោយនោះទេ។ កាលពីចុងខែមីនាឆ្នាំ២០១៧ លោក ជួប សំលាប់ ត្រូវបានសាលាដំបូងរាជធានីភ្នំពេញ កាត់ទោសដាក់ពន្ធនាគារអស់មួយជីវិត៕