រុស្ស៊ីបានសម្រេចបណ្ដេញមន្ត្រីការទូតអង់គ្លេស ២៣នាក់ចេញពីប្រទេសខ្លួន និងបានបិទស្ថានកុងស៊ុលរបស់អង់គ្លេសមួយ ដែលជាការឆ្លើយតបទៅនឹងអង់គ្លេស ដែលបានបណ្ដេញមន្ត្រីការទូតរុស្ស៊ីចេញពីប្រទេសខ្លួន នៅក្នុងជម្លោះបំពុលភ្នាក់ងារចារកម្ម ដែលបានជំរុញឲ្យមានជម្លោះការទូត។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
AFP បានចុះផ្សាយបន្តថា ក្រុងមូស្គូក៏បាននិយាយផងដែរថា ខ្លួននឹងផ្អាកសកម្មភាពរបស់ក្រុមប្រឹក្សាអង់គ្លេសនៅរុស្ស៊ី នៅក្នុងវិធានការសងសឹក បន្ទាប់ពីរុស្ស៊ីបានកោះហៅអគ្គរាជទូតអង់គ្លេស លោក Laurie Bristow។
នាយករដ្ឋមន្ត្រីអង់គ្លេស អ្នកស្រី ថេរ៉េសា ម៉េយ៍ បានឆ្លើយតបទៅនឹងសេចក្ដីសម្រេចនេះ បន្ទាប់ពីអង់គ្លេសសម្រេចបណ្ដេញអ្នកការទូតរុស្ស៊ី ២៣រូបចេញពីអង់គ្លេស និងការផ្អាកទំនាក់ទំនងកម្រិតខ្ពស់នៅដើមសប្ដាហ៍នេះ៕