កម្ពុជានិងរុស្ស៊ីចុះហត្ថលេខាលើការប្រើប្រាស់ថាមពលនុយក្លេអ៊ែរស៊ីវិល

លោកនាយករដ្ឋមន្រ្តី ហ៊ុន សែន និង​នាយក​រដ្ឋមន្ត្រីរុស្ស៊ី លោក ឌីមីទ្រី មេដវេដេវ (រូបថតពីហ្វេសប៊ុក​របស់​លោក ហ៊ុ​ន សែន)

រដ្ឋាភិបាលកម្ពុជានិងរុស្ស៊ីកាលពីថ្ងៃអង្គារបានចុះកិច្ចព្រមព្រៀងលើការប្រើប្រាស់ថាមពលនុយក្លេអ៊ែរស៊ីវិល ដោយលោកនាយករដ្ឋមន្ត្រី ហ៊ុន សែន អះអាងនៅចំពោះមុខសមភាគីរបស់ខ្លួនថាកម្ពុជានឹងមិនអនុញ្ញាតឲ្យមានការសាយភាយអាវុធនុយក្លេអ៊ែរនោះទេ។

នាយករដ្ឋមន្ត្រីកម្ពុជា លោក ហ៊ុន សែននិងនាយករដ្ឋមន្ត្រីរុស្ស៊ី លោក ឌីមីទ្រី មេដវេដេវ បានធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងទ្វេភាគីចំនួន៨ នៅទីក្រុងមូស្កូ សហព័ន្ធរុស្ស៊ី កាលពីថ្ងៃអង្គារ។ កិច្ចព្រមព្រៀងទាំងនោះមានដូចជាកិច្ចសហការលើបច្ចេកទេសយោធា អនុស្សរណៈយោគយល់លើប្រព័ន្ធទូរគមនាគមន៍និងប្រព័ន្ធផ្សព្វផ្សាយ អនុស្សរណៈយោគយល់ពីការបង្កើតមជ្ឈមណ្ឌលព័ត៌មានថាមពលនុយក្លេអ៊ែរនៅកម្ពុជានិងអនុស្សរណៈយោគយល់ស្តីពីការបង្កើតក្រុមការងារកម្ពុជា-រុស្ស៊ី ចំពោះកិច្ចសហការលើការប្រើប្រាស់ថាមពលនុយក្លេអ៊ែរស៊ីវិលជាដើម។

ក្រោយពីបញ្ចប់ពិធីចុះហត្ថលេខា លោក ឌីមីទ្រី មេដវេដេវ បានថ្លែងក្នុងសន្និសីទសារព័ត៌មានថាកិច្ចព្រមព្រៀងទាំងនេះនឹងចាប់អនុវត្តនៅឆ្នាំ២០២០។ លោកបន្តថារុស្ស៊ីមានការរំពឹងទុកខ្ពស់ចំពោះការអភិវឌ្ឍកិច្ចសហការក្នុងការកសាងរោងចក្រថាមពល បរិក្ខាថាមពលនិងឧបករណ៍លើកដាក់ទំនិញជាដើម។

លោកនាយករដ្ឋមន្ត្រី ហ៊ុន សែន ថ្លែងក្នុងឱកាសនោះដែរថាលោកមានការជឿជាក់ទៅលើរុស្ស៊ី ក្នុងនាមជាដៃគូក្នុងកិច្ចព្រមព្រៀងលើសន្តិសុខ កិច្ចការការពារនិងកិច្ចព្រមព្រៀងលើការប្រើប្រាស់ថាមពលនុយក្លេអ៊ែរស៊ីវិល។ លោកបន្ថែមថា៖ “កម្ពុជាជាប្រទេសដែលមានការទទួលខុសត្រូវ យើងមិនអនុញ្ញាតឲ្យមានការរីកសាយភាយអាវុធនុយក្លេអ៊ែរ។ យើងអាចធ្វើការរួមគ្នាដើម្បីសម្រួលដល់ការប្រើប្រាស់ថាមពលនុយក្លេអ៊ែរស៊ីវិល”

បើតាមការចុះផ្សាយរបស់ក្រុមហ៊ុននុយក្លេអ៊ែរRosatomរបស់រដ្ឋរុស្ស៊ីកាលពីម្សិលមិញ អនុស្សរណៈយោគយល់ពីការបង្កើតមជ្ឈមណ្ឌលព័ត៌មានថាមពលនុយក្លេអ៊ែរនៅកម្ពុជា មានគោលបំណងផ្តល់ចំណេះដឹងដល់ប្រជាពលរដ្ឋកម្ពុជាទាក់ទងនឹងថាមពលនុយក្លេអ៊ែរស៊ីវិល ចំពោះទស្សនៈវិស័យថាមពលនុយក្លេអ៊ែជាតិនិងការអភិវឌ្ឍឧស្សាហកម្មមួយនេះ។

ចំណែកឯអនុស្សរណៈយោគយល់ស្តីពីការបង្កើតក្រុមការងារកម្ពុជា-រុស្ស៊ីចំពោះកិច្ចសហការលើការប្រើប្រាស់ថាមពលនុក្លេអ៊ែរស៊ីវិល ក្រុមហ៊ុនរដ្ឋមួយនេះឲ្យដឹងថាវានឹងអាចបង្កើតឱកាសឲ្យអ្នកជំនាញរបស់ប្រទេសទាំងពីរជួបពិភាក្សាគ្នាជាទៀងទាត់ដើម្បីកំណត់និងអនុវត្តគម្រោងរួមគ្នាមួយនេះ។

គួរបញ្ជាក់ថា កាលពីខែវិច្ឆិកា ឆ្នាំ២០១៥ ក្នុងដំណើរទស្សនកិច្ចផ្លូវការរបស់លោក ឌីមីទ្រី មេដវេដេវ មកកម្ពុជា ប្រធានក្រុមហ៊ុននុយក្លែអែរRosatom របស់រដ្ឋរុស្ស៊ី គឺលោក Sergei Kirienko បានប្រាប់អ្នកសារព័ត៌មានថារុស្ស៊ីនឹងជួយសាងសង់រោងចក្រអគ្គិសនីដើរដោយថាពលនុយក្លេអ៊ែរនៅកម្ពុជា ហើយភាគីរុស្ស៊ីជាអ្នកផ្តល់នូវអ្នកជំនាញ ការស្រាវជ្រាវនិងវគ្គបណ្តុះបណ្តាលដល់មន្ត្រីកម្ពុជា។ នេះបើតាមការចុះផ្សាយរបស់សារព័ត៌មានReuters៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ