ទីតាំងទួលប្រាសាទបុរាណមួយ ស្ថិតនៅក្នុងខេត្តសៀមរាប ត្រូវបានគេអះអាងថា កំពុងត្រូវបានគេគាស់កកាយ ខណៈមន្ត្រីអាជ្ញាធរជាតិអប្សរា បានប្រាប់ថា ពុំបានដឹងករណីនេះនោះទេ។
ប្រធានគណៈកម្មការវត្តប្រាសាទត្រាំនាគ ស្ថិតក្នុងសង្កាត់ស្លក្រាម ខេត្តសៀមរាប លោក អោក សំអឿន បានប្រាប់វីអូឌីនៅថ្ងៃនេះថា ទួលប្រាសាទបុរាណមួយ ស្ថិតក្នុងវត្តប្រាសាទត្រាំនាគ ត្រូវបានគេគាស់កកាយ និងជីកដីកសាងគ្រឹះប្រាសាទថ្មីអស់រយៈពេល ១សប្ដាហ៍មកហើយ។ លោកបន្ថែមថា លោកមិនអាចហាមឃាត់សកម្មភាពជីកកកាយនោះទេ ប៉ុន្តែ លោកបានដាក់កម្លាំងដើម្បីការពារសម្បត្តិបេតិកភណ្ឌទាំងនោះ។
លោកបន្ដថា៖ “ផ្ទាំងថ្មចម្លាក់ទើបគាស់បានក្រោយនៅលើគ្រឹះមួយធំនៅលើនិងក្បាលនាគមួយហ្នឹងទេហើយនាគតូចៗពីរទើបគាស់បានពីព្រោះអាហ្នឹងខ្ញុំមានវិធានការដាក់គ្នាយាមជាប់ទាំងយប់ទាំងថ្ងៃក្រែងមានគេជីកដីប៉ះពាល់ដល់បេតិកភណ្ឌជាតិក្រែងលោកមានវត្ថុផ្សេងៗមាសប្រាក់ស្ដីកាលណាគេគាស់កកាយចឹងទៅមានរបស់របរអីត្រូវខ្ញុំដឹងខ្ញុំឮខ្ញុំយកទៅទុកដាក់ចឹងទៅ បើតាមអំណាទៅហាមឃាត់គេគ្មានទេអំណាចអី”។
បុរសម្នាក់ឈ្មោះ ម៉េង លី ដែលជាអ្នកមើលការខុសត្រូវលើការសាងសង់នៅទីនោះ ប្រាប់ថា គម្រោងសាងសង់ប្រាសាទថ្មីនៅទីនោះ ត្រូវបានរៀបចំឡើងដោយអ្នកស្រី ហ៊ុន សេងលី ដែលជាសាច់ញាតិរបស់លោកនាយករដ្ឋមន្ត្រី ហ៊ុន សែន ប៉ុន្តែ លោកបានជំរុញឲ្យសាកសួរព័ត៌មានលម្អិតទៅលោក រដ្ឋា បុរសម្នាក់ទៀតដែលទទួលខុសត្រូវលើគម្រោងសាងសង់នេះ។
លោកបន្ដថា៖ “ខ្ញុំមកឃើញតែឥដ្ឋបួនជ្រុង និងរូបដុំនាគហើយគេនាំគ្នាអុចធូបចឹងទៅ”។
បុរសម្នាក់ដែលប្រាប់ត្រឹមឈ្មោះថា រដ្ឋា បានឲ្យដឹងថា សំណង់ប្រាសាទថ្មីនៅលើទីទួលប្រាសាទបុរាណនេះ នឹងត្រូវបានគេដាក់ឈ្មោះថា “នាគរាជតេជោមរកត” ដោយលោកថា បានទទួលច្បាប់អនុញ្ញាតពីអាជ្ញាធរជាតិអប្សរា និងការឯកភាពពីព្រះចៅអធិការវត្តប្រាសាទត្រាំនាគ។
លោកបន្ដថា៖ “ដឹងតើអាហ្នឹងវាជាទួលប្រាសាទបុរាណ។ ពីមុនកសាងបុស្សបុកឈើពី ១៨ ឬ ១៩ឆ្នាំមុន។ ក្រោយមកចាស់ទ្រុឌទ្រោម យើងធ្វើថ្មីវិញប៉ុណ្ណឹង។ តាមសំណើខាងវត្ដក៏ដូចជាម្ចាស់មូលនិធិកសាងនៅលើទីតាំងវត្ដប្រាសាទត្រាំនាគ ប៉ុន្ដែ ក្រោយមកក៏ស្នើសុំដាក់ឈ្មោះថា ប្រាសាទនាគរាជតេជោមរកត។ អាហ្នឹងសំណើរសុំទៅអប្សរាប”។
នៅពេលទាក់ទងសុំការបកស្រាយជុំវិញករណីនេះ ព្រះចៅអធិការវត្តប្រាសាទត្រាំនាគ ព្រះតេជគុណ ស រ៉ា មានសង្ឃដីកាថា ការជីកគាស់កកាយនេះ មានការទទួលស្គាល់ពីអាជ្ញាធរជាតិអប្សរា ប៉ុន្តែ ព្រះអង្គថា កំពុងរត់ការច្បាប់បណ្ដើរៗ។
ព្រះអង្គមានសង្ឃដីកាថា៖ “ពាក្យថា បំផ្លាញយើងទៅកម្ទេចចោល។ ពាក្យដែលយើងកសាងយើង អត់មានចេតនាបំផ្លាញទេ យើងមានអារម្មណ៍មួយស្រលាញ់ជាតិរបស់យើង។ អប្សរាក៏បានដឹងឮដែរ ឥឡូវកំពុងរត់ការបណ្ដើរៗ”។
ទោះជាយ៉ាងណា អ្នកនាំពាក្យអាជ្ញាធរជាតិអប្សរា លោក ឡុង កុសល បានបដិសេធថា លោកមិនបានដឹងករណីនេះនោះទេ។
វីអូឌីមិនអាចទាក់ទងអ្នកស្រី ហ៊ុន សេងលី ដើម្បីឲ្យបកស្រាយអំពីគម្រោងសាងសង់នេះនៅឡើយទេរហូតមកដល់រសៀលថ្ងៃនេះ។
ប្រាសាទត្រាំនាគ ស្ថិតនៅលើទីទួលទំហំប្រហែល ៥០គុណនឹង ៧០ម៉ែត្រ ហើយចម្លាក់ប្រាសាទបែកបាក់មួយនេះ ត្រូវបានកសាងអំពីថ្មភក់។ ចម្លាក់ក្បាលនាគធ្វើអំពីថ្មភក់ ត្រូវបានគេរក្សាទុកក្នុងកុដិនៃវត្តប្រាសាទត្រាំនាគ៕