ក្រោយពីតុលាការកំពូល ប្រកាសរំលាយគណបក្សសង្គ្រោះជាតិ ជិត៣ខែរួមមក អតីតមេដឹកនាំបក្សប្រឆាំង ដែលកំពុងនិរទេសខ្លួននៅក្រៅប្រទេស លោកសម រង្ស៊ី បានប្រកាសបង្កើតចលនាមួយថ្មីមួយ ឈ្មោះថាចលនាសង្គ្រោះជាតិ។
ចលនានេះ លោក សម រង្ស៊ី ថាអាចជំរុញឲ្យបក្សកាន់អំណាច ដែលជាដៃគូដ៏មានឥទ្ធិពល របស់ខ្លួន ពិចារណាដោះលែងលោក កឹម សុខា និងបើកផ្លូវឲ្យគណបក្សខ្លួនដែលបានរំលាយទៅហើយនោះ មានឱកាសចូលរួមបោះឆ្នោតដោយសេរីឡើងវិញ តាមយន្តការប្រជាធិបេយ្យ។
ប៉ុន្តែអតីតតំណាងរាស្ត្រ និងអ្នកគាំទ្របក្សនេះ មួយចំនួនទាំងនៅក្នុងប្រទេស និងក្រៅប្រទេស បានរិះគន់ ផែនការយុទ្ធសាស្ត្រថ្មី របស់លោក សម រង្ស៊ី ដោយពួកគេថា ចលនាថ្មីនេះ នឹងជំរុញឲ្យបក្សកាន់ណាចបង្កើតវិធានការ ដាក់សម្ពាធកាន់តែខ្លាំង ដល់អតីតសកម្មជន និងលោក កឹម សុខា ដែលកំពុងឃុំខ្លួននៅក្នុងពន្ធនាគារ។
ជាងនេះទៅទៀតលោក សម រង្ស៊ី បានសរសេរនៅលើបណ្តាញសង្គម Twitter របស់លោកកាលពីថ្ងៃទី១៧ខែមករា បែបគំរាមថា ដើម្បីជៀសវាងអំពើហិង្សានិងកុំឲ្យកម្ពុជាក្លាយជារដ្ឋឯកោ រដ្ឋាភិបាលរបស់លោក ហ៊ុន សែន ត្រូវពន្យារពេលបោះឆ្នោតរហូតដល់ មានការធានាថា ដំណើរការបោះឆ្នោតមានការទទួលស្គាល់កម្រិតអប្បរមាពីស្តង់ដារអន្តរជាតិ។
លោកថា៖«ខ្ញុំសុំដាក់សំណើនេះទៅលោក ហ៊ុន សែន គឺត្រូវពន្យារពេលបោះឆ្នោតរហូតដល់ យើងមានការធានាថា ដំណើរការបោះឆ្នោតមានការទទួលស្គាល់កម្រិតអប្បរមាពីស្តង់ដារអន្តរជាតិ ដើម្បីជៀសវាងអំពើហិង្សា និងកុំឲ្យកម្ពុជាក្លាយជារដ្ឋឯកោ»។
តើការបង្កើតចលនាថ្មីនេះនឹងជំរុញឲ្យប្រឆាំងបែបបាក់ផ្ទៃក្នុងឬទេ? អ្នកវិភាគយល់ឃើញផ្សេងគ្នា ។
អ្នកវិភាគនយោបាយលោកបណ្ឌិត មាស នី និយាយថា បើគេពិនិត្យពីយន្តការប្រជាធិយបេយ្យ ការរិះគន់ និងការខ្វែងគំនិតគ្នា លោកថាមិនមែនជាដើមចមនាំឲ្យបែកបាក់។ប៉ុន្តែលោកវិភាគថា ដើមចមនៃការបែកបាក់គឺ ធ្វើឲ្យបញ្ហា ដែលគណបក្សនេះរកច្រកចេញមិនឃើញ គឺមិនចេះធ្វើការរួមគ្នា។
លោកថា៖ «អ្វីដែលខ្ញុំសម្លឹងមើលឃើញនេះ ទាំងក្រុមលោក កឹម សុខា ទាំងក្រុមលោក សម រង្ស៊ី នេះ ទំនងជាអ្នកខ្លះមានចរិតបុគ្គលនិយម គេហៅថាសម រង្ស៊ី និយម កឹម សុខានិយម ហើយបើកាលណាយើងមានចរិត បែបហ្នឹងច្រើនពេល ធ្វើឲ្យយើងរកផ្លូវសម្រួលសម្រាប់ជាតិអត់ឃើញទេ។ ព្រោះម្នាក់ៗនៅជាមួយលោក កឹម សុខា ចេះតែនឹកឃើញថា អ្វីដែលចេញពីលោក សម រង្ស៊ី មិនមែនជារបស់គ្នាអញទេ អញ្ចឹងអញមិនត្រូវគាំទ្រទេ។ ហើយរឿងរបស់លោក កឹម សុខា ក្រុមលោក សម រង្ស៊ី និយមហ្នឹងក៏មិនបាច់គាំទ្រទេ ព្រោះគំនិតហ្នឹងមិនមែនជាគំនិតក្រុមយើងទេ គំនិតក្រុមរបស់គេ។ហើយអាគំនិតបុគ្គលនិយមនេះ នៅគណបក្សប្រជាជនក៏មានដែរ មានដូចគ្នាអញ្ចឹង។ អញ្ចឹងបានថា យើងធ្វើការកត់សម្គាល់នៅក្នុងចរិតនយោបាយ របស់អ្នកដឹកនាំខ្មែរដែល ក្រៅពីបញ្ហាបក្សនិយមគេឃើញបញ្ហាមួយទៀតគឺបុគ្គលនិយម បានន័យថាពួកនិយម។ ពួក សម រង្ស៊ី ពួក កឹម សុខា ពួក ហ៊ុន សែន អីអញ្ចឹងទៅ។ ការធ្វើបែបនេះវារឹតតែធ្វើឲ្យការគិតគូអំពីរឿងជាតិហ្នឹង វារឹតតែមានការពិបាកហើយស្មុកស្មាញទៀត។ ទោះបីរឿងហ្នឹងគិតទៅត្រូវក៏ដោយ ក៏ប៉ុន្តែដោយសារគំនិតហ្នឹងចេញពីពួកមួយ ដែលមិនមែន ជាពួកខ្លួន គឺមិនគាំទ្រដោយសារតែរឿងហ្នឹងវាមិនមានប្រយោជន៍សម្រាប់ក្រុមខ្លួន។ អានេះខ្ញុំនិយាយជាទូទៅសម្រាប់អ្នកនយោបាយខ្មែរ»។
បើតាមលោក មាស នី បញ្ហានេះ អាចឈានទៅដល់ចំនុចបែកបាក់ បើពួកគេនៅតែប្រកាន់ខ្សែតឹងតែរៀងខ្លួន ហើយភ្លេចគិតពីចំនុចខ្លាំង និងចំនុចខ្សោយបានកើតឡើងកន្លងទៅ ។
លោកថា៖«ខ្ញុំគិតថាអ្វីដែលបានធ្វើឲ្យខ្ទរខ្ទៀ រហូតមកដល់ពេលនេះ ក៏ដោយសារតែ[អ្នក]ទាំងពីរហ្នឹងដែរ។ក៏ប៉ុន្តែកម្មភាពពីរនេះ បើ២ បូក ២ ធ្វើឲ្យបាន ១០ វាអត់អីទេ ប៉ុន្តែបើ២បូក២ទៅជាឲ្យមែក១ម្នាក់វិញ ឬបែកគ្នាវិញ ខ្ញុំគិតថាមិនមែនជាជំរើសឆ្លាតទេ សម្រាប់គណបក្សប្រឆាំង។ ហើយបើសិនជាអ្នកទាំងពីរដាក់បញ្ហាជាតិជាធំ កុំយកបញ្ហាជីវិតនយោបាយផ្កាប់មុខជាមួយបុគ្គលយកមកនិយាយខ្លាំងពេក ខ្ញុំគិតថាវានឹងអាចរកផ្លូវចេញឃើញ។ ហើយនៅក្នុងស្ថាប័នមួយដែលប្រកាន់លទ្ធិប្រជាធិបតេយ្យត្រូវការទុកពេលឲ្យមានការជជែកគ្នារកកណ្តាលហើយចាំធ្វើសេចក្តីប្រកាសអាហ្នឹងក៏ជារឿល្អដែរ កុំឲ្យថាចង់ធ្វើអីយើងប្រកាសភ្លាមទីចុងបំផុតយើងជាស្ថាប័នប្រជាធិបតេយ្យប៉ុន្តែបំពេញតួនាទីជាអំណាចប្រមូលផ្តុំដែរ មិនសូវបានពិគ្រោះយោបល់ អាហ្នឹងខ្ញុំធ្លាប់ឃើញពីមុនៗមកនៅក្នុងគណបក្សសង្គ្រោះជាតិ»។
អ្នកវិភាគនយោបាយជើងចាស់ លោក បណ្ឌិត ឡៅ ម៉ុងហៃ វិភាគថា ការបង្កើតចលនាថ្មី ដើម្បីធ្វើសកម្មភាព ស្មើនឹងទទួលស្គាល់ការរំលាយគណបក្សសង្គ្រោះជាតិ។លោកថាពេលនោះ សញ្ញាណបែកបាក់នឹងចូលមកដល់ តាមរយៈនៃភាពចម្រូងចម្រាសកាន់តែខ្លាំង រវាងអ្នកដែលមានស្វាមីភ័ក្ត្រទៅនឹងអតីតគណបក្សសង្គ្រោះជាតិ។
លោក ឡៅ ម៉ុងហៃ វិភាគទៀតថា បើចលនាថ្មីនេះ ឈានដល់ប្រើកម្លាំងមហាជន ដើម្បីជាកាត់ថ្លៃ ឬចង់ដាក់សម្ពាធដៃគូ ដូចការអះអាងមែននោះ លោកថាវិបត្តិសង្គមនឹងចូលដល់ ។លោកថាស្ថិតក្នុងស្ថានការណ៍បែបនេះ បក្សកាន់អំណាចអាចរកលេស គ្រប់គ្រងអំណាច តាមបែបយោធានិយម តាមការគ្រោងទុក។
លោកថា៖«មិនមែនត្រឹមរបបយោធា បែបផែនដូចប្រទេសភូមា និងប្រទេសថៃទេ នេះជារបបយោធាតពូជ។ ហើយរៀបតពូជនេះដើម្បីអី ដើម្បីបំពេញការលោភលន់អំណាច និងទ្រព្យសម្បត្តិពីអ្នកដឹកនាំប្រទេស»។
អ្នកវិភាគនយោបាយវ័យក្មេង លោក ហង្ស វិទូ វិភាគថា ចរន្តនយោបាយ របស់អតីតគណបក្សប្រឆាំងនឹងមិនបែកបាក់ទេ បើទោះបីពេលនេះសកម្មជន និងអ្នកគាំទ្រ មួយចំនួនទាំងនៅក្នុងស្រុក និងក្រៅប្រទេស បង្ហាញគំនិតផ្ទុយគ្នាក៏ដោយ។
លោក ហង្ស វិទូ វិភាគថា សកម្មជន រួមទាំងអ្នកនយោបាយ ទំនងជាសិក្សាពីមេរៀនចាស់ពីអតីតកាលនៃ ពីការបរាជ័យ របស់គណបក្សមួយចំនួន ជាដៃគូប្រកួតរបស់រដ្ឋាភិបាល តាមរយៈ ជម្លោះផ្ទៃក្នុងនេះ។
លោកថា៖«ខ្ញុំយល់ឃើញថា បន្តិចទៀតនឹងមានការរួបរួមគ្នាមួយដើម្បីចេញជាសំឡេងមួយថាតើត្រូវដើរផ្លូវខាងណា»។
សរុបជារួម អ្នកវិភាគថា គណបក្សប្រឆាំង នឹងដើរដល់ចំណុចបែកបាក់ផ្ទៃក្នុង បើការសម្រេចបង្កើតចលនានយោបាយណាមួយក្នុងការលៈទេសៈនេះ មេដឹកនាំមិនយកយន្តការដែលមានស្រាប់ មកធ្វើសេចក្តីសម្រេចចិត្ត តាមសំឡេងភាគច្រើននោះ៕