អ្នកភូមិរាប់រយនាក់មកពីឃុំចំនួន ៤ នៅក្នុងស្រុកកណ្ដាលស្ទឹង ដែលមានទំនាស់ដីធ្លីជាមួយក្រុមហ៊ុន ហេង អភិវឌ្ឍន៍ របស់អ្នកស្រី សៀង ចាន់ហេង បានឡើងទៅតវ៉ានៅសាលាខេត្តកណ្ដាលនៅព្រឹកថ្ងៃនេះ បន្ទាប់ពីវិវាទរបស់ពួកគេអូសបន្លាយពេលជាង ១០ឆ្នាំមកហើយនោះ។
ពលរដ្ឋមកពីភូមិព្រែកអំពិល ឃុំព្រែកអំពិល អ្នកស្រី សន អាន បានប្រាប់ថា ក្រុមហ៊ុន ហេង អភិវឌ្ឍន៍ របស់អ្នកស្រី សៀង ចាន់ហេង បានចុះទៅទិញដីពីអ្នកភូមិនៅឆ្នាំ១៩៩៤ ប៉ុន្តែ ថា ក្រុមហ៊ុននេះ មិនបានប្រគល់ប្រាក់សេសសល់ដល់អ្នកភូមិនោះឡើយ បន្ទាប់ពីកក់ប្រាក់មួយចំនួននោះ។
អ្នកស្រីបានឲ្យដឹងបន្ថែមថា វិវាទដីធ្លីបានផ្ទុះឡើងកាលពីឆ្នាំ២០០៨ នៅពេលអ្នកភូមិស្នើសុំប្លង់កម្មសិទ្ធិ ប៉ុន្តែ អាជ្ញាធរថា ដីរបស់ពួកគាត់ គឺជាកម្មសិទ្ធិរបស់ក្រុមហ៊ុន ហេង អភិវឌ្ឍន៍ ខណៈអ្នកភូមិថា ពួកគេពុំបានផ្ដិតមេដៃលក់ដីទៅឲ្យក្រុមហ៊ុននោះទេ។
អ្នកស្រីថា៖ «ខ្ញុំទទួលស្គាល់ថា ដីហ្នឹងជារបស់ក្រុមហ៊ុន ក៏ប៉ុន្តែ បើដីរបស់ក្រុមហ៊ុនមែន ហេតុអីមិនធ្វើកិច្ចសន្យាទិញ-លក់ផ្តាច់។ គាត់ក៏ធ្វើ ខាងពលរដ្ឋខ្ញុំក៏ធ្វើ ហេតុអីគាត់បានចេញ? តែលុយអត់បានគ្រប់។ ខ្ញុំមកនេះ សុំអំពាវនាវឲ្យជំទាវហេងហ្នឹង គាត់មកជួបប្រជាជន ព្រោះដីគាត់ហ្នឹង មានប័ណ្ណអស់ហើយ។ ចាស! ដីគាត់មានប័ណ្ណ អញ្ចឹងប្រជាជនគាត់ចង់ជួបគាត់ហ្នឹងថា ដីហ្នឹងចេញតាមរយៈអ្នកណា? បើអត់មានមេដៃប្រជាពលរដ្ឋផ្ទេរសិទ្ធិឲ្យគាត់ផងហ្នឹង»។
ពលរដ្ឋម្នាក់ទៀតមកពីឃុំព្រែកស្លែង អ្នកស្រី អឿង សារី បានឲ្យដឹងថា អ្នកភូមិ ២១៨គ្រួសារនៅឃុំព្រែកស្លែង កំពុងមានវិវាទដីធ្លីជាមួយក្រុមហ៊ុនដដែលនេះ ខណៈដែលតំណាងពលរដ្ឋ ៦នាក់ទៀត កំពុងប្រឈមមុខនឹងបណ្ដឹងពីសំណាក់ក្រុមហ៊ុន បន្ទាប់ពីពួកគេបានឃាត់គ្រឿងចក្រចុះឈូសឆាយដីមានវិវាទ។
អ្នកស្រីថា៖ «គាត់ទិញពីអ្នកណា? គេបើប្រជាពលរដ្ឋ ខ្ញុំអត់បានដឹង អត់បានលក់អីទាំងអស់នេះ! តើគាត់ទិញពីអ្នកណាគេដីហ្នឹង! បែរជាដែនរដ្ឋបាលប្រជាពលរដ្ឋនៅឃុំព្រែកស្លែងអត់បានទទួលផង ចុះហេតុអីបានជាក្រុមហ៊ុនទទួលផលទៅវិញ? ខ្ញុំចង់និយាយអញ្ចឹង! បានន័យថា គាត់រំលោភយកដីប្រជាពលរដ្ឋខ្ញុំតែម្តង»។
នាយកទីចាត់ការអន្តរវិស័យនៃសាលាខេត្តកណ្តាល លោក បូ សាវឿន បានប្រាប់ទៅអ្នកភូមិឲ្យសរសេរឈ្មោះរបស់ពួកគេ ទំហំដីរងផលប៉ះពាល់ និងឯកសារបញ្ជាក់កម្មសិទ្ធិផងដែរ ខណៈដែលលោកក៏បានស្នើទៅតំណាងអ្នកភូមិ ៣នាក់ ទៅជួបពិភាក្សារកដំណោះស្រាយជាមួយអាជ្ញាធរខេត្ត។ មន្ត្រីរូបនេះ ក៏បានសន្យាផងដែរថា សាលាខេត្តនឹងរៀបចំឲ្យមានកិច្ចប្រជុំមួយរវាងពលរដ្ឋ សាលាខេត្ត និងលោកស្រី សៀង ចាន់ហេង នាពេលខាងមុខ។
លោកថ្លែងថា៖ «អញ្ចឹងបានខ្ញុំថា យើងជជែកគ្នាអីក៏ដោយ ត្រូវតែមានតំណាង ហើយតំណាងនេះសុំជាតំណាងពិតប្រាកដ យើងងាយនឹងជជែកគ្នា។ អញ្ចឹងសុំបីនាក់ក្នុងមួយភូមិ ខ្ញុំយកលេខទូរសព័្ទឥឡូវ។ ដើម្បីអី? ប្រសិនជាដាក់ពាក្យហើយ ឬបើអត់មានពាក្យដាក់ឥឡូវនេះទេ គឺដាក់(លេខទូស័ព្ទ) ក្នុងពាក្យដែលភូមិមួយនោះមក ដើម្បីឲ្យខ្ញុំទំនាក់ទំនងបាន»។
ទោះជាយ៉ាងណា អ្នកស្រី សន អាន ប្រាប់ថា អ្នកស្រីគ្មានជំនឿលើការដាក់ញ្ញត្តិ និងការសន្យារបស់អាជ្ញាធរនោះឡើយ ដោយអ្នកស្រីថា អ្នកភូមិនឹងឡើងទៅតវ៉ានៅក្រសួងរៀបចំដែនដី និងនគរូបនីយកម្ម ដើម្បីស្វែងរកដំណោះស្រាយ។
អគ្គលេខាធិការរងសម្ព័នសហគមន៍កសិករកម្ពុជា លោក ម៉ឺន រតនា មានប្រសាសន៍ថា វិវាទដីធ្លីនេះ បានអូសបន្លាយអស់រយៈពេលជាង ៣អាណត្តិមកហើយ និងប៉ះពាល់ដីធ្លីជាង ២០០ហិកតារបស់អ្នកភូមិជាង ១ពាន់គ្រួសារ។
មន្ត្រីអង្គការសង្គមស៊ីវិលរូបនេះ បានបង្ហាញក្ដីបារម្ភថា ប្រសិនបើទំនាស់ដីធ្លីមួយនេះ នៅតែអូសបន្លាយបន្តទៀត វានឹងប៉ះពាល់ដល់ជីវភាពរបស់ប្រជាពលរដ្ឋ ខណៈដែលដីស្រែចម្ការរបស់ពលរដ្ឋមួយចំនួន ត្រូវបានក្រុមហ៊ុនឈូយឆាយខ្លះហើយ។
លោកថា៖ «នៅប្រទេសកម្ពុជាយើងនេះ ប្រជាពលរដ្ឋ ៨៣ភាគរយ ជាកសិករ ដែលពឹងផ្អែកវិស័យកសិកម្ម។ ប្រសិនជាប្រជាពលរដ្ឋបាត់បង់ដីធ្លី កូនគាត់ចំណាកស្រុក មិនមែនតែចំណាកស្រុកក្នុងប្រទេសកម្ពុជាយើងទេ អាចទៅប្រទេសថៃ ទៅម៉ាឡេ ឬកូរ៉េអីផ្សេងៗ ធ្វើឲ្យកូនគាត់បាត់បង់ការរៀនសូត្រ ឬក៏កូនគាត់អាចមានបញ្ហាអ្វីកើតឡើងគ្រប់បែបយ៉ាង ព្រោះពេលដែលយើងទៅចំណាកស្រុកទៅស្រុកគេ យើងឃើញហើយថា ច្បាប់គេអត់គ្រប់ដណ្តប់យើងទេ ឃើញអ្នកខ្លះឆ្លងដែនដោយខុសច្បាប់ អ្នកខ្លះទៅដោយស្របច្បាប់»។
លោកឲ្យជាយោបល់ថា អាជ្ញាធរ ជាពិសេសស្ថាប័នជំនាញលើបញ្ហាដីធ្លីនេះ ត្រូវចុះទៅពិនិត្យ និងសម្ភាសពលរដ្ឋទៅដល់ដីជាក់ស្តែង ជៀសវាងពិនិត្យត្រឹមរបាយការណ៍ដែលត្រូវបានគេរៀបចំទុកឲ្យហើយនោះ។
ក្រុមអ្នកភូមិជាង ១ពាន់គ្រួសារ បានជួបប្រទះនឹងវិវាទដីធ្លីជាមួយក្រុមហ៊ុន ហេង អភិវឌ្ឍន៍ របស់អ្នកស្រី សៀង ចាន់ហេង លើដីជាង ២០០ហិកតា នៅក្នុងឃុំកណ្ដោក ឃុំអំពិលព្រៃ ឃុំព្រែកស្លែង និងឃុំបឹងខ្ចារ ស្ថិតក្នុងស្រុកកណ្ដាលស្ទឹង ចាប់តាំងពីឆ្នាំ២០០៨មកម៉្លេះ៕
