សាលារាជធានីភ្នំពេញ បានឲ្យដឹងថា ស្ពានដែកបាឡេសាងសង់ឆ្លងកាត់ទន្លេសាបនៅចំណុចសង្កាត់ឫស្សីកែវ ដើម្បីសម្រួលការកកស្ទះចរាចរណ៍ក្នុងរាជធានីភ្នំពេញ ដោយថាស្ពានជ្រោយចង្វារចាស់នឹងបិទមិនឲ្យធ្វើដំណើរបណ្តោះអាសន្ន ដើម្បីជួសជុល។
អ្នកនាំពាក្យសាលារាជធានីភ្នំពេញលោក ម៉េត មាសភក្តី បានប្រាប់VODនៅថ្ងៃទី១៩ខែមិថុនានេះថា ក្រុមហ៊ុន អូស៊ីអាយស៊ី ដែលអភិវឌ្ឍន៍ទីក្រុងរណបជ្រោយចង្វារ នឹងសង់ស្ពានដែក ឆ្លងកាត់ទន្លេសាបមួយខ្សែឆ្លងពីតំបន់ជ្រោយចង្វារ ឆ្ពោះទៅតំបន់ឃ្លំាងប្រេងឥន្ធនៈ ក្នុងសង្កាត់ឫស្សីកែវ ដែលតាមគម្រោងការសង់ស្ពានដែកនេះ ត្រូវប្រើរយៈពេល៦ខែ ពោលអាចធ្វើរួចនៅដើមឆ្នាំ២០១៨ខាងមុខ។
លោក មាសភក្តី បញ្ជាក់ថា ស្ពានដែកបាឡេនេះមាន កម្ពស់ប្រហាក់ប្រហែលនឹងកម្ពស់ស្ពានជ្រោយចង្វារថ្មី និងស្ពានចាស់ ដោយក្រោមស្ពានទុកគម្លាតឲ្យប្រជាពលរដ្ឋធ្វើវានាចរនៅតាមដងទន្លេសាបបានផងដែរ។
លោក ម៉េត មាសភក្តី បានឲ្យដឹងទៀតថា ស្ពានបាឡេដែលសង់ឲ្យ ប្រជាពលរដ្ឋឆ្លងកាត់បណ្តោះអាសន្ន និងរុះចេញវិញ បន្ទាប់ពីក្រុមហ៊ុនសង់ស្ពានថ្មថ្មីមួយទៀតនៅក្បែរស្ពានបាឡេនោះរួចរាល់។ លោកថាស្ពានថ្មថ្មីនោះបុកគ្រឹះដូចស្ពានជ្រោយចង្វាថ្មីផងដែរ។
លើសពីនេះទៀត លោក មាសភក្តី អះអាងថា ការសង់ស្ពានថ្មថ្មីក្បែរស្ពានបាឡេនោះនិងធ្វើឲ្យប៉ះពាល់ដល់ប្រជាពលរដ្ឋនៅតំបន់នោះ ប៉ុន្តែលោកថា សាលារាជធានីនិងធ្វើការដោះស្រាយជូនពួកគេឲ្យទទួលបានសំណងសមរម្យអាចទទួលយកបាន។
ស្ពានមិត្តភាពកម្ពុជា-ជប៉ុន ឬស្ពានជ្រោយចង្វារចាស់ ធ្លាប់ផ្អាកមិនឲ្យធ្វើចរាចរណ៍នៅដើមឆ្នំា២០១៥ ដើម្បីឲ្យមន្ត្រីជំនាញរបស់កម្ពុជា និងជប៉ុន ចុះពិនិត្យទម្រស្ពាន ដោយសារស្ថានភាពទ្រុឌទ្រោម ខណៈស្ពាននោះមានអាយុជិត៥០ឆ្នាំ។
គួរបញ្ជាក់ថា ស្ពានជ្រោយចង្វារ ឬស្ពានមិត្តភាពកម្ពុជា-ជប៉ុន ត្រូវបានសាងសង់ឡើងកាលពីឆ្នាំ១៩៦៦ ក្រោមជំនួយរបស់រដ្ឋាភិបាលជប៉ុន ប៉ុន្តែអំឡុងដើមទសវត្សរ៍ឆ្នាំ៧០ ស្ពាននេះត្រូវបានកាត់ផ្តាច់ក្នុងសម័យសាធារណរដ្ឋខ្មែរ ដែលគ្រប់គ្រងដោយរបបលោក លន់ នល់ ។ រហូតដល់ឆ្នាំ១៩៩៥ ស្ពាននេះត្រូវបានរាជរដ្ឋាភិបាលជប៉ុនជួសជុលតភ្ជាប់ឲ្យដំណើរការវិញរហូតដល់បច្ចុប្បន្ន។
ក្រោយមកសាលារាជធានីភ្នំពេញបានអនុញាតឲ្យក្រុមហ៊ុនចិន ស្ថាបនាស្ពានជ្រោយចង្វាថ្មីក្បែរស្ពានជ្រោយចង្វាចាស់ ដើម្បីកាត់បន្ថយការស្ទះចរាចរណ៍ ដោយស្ពាននោះ ដាក់ឲ្យដំណើរការនៅចុងឆ្នាំ២០១៤។ ទោះជាយ៉ាងណា ចរាចរណ៍នៅភ្នំពេញនៅតែបន្តកកស្ទះដដែល ខណៈស្ពានដែកបាឡេនឹងត្រូវស្ថាបនាឡើងនៅអំឡុងខែកក្កដាខាងមុខនេះ៕