ពលរដ្ឋខេត្តពោធិ៍សាត់ស្នើទៅរដ្ឋាភិបាលឲ្យជួយជួសជុលផ្លូវលំ១ខ្សែឡើងវិញ

ពលរដ្ឋមួយចំនួននៅស្រុកបាកាន ក្នុងខេត្តពោធិ៍សាត់ ស្នើទៅរដ្ឋាភិបាល ឲ្យជួយជួសជុលផ្លូវលំ ១ខ្សែឡើងវិញ​ ដោយពួកគាតអះអាងថា ពិបាកធ្វើដំណើរនៅពេលមានភ្លៀងធ្លាក់ ព្រោះផ្លូវលំមួយខ្សែនេះ រងការខូចខាតស្ទើរតែទាំងស្រុង។

ពលរដ្ឋម្នាក់លោក ឯម ទូយ អាយុ ៧០ឆ្នាំ រស់នៅភូមិផ្សារអណ្តែត មាននិយាយថា គាត់ពិបាកនៅពេលធ្វើដំណើរឆ្លងកាត់ផ្លូវនេះម្តងៗ ដោយថា ផ្លូវរអិលខ្លាំងពេកនៅពេលមានភ្លៀងធ្នាក់ ហើយនៅរដូវប្រាំងគឺហុយធ្វើឲ្យប៉ះពាល់ដល់សុខភាពផងដែរ។

លោកបញ្ជាក់ថា «ពិបាកធ្វើដំណើរសបបែបយ៉ាង អ្នកឈឺក៏ដោយ អ្នកពិការក៏ដោយ អ្នកពោះធំត្រូវទៅឆ្លងទន្លេ​ ភ្លាមអីគឺពិបាកវេទនាណាស់»។ លោក ឯម ទូយ បានបន្ថែមទៀតថា ផ្លូវដែលរងការខូចខាតនេះមានប្រវែងប្រហែល ២៨ទៅ ៣០គីឡូម៉ែត្រ ពិសេស ផ្លូវនេះគឺជាសេដ្ឋកិច្ចយ៉ាងសំខាន់សម្រាប់ប្រជាពលរដ្ឋនៅក្នុងឃុំអូរតាប៉ោងទាំងអស់។

ពលរដ្ឋម្នាក់ទៀតដែលរស់ភូមិឧកញ្ញ៉ាមាន់ អ្នកស្រី អៀង ណេង អាយុ ៥២ឆ្នាំ បានឲ្យដឹងថា កាលពីថ្ងៃទី ១០ខែតុលា គាត់បានដួលម៉ូតូ បាក់ក​ដៃម្ខាង(ខាងឆ្វេង) ខណៈពេលដឹកត្រីយកទៅលក់នៅផ្សារអូរតាប៉ោង។

អ្នកបញ្ជាក់ថា «រអិលពេកខ្ញុំចុះដើរ រអិលដួលយកដៃច្រត់ទៅបាក់ប៉ាដោយ»។ អ្នកស្នើទៅរដ្ឋាភិបាល អាជ្ញាធរពាក់ព័ន្ធ ឲ្យជួយជួសជុលផ្លូវនេះឡើងវិញ ដោយគាត់អះអាងថា បារម្ភពីសុវត្ថិភាពពេលធ្វើដំណើរឆ្លងកាត់ ខ្លាចជួបគ្រោះថ្នាក់បែបនេះម្តងទៀត។

គួរំលឹកផងដែរ ផ្លូវលំមួយខ្សែនេះ ពលរដ្ឋបញ្ជាក់ថា ទើបតែសាងសងរួចក្នុងឆ្នាំ ២០១៦ប៉ុណ្ណោះ ប៉ុន្តែ បច្ចុប្បន្នផ្លូវនេះ រងការខូចខាត់ស្ទើរតែទាំងស្រុងទៅវិញហើយ។

ដោយពលរដ្ឋអ្នកសារព័ត៌មាន ខេត្តពោធិ៍សាត់ លោក នួន ឈឿន

Facebook
Twitter
Telegram
LinkedIn

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។