បើទោះមិនទាន់រៀបការ តែអ្នកនាង ស្វែង សុជាតា និងស្វាមីក្រោយដែលជាគ្រូផ្សំថ្នាំបានរួមរស់ជាប្ដីប្រពន្ធនឹងគ្នាយ៉ាងពេញមុខ ដោយមានទាំងកូនស្រីម្នាក់ទុកជាចំណងដៃផង។ យ៉ាងណាមិញ ព័ត៌មានផ្លូវការបានអះអាងថាអ្នកទាំងពីរឧស្សាហ៍ឈ្លោះគ្នាជាប្រចាំ ដោយជម្លោះចុងក្រោយកាលពីថ្ងៃទី៩ មេសា បានបណ្ដាលអោយអ្នកនាងហើមមុខបែកភ្នែកមិនរួចច្រើនថ្ងៃនោះ តែអ្នកនាងនៅតែអន់អោនអោយប្ដីនេះម្ដងទៀត ដោយអះអាងថាចង់ទុកឱកាសអោយប្ដីកែខ្លួនជាលើកចុងក្រោយ។
ឆ្លើយតបនឹងការបែកធ្លាយយ៉ាងផុសផុលថាអ្នកនាង ស្វែង សុជាតា ត្រូវប្ដីក្មេងវាយដំ តារាស្រីរូបនេះបានសារភាពថាអ្នកនាងពិតជារហិង្សាដោយសារស្វាមីវាយដំពិតមែន។ អ្នកនាងថ្លែងថាមិនមែនជាលើកទី១នោះទេ ដោយជម្លោះលើកចុងក្រោយកាលពីយប់ថ្ងៃទី៩ មេសា គឺមានសភាពខ្លាំង ដោយពិតជាបណ្ដាលអោយអ្នកនាងហើមមុខ និងជំាភ្នែកអ៊ីចឹងមែន។
អ្នកនាងបានបញ្ជាក់ថាប្ដីស្រវឹង ហើយវាយដូចប៉ងសម្លាប់ដោយគ្រាន់តែអ្នកនាងហាមឃាត់រឿងផឹកស៊ីជាមួយមិត្តភ័ក្ត្រជាក្មេងៗដែលអ្នកនាងមិនចូលចិត្ត។
អ្នកនាងបញ្ជាក់ថាខ្លួនបានរួចជីវិតដោយសារតែអ្នកជិតខាងនៅផ្ទះកើតហេតុដែលស្ថិតនៅភូមិកំពង់សំណាញ់ក្រុងតាខ្មៅចូលជួយប៉ុណ្ណោះ បើមិនដូច្នេះគឺពិតជាធ្ងន់ធ្ងរជាងនេះ។
អ្នកស្រុកបានហៅប៉ូលីសមកជួយអន្តរាគមន៍អ្នកនាង តែស្វាមីបានរត់យករួចខ្លួន ទើបប៉ូលីសមកដល់ហើយមិនអាចនាំខ្លួនស្វាមីទៅណែនាំបាន។ យ៉ាងណាមិញ អ្នកនាងថាខ្លួននឹងទុកឱកាសអោយស្វាមីនេះម្ដងទៀត ដោយអ្នកនាងអះអាងថាក្រោយការវាយដំអ្នកនាងលើកចុងក្រោយគឺបុរសជាស្វាមី ត្រូវបានអ្នកនាងដាក់បណ្ដឹងហើយប៉ូលីសក៏ហៅអប់រំ និងអោយចុះកិច្ចសន្យាមិនអោយប្រព្រឹត្តិហិង្សាចំពោះអ្នកនាងជាថ្មីក្នុងពេលអ្នកនាងសុខចិត្តព្យួរពាក្យបណ្ដឹងនិងស្នើមិនអោយប៉ូលីសចាត់ការរឿងហិង្សាបង្ករបួសស្នាមនោះ។
អ្នកនាងថាស្វាមីអោយតែបានស្រាចូលពោះ គឺតែងឆេវឆាវ ហើយរមែងប្រើហិង្សាចំពោះអ្នកនាង ប៉ុន្តែមកពីអ្នកនាងមិនចង់អោយកូនស្រីក្រោយកំព្រាឪពុកទើបអ្នកនាងចេះតែខំសម្របសម្រួល។
អ្នកនាងថាអំពើហិង្សាចុងក្រោយ គឺមានសភាពធ្ងន់ធ្ងររហូតបណ្ដាលអោយអ្នកនាងលុបចោលគម្រោងថតកុនអស់មួយសន្ធឹក ដោយក្នុងពេលប្រើអំពើហិង្សានាយប់នោះ គឺកុំតែបានអ្នកស្រុកក្បែរខាងនៅកំពង់សំណាញ់ចូលជួយ កុំអីអាចគ្រោះថ្នាក់ជាងនេះ។ អ្នកនាងខ្លួនទទួលសម្រុះសម្រួលជាមួយស្វាមីក្រោយមិនមែនដោយសារតែចង់រួមរស់ជាមួយប្ដីក្មេងទាំងស្វាមីនេះធ្វើបាននោះទេ ប៉ុន្តែមកពីស្វាមីបានប្រកាសកែខ្លួន ទើបអ្នកនាងពិចារណាទុកឱកាសអោយលើកក្រោយដោយរង់ចាំមើលជាថ្មី។
អ្នកនាង ស្វែង សុជាតា ប្រកាសថាស្វាមីក្មេងក្រៅពីប្រើហិង្សា ក៏ចូលចិត្តដាក់សម្ពាធ និងទាមទារកាន់កាប់លុយដែលអ្នកនាងរកបាន ធ្វើអោយអ្នកនាងពិបាកចិត្តកន្លងមក។ ប៉ុន្តែអ្នកនាងក្រោយពេលមានរឿងលើកចុងក្រោយ ដោយមានតម្កល់ពាក្យបណ្ដឹងនៅប៉ូលីសផង គឺបុរសជាស្វាមីបានកែប្រែជំហរ។
អ្នកនាងថាសូម្បីតែពាក្យសម្ដីធ្ងន់ៗដែលធ្លាប់ប្រើចំពោះអ្នកនាងមុនៗក៏លែងមានដែរ ក្នុងពេលដែលអ្នកនាងប្រតិកម្មតបតក៏មិនហ៊ានដូចមុន។ អ្នកនាងថាមិនចង់ជួបរឿងជីវិតបាក់បែកម្ដងហើយម្ដងទៀតនោះទេ ទើបអ្នកនាងសម្រេចចិត្តទុកឱកាសអោយស្វាមីម្ដងហើយម្ដងទៀត ដោយការទុកឱកាសក្រោយរងហិង្សាលើកចុងក្រោយ គឺអ្នកនាងប្រកាសថានឹងជាឱកាសលើកចុងក្រោយបំផុត។ អ្នកនាងថាអត់ទ្រាំទៀតទេ បើបុរសជាគ្រូឱសថបុរាណរូបនេះវាយដំចំពោះអ្នកនាងម្ដងទៀត ហើយបើរឿងរ៉ាវធ្លាក់ដល់ប៉ុណ្ណឹងទៅហើយ ស្វាមីក្មេងមិនកែប្រែទៀត គឺអ្នកនាងចាត់ទុកថាឆាចោល។
អ្នកនាងថាខ្លួនបានជំពាក់ជីវិតប្ដីក្មេង ទើបសម្រេចចិត្តស៊ូទ្រាំដោយសូម្បីតែរងហិង្សាច្រើនលើក និងរឿងប្ដីទារកាន់លុយមិនអោយសិទ្ធិសេរីភាពអ្នកនាងដែលជាអ្នករកប្រាក់នោះផង។ ប៉ុន្តែក្រោយពីបានទទួលសម្ពាធនិងហ៊ានប្រកាសទទួលស្គាល់ថាប្ដីក្មេងធ្វើបាបជាសាធារណៈបែបនេះទៅហើយ គឺអ្នកនាងយល់ថាមិនអាចបន្តជីវិតអោយរងការឈឺចាប់បន្តទៀតបានឡើយ។
អ្នកនាងរំពឹងថាជីវិតស្នេហារបស់អ្នកនាង និងស្វាមី នឹងអាចបន្តដំណើរដោយអ្នកនាងបញ្ជាក់ថា បើប្ដីកែខ្លួនឈប់ប្រើហិង្សា និងឈប់ធ្វើអោយអ្នកនាងខ្វល់ខ្វាយរីងរ៉ៃដូចមុន គឺអ្នកនាងស៊ូស្លាប់មិនទៅណាចោលទេ៕