ទើបតែរកបានជើងឯកកាលពីសប្ដាហ៍មុនសោះ សង្វៀនប៉ុស្ដិ៍លេខ៥ បើកការប្រកួតជ្រើសរើសជើងវគ្គថ្មីភ្លាមកាលពីថ្ងៃទី២០ មករា ដែលការប្រកួតនេះ គឺខុសគ្នាពីអំឡុងពេលមុនៗដាច់ឆ្ងាយ បើធៀបនឹងការបញ្ចប់ការប្រកួតជើងឯកមុន គឺប៉ុស្ដិ៍លេខ៥តែងតែបិទសង្វៀនរបស់ខ្លួនមួយរយៈ ទើបបើកប្រកួតជាថ្មី ហើយបើទោះជាមិនបិទនោះទេ ក៏បើកការប្រកួតលេងៗជាលក្ខណៈមិត្តភាពឬអន្តរជាតិដោយមិនបើកការប្រកួតជើងឯកភ្លាមៗនោះ។
មន្ត្រីប៉ុស្ដិ៍លេខ៥បានអះអាងថា រូបមន្តក្នុងការប្រមូលយកកីឡាករក្នុងប្រភេទទម្ងន់ដូចគ្នាដល់ទៅ៣២រូប
អោយមកប្រកួតគ្នាចាញ់ធ្លាក់ៗ មិនមែនជារឿងងាយស្រួលក្នុងការរៀបចំំនោះទេ ប៉ុន្តែបណ្ដាលមកពីការរៀបចំក្រុមការងារមានការចាត់ចែងខុសប្លែកពីមុន ទើបការប្រកួតវគ្គថ្មីអាចដំណើរការបាន។
លោក សេង កដិកា អ្នករៀបចំការប្រកួតប្រដាល់ប្រចាំប៉ុស្ដិ៍លេខ៥សព្វដងអោយតែចប់ការប្រកួតជ្រើសរើសជើងម្ដងៗ លោកនិងក្រុមការងារគណៈកម្មការត្រូវតែសម្រាក២អាទិត្យ ឬមួយខែ ដើម្បីធ្វើការសម្រិតសម្រាំងកីឡាករ៣២នាក់វគ្គថ្មីដោយផ្ទាល់ ទើបសម្រេចបើកការប្រកួតថ្មីឡើង ដើម្បីអោយប្រាកដថាកីឡាករដែលត្រូវបានជម្រើសគឺសមនឹងអោយចូលប្រកួត។
លោកថាកីឡាករដែលមានប្រភេទទម្ងន់ដូចគ្នា ហើយមានសមត្ថភាពប្រហែលគ្នា មិនងាយរកបានរហូតដល់ទៅ៣២រូប អោយឡើងរេញប្រកួតគ្នានោះទេ ហើយលោកក៏មិនអាចជឿតាមការបញ្ជូនរបស់គ្រូបង្វឹកដែលថាកីឡាករនេះប្រកួតបានឬកីឡាករនោះប្រកួតបានដោយមិនធ្វើការពិសោធន៍ដោយខ្លួនឯងនោះដែរ ទើបតាមបទពិសោធន៍គឺប៉ុស្ដិ៍លេខ៥ត្រូវតែបិទសង្វៀនមួយរយៈក្រោយជម្រើសបានជើងឯកម្ដង ដើម្បីទុកពេលធ្វើការជ្រើសរើសនិងធ្វើតេស្តស្វែងយល់ពីសមត្ថភាពរបស់បេក្ខជនដែលត្រូវជ្រើសក៏ដូចជាដើម្បីមានពេលសម្រាកក្រោយធ្វើការប្រកួតមួយវគ្គផង។
លោកថាក្នុងពេលបើកការប្រកួត បើទោះជាការប្រកួតអ្នកទស្សនាមើលឃើញរវល់តែថ្ងៃផ្សាយបន្តផ្ទាល់តែធាតុពិតក្រុមការងាររបស់លោកពោរពេញដោយការមមាញឹកដកឃ្លាមិនរួច រាប់បញ្ចូលទាំងតាមការកីឡាករ
ទាំងការរៀបចំព្រឹត្តិការណ៍ប្រចាំសប្ដាហ៍ៗនីមួយៗនិងការរៀបចំការងារផ្សេងៗតែម្ដង ទម្រាំតែអាចបើកការប្រកួតសម្រាប់មួយសប្ដាហ៍ៗ ដែលមានកីឡាករ៤រូបប្រកួតគ្នាចាញ់ធ្លាក់ៗនោះបាន។
ម្យ៉ាងមកពីការប្រកួតមួយលើកៗក៏ត្រូវដាក់បញ្ចូលគូប្រកួតអន្តរជាតិអោយឡើងប្រកួតគ្នាកំដររេញផង ទើបរឹតតែជាបន្ទុកទ្វេរដង ដែលធ្វើអោយដោយខ្លួនច្បាស់ថាដែលអាចត្រូវធ្វើបានជាប់ៗគ្នា ជ្រើសរើសជើងរមែងដោយដបើកប្រកួតជើងឯកថ្មីភ្លែត ខុសពីសព្វដងក្រុមការងាររឹតតែដកឃ្លាមិនរួច ហើយមិនអាចបែងចែកពេលវេលាក្នុងពេលជម្រសើជើងឯកនីមួយៗមិនទាន់ចប់ ដើម្បីទៅជ្រើសសមាសភាពថ្មីសម្រាប់ការប្រកួតជើងឯកបន្ទាប់ៗបាន។
លោកនិយាយថា «កន្លងមកអោយតែចប់ការប្រកួតជើងឯកមួយលើកៗ យើងដាច់ខាតត្រូវតែសម្រាក ហើយយើងអត់មែនដាក់កីឡាករធម្មតាអោយប្រកួតគ្នាសិនអីទេ គឺយើងផ្អាកតែម្ដង ដើម្បីរកពេលមិនមានការប្រកួតហ្នឹងទៅជ្រើសរើសសមាសភាពថ្មី អ៊ីចឹងហើយទើបអោយប៉ុស្ដិ៍លេខ៥ប្រកួតចប់ម្ដងៗ គឺដាច់ខាតត្រូវតែផ្អាកមួយរយៈ ព្រោះតែអារូបមន្ត៣២នាក់យកមកប្រកួតគ្នាចាញ់ធ្លាក់ៗហ្នឹង វាទាមទារអោយយើងចំណាយពេលច្រើនទម្រាំរកបានសមាសភាពដែលត្រូវរួមប្រកួត!»។
លោកចាត់ទុកថាទើបតែការប្រកួតជ្រើសរើសជើងឯកដែលជម្រើសបានកាលពីថ្ងៃទី១៣ មករាមុននេះទេ
ដែលគ្រាន់តែស្វែងរកឃើញជើងឯកបានភ្លាម ក៏បើកការប្រកួតជ្រើសរើសតាមរូបមន្តដដែលភ្លាម ព្រោះតែលោកបានកែទម្រង់ការងារ។
លោកថាកាលពីមុនការជ្រើសកីឡាករអោយចូលប្រកួត គឺលោកត្រូវមើលការខុសត្រូវទាំងស្រុង ទើបការសម្រេចភាគច្រើនទាមទារអោយលោកបញ្ចប់ការប្រកួតមួយវគ្គជាមុនសិន ទើបអាចទៅមានពេលជម្រើសថ្មីបាន ប៉ុន្តែសម្រាប់ការប្រកួតមុននោះ គឺលោកបានព្រលែងដៃអោយក្រុមជំនាញដែលចេះមើលកីឡាករជំនួសជាអ្នកធ្វើការ ទើបសមាសភាព៣២រូបដែលត្រូវឡើងប្រកួតជើងឯកថ្មី កំណត់ឈ្មោះបានតាំងពី កីឡាករ សៅ វណ្ណា
មិនទាន់ត្រូវជាប់ជាជើងឯកម្លេះ។
លោកនិយាយថា «ពីមុនយើងខ្វះក្រុមការងារជំនាញ ឥលូវអត់ទេ យើងប្រកួតបណ្ដើរយើងមានអ្នកជំនាញផ្នែកកីឡាករម្នាក់ធ្វើការជ្រើសកីឡាករដែលមានប្រភេទទម្ងន់ដូចគ្នា និងសមត្ថភាពប៉ុនគ្នាបណ្ដើរ ហើយខ្ញុំគ្រាន់តែឆ្លៀតពេលហៅកីឡាករទាំងអស់មកធ្វើតេស្ដិ៍ខ្លីៗគឺបានៗ!»។
សម្រាប់ការប្រកួតជ្រើសជើងឯកវគ្គថ្មីនេះ ប៉ុស្ដិលេខ៥ជម្រើសក្នុងប្រភេទទម្ងន់៥៧គីឡូក្រាមវិញម្ដងបន្ទាប់ពីទើបរកឃើញកីឡាករជើងឯកក្នុងប្រភេទទម្ងន់៦៥គីឡូក្រាមកាលពីសប្ដាហ៍មុន។
លោក ម៉ិល កាដូ អគ្គលេខាធិការសហព័ន្ធកីឡាប្រដាល់កម្ពុជាបានបង្ហាញការរំពឹងថាសមាសភាពកីឡាករចំនួន៣២រូបដែលមានឈ្មោះប្រកួតជ្រើសរើសជើងឯកក្នុងប្រភេទទម្ងន់៥៧គីឡូក្រាម នឹងមានសមត្ថភាពមិនចាញ់សមាសភាពដែលទើបបញ្ចប់នោះទេ ដោយលោកទទូចថាសុំអោយកីឡាករទាំងនោះប្រកួតដោយភាពថ្លៃថ្នូរ
កុំប្រើល្បិច កុំប្រើកំហឹង និងត្រូវធ្វើយ៉ាងណាត្រូវតែប្រកួតអោយអស់ពីសមត្ថភាពដើម្បីអោយការប្រកួតរបស់ពួកគេដាក់ក្នុងអារម្មណ៍អ្នកគាំទ្រគ្មានការរិះគន់នោះផង។
លោកថាបើកីឡាករម្នាក់ៗប្រឹងប្រកួតអស់ពីសមត្ថភាព គឺទោះជាចាញ់ ឬឈ្នះ ក៏ពិតជាមិនពិបាកក្លាយខ្លួនជាកីឡាករល្អនោះដែរ ដោយសារតែអ្នកទស្សនាភាគច្រើនចេះមើលការប្រកួតមិនដូចមុន ហើយមិនមែនទាល់តែបានកាន់ពានជើងឯកទើបក្លាយជាកីឡាករដែលមានការគាំទ្រខ្លាំង៕
