មេដឹកនាំកូរ៉េខាងត្បូងបញ្ជាក់ជំហរថា ប្រទេសរបស់លោកនៅតែមានទំនាក់ទំនងល្អជាមួយសហរដ្ឋអាមេរិករឹងមាំដូចថ្ម ហើយកាន់តែមានភាពប្រសើរឡើងជារៀងរហូត បើទោះបីជាប្រទេសនេះកំពុងចាប់ផ្តើមស្និទ្ធស្នាលជាមួយកូរ៉េខាងជើងជាប្រទេសបងប្អូនគ្នានេះ។
ប្រធានាធិបតីកូរ៉េខាងត្បូងលោក Moon Jae-in បានថ្លែងបែបនេះ នៅក្នុងបទសម្ភាសន៍មួយជាមួយប្រព័ន្ធផ្សព្វផ្សាយកាលពីម្សិលមិញ។ នេះ បើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
រដ្ឋាភិបាលរបស់លោក លោក Moon Jae-in កំពុងតែប្រឈមមុខរដ្ឋសភាកោះហៅទៅសាកសួរ ជុំវិញគោលនយោបាយ ឬ ទស្សនៈគំនិត ដែលធ្វើឲ្យរាំងស្ទាំងដល់ទំនាក់ទំនងមិត្តភាពរវាងសម្ព័ន្ធជាមួយអាមេរិក ដោយសារតែឥទ្ធិពល សុំឲ្យមានការបន្ធូរបន្ថយពីកម្មវិធីអាវុធនុយក្លេអ៊ែរបស់កូរ៉េខាងជើងនោះ។
នៅក្នុងបទសម្ភាសន៍ជាមួយទស្សនាវដ្តីMonocle ដែលចេញផ្សាយនៅថ្ងៃនេះលោក Moon Jae-in ថ្លែងថា លោកត្រាំ ប្រធានាធិបតីអាមេរិកតែងតែខិតខំប្រឹងប្រែងឲ្យមានការជជែកគ្នាស្វែងរកដំណោះស្រាយរវាងកូរ៉េទាំងពីរ។
មន្ត្រីរបស់កូរ៉េខាងត្បូងជាច្រើនរូបរួមទាំងរដ្ឋមន្ត្រីការបរទេសលោក Kang Kyung-hwa សុទ្ធតែបានច្រានចោលព័ត៌មានដែលថា កូរ៉េខាងត្បូងកំពុងមានគោលនយោបាយផ្ទុយពីអាមេរិកក្នុងការដោះស្រាយបញ្ហាជាមួយកូរ៉េខាងជើង។
គណៈប្រតិភូរបស់កូរ៉េទាំងពីរចាប់ផ្តើមជជែកគ្នាជាលើកដំបូងនៅក្នុងខែមករាកន្លងទៅនេះ បន្ទាប់ពីរផ្អាកអស់រយៈពេល២ឆ្នាំ ហើយការចូលរួមកីឡាអូឡាំពិករដូវត្រជាក់រួមគ្នារបស់កូរ៉េទាំងពីរកាន់តែធ្វើឲ្យទំនាក់ទំនងនៅក្នុងឧបទ្វីបនេះកាន់តែមានភាពប្រសើរឡើង។
មេដឹកនាំកូរ៉េខាងជើងលោក គីម ជុងអ៊ុន បានបញ្ជូនប្អូនស្រីរបស់លោក គឺលោកស្រី Kim Yo Jong ទៅកូរ៉េខាងត្បូង ហើយប្អូនស្រីរបស់លោក គីម ជុងអ៊ុន បានអញ្ជើញប្រធានាធិបតីកូរ៉េខាងត្បូងទៅបំពេញទស្សនកិច្ចនៅទីក្រុងព្យុងយ៉ាងកូរ៉េខាងជើង ដើម្បីជជែកការងារជាមួយបងប្រុសខ្លួនវិញ។
សកម្មភាពមួយរយៈកាលចុងក្រោយនេះ បង្ហាញពីសញ្ញាល្អជាបន្តបន្ទាប់ចំពោះទំនាក់ទំនងរវាងកូរ៉េខាងត្បូង និង កូរ៉េខាងជើង ខណៈបញ្ហារវាងសហរដ្ឋអាមេរិក និង កូរ៉េខាងជើងនៅតែមានភាពតានតឹងជាលំដាប់។ មេដឹកនាំអាមេរិកនិងមេដឹកនាំកូរ៉េខាងជើងនៅតែប្រើពាក្យសម្តីវាយប្រហារគ្នា។
ទោះយ៉ាងណាចាប់តាំងពីខែវិច្ឆិកាឆ្នាំ២០១៧មក កូរ៉េខាងជើងមិនបានធ្វើសកម្មភាពធ្វើតេស្តសាកល្បងអាវុធទៀតទេ។
សហរដ្ឋអាមេរិកបញ្ជាក់ជំហរថា គាំទ្រឲ្យមានការជជែកគ្នាដោយផ្ទាល់រវាងកូរ៉េខាងត្បូង និងកូរ៉េខាងជើងក្នុងការដោះស្រាយបញ្ហា ប៉ុន្តែអាមេរិកនៅតែបញ្ជាក់ជំហរទាមទារឲ្យកូរ៉េខាងជើងទម្លាក់ចោលកម្មវិធីអាវុធនុយក្លេអ៊ែ។ ទោះយ៉ាងណាបំណងរបស់អាមេរិកនេះ ត្រូវកូរ៉េខាងជើងច្រានចោល៕
