ក្រសួងសុខាភិបាល បានក្រើនរំលឹកទៅដល់ប្រជាពលរដ្ឋ ឲ្យឧស្សាហ៍តាមដានក្រុមមនុស្សងាយរងគ្រោះឲ្យបានយ៉ាងតិច ២ដងក្នុងមួយថ្ងៃ នៅអំឡុងរដូវក្ដៅហួតហែងនេះ។
ក្រសួងធនធានទឹក និងឧតុនិយម បានឲ្យដឹងថា នៅចុងខែមេសានេះ សីតុណ្ហភាពនៅក្នុងប្រទេសកម្ពុជា ស្ថិតនៅចន្លោះពី ៣១ ទៅ ៣៦អង្សារ ពោលគឺមានស្ថានភាពក្ដៅហួតហែងស្ទើនៅទូទាំងប្រទេស។
ខណៈដែលសីតុណ្ហភាពក្ដៅហួតហែងបែបនេះ នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានអំពាវនាវទៅប្រជាពលរដ្ឋ ឲ្យបង្ការខ្លួនពីជំងឺផ្សេងៗ ដែលអាចកើតមានក្នុងស្ថានភាពបែបនេះ។
ក្នុងសារអប់រំសុខភាពអំឡុងរដូវក្ដៅ ដែលផ្សព្វផ្សាយនៅលើទំព័រហ្វេសប៊ុកផ្លូវការរបស់ខ្លួនកាលពីថ្ងៃទី២០ ខែមេសានេះ ក្រសួងសុខាភិបាលបានណែនាំពលរដ្ឋឲ្យជ្រកក្រោមម្លប់ឱ្យបានច្រើន ជៀសវាងនៅក្រោមកម្ដៅថ្ងៃផ្ទាល់ ជៀសវាងការពិសាស្រា និងទឹកដែលមានកំហាប់ស្ករខ្ពស់ ស្លៀកពាក់ស្តើង ស្រាល មានពណ៌ភ្លឺ ពិសាទឹកឱ្យបានច្រើនជាងពេលធម្មតា និងងូតទឹកឱ្យបានញឹកញាប់។
ក្រសួងសុខាភិបាល ក៏បានក្រើនរំលឹកពលរដ្ឋ ឲ្យតាមដានក្រុមមនុស្សដែលងាយរងគ្រោះឱ្យបាន ២ដងក្នុងមួយថ្ងៃ ដូចជា ក្មេងអាយុក្រោម ៥ឆ្នាំ មនុស្សចាស់អាយុចាប់ពី ៦៥ឆ្នាំឡើង ស្ត្រីមានផ្ទៃពោះ និងជនដែលមានជំងឺរុំារ៉ៃ។
នាយកដ្ឋានប្រយុទ្ធប្រឆំាងនឹងជំងឺឆ្លង បានបន្ថែមថា រោគសញ្ញារមួលក្រពើជាសញ្ញាបឋមបញ្ជាក់ថា មានជំងឺទាក់ទងនឹងអាកាសធាតុក្តៅខ្លាំង ដែលអាចវិវត្តិទៅជាជំងឺអស់កំលាំងល្ហិតល្ហី ដោយកំដៅខ្លាំង ឬដួលសន្លប់ដោយសារកំដៅខ្លាំង។
ក្នុងករណីដែលមានរោគសញ្ញាទាំងនេះ ក្រសួងក្រើនរំលឹកពលរដ្ឋត្រូវតែប្តូរអ្នកជំងឺទៅកន្លែងត្រជាក់ បញ្ចុះកំដៅខ្លួនជាមួយកន្សែងត្រជាក់ ឬបញ្ជូនទៅមន្ទីរពេទ្យជាបន្ទាន់៕
