ក្រុមពលករខ្មែរដែលកំពុងធ្វើការងារនៅក្រៅ ស្នើឲ្យសមាជិកសភាកែប្រែច្បាប់មួយចំនួន ដោយបើកផ្លូវឲ្យពួកគេបានសិទ្ធិបោះឆ្នោត ខណៈពលករខ្មែរជាង១លាននាក់បានធ្វើចំណាកស្រុក។ នេះបើតាមសំណើមួយរបស់គណៈកម្មាធិការដើម្បីសិទ្ធិបោះឆ្នោតរបស់ពលរដ្ឋខ្មែរនៅក្រៅប្រទេស។
គណៈកម្មាធិការនេះ បានសរសើរពីដំណើការរៀបចំការបោះឆ្នោតក្រុមប្រឹក្សាឃុំសង្កាត់កន្លងមកថ្មីៗនេះ ប៉ុន្តែគណៈកម្មការនេះ បានកត់សំគាល់ថា ពលករខ្មែរនៅក្រៅប្រទេសមិនទាន់បានសិទ្ធិពេញលេញ ក្នុងការចូលរួមបោះឆ្នោតទេ។
គណៈកម្មាធិការដែលហៅកាត់ថា«CEROC»នេះ រំលឹកថា ពលរដ្ឋខ្មែរនៅក្រៅប្រទេសបានទទួលសិទ្ធិបោះឆ្នោតពេញលេញ ពេលដែលអង្គការសហប្រជាជាតិឬដែលហៅកាត់ថាអ៊ុនតាក់រៀបចំការបោះឆ្នោតនៅកម្ពុជាកាលពីឆ្នាំ១៩៩៣។ តែក្រោយមក គ.ជ.ប.«មិនបានយកច្បាប់បោះឆ្នោតអ៊ុនតាក់មកប្រើប្រាស់ ហើយរមែងព្រងើយកន្តើយសិទ្ធិចូលរួមនយោបាយរបស់ពលរដ្ឋខ្មែរនៅក្រៅប្រទេសតាមរយៈការចូលរួមបោះឆ្នោតជ្រើសរើសតំណាងរបស់ខ្លួន ដែលសិទ្ធិនេះត្រូវបានធានាដោយរដ្ឋធម្មនុញ្ញតាមមាត្រា៣៤និងច្បាប់ស្តីអំពីសិទ្ធិមនុស្សជាសាកលរបស់អង្គការសហប្រជាជាតិតាមមាត្រា២១»។
ប្រធានក្រុមតំណាងរាស្ត្រ គណបក្ស សង្រ្គោះជាតិ លោក សុន ឆ័យ បានស្វាគមន៍ចំពោះសំណើនេះ ហើយថានឹងរៀបចំធ្វើសេចក្តីស្នើច្បាប់នេះនៅពេលឆាប់ខាងមុខនេះ ដោយលោកប្រាប់ឲ្យគណៈកម្មាធិការដែលហៅកាត់ថា«CEROC»ជួយជំរុញថែមទៀតទៅតំណាងរាស្ត្រមកពីគណបក្សប្រជាជនកម្ពុជាចូលរួមគាំទ្រផង ទើបអាចមានចំនួនគ្រប់គ្រាន់ក្នុងការអនុម័តច្បាប់នេះបាន។
អ្នកនាំពាក្យតំណាងរាស្ត្រភាគច្រើននៅក្នុងសភាលោក ឈាង វុន ថាច្បាប់កម្ពុជាមិនបានហាមឃាត់ជនជាតិខ្លួនដែលរស់នៅក្រៅប្រទេសមិនឲ្យបោះឆ្នោតនោះទេ តែថាអ្នកទាំងនោះត្រូវចូលមកក្នុងបោះឆ្នោតនៅក្នុងប្រទេស មិនអាចបោះឆ្នោតនៅតាមស្ថានទូតក្រៅប្រទេសបានទេ ដោយសារការបោះឆ្នោតនៅកម្ពុជាជាការបោះឆ្នោតតាមតំបន់។ ចំពោះសំណើសុំឲ្យធ្វើវិសោធនកម្មនោះលោកថា ត្រូវមានការសិក្សាបច្ចេកទេសជាមុនសិនមុននឹងរៀបចំធ្វើ ដោយជាសមត្ថកិច្ចការរបស់គ.ជ.ប ដែលមានសមត្ថកិច្ចព្រាងច្បាប់នោះ។
លោកថា៖ «វាធ្វើអត់កើតទាល់តែមានបច្ចេកទេស ច្បាប់ទាល់តែ គ.ជ.ប ធ្វើច្បាប់បោះឆ្នោតមិនមែនគណបក្សអ្នកធ្វើឯណា។ តំណាងរាស្ត្រអាចស្នើ ស្នើទៅបើធ្វើចេញៗទៅបើមិនចេញហីទៅ! ហើយបើស្នើគេមានជជែកតស៊ូហើយទីមួយគេសួរយោបល់ទៅ គ.ជ.ប ទីពីរយកមកបោះឆ្នោតនៅរដ្ឋសភាព្រឹទ្ធិសភា មានការជជែកតវ៉ាគ្នាអីក្នុងហ្នឹងសួរ ដេញដោលគ្នាអញ្ចឹង»។
គួររំលឹកផងដែរថា កាលពីពេលថ្មីៗនេះបណ្តុំអង្គការដែលធ្វើការខាងបោះឆ្នោតក៏បានរៀបចំសេចក្តីព្រាងអនុសាសន៍មួយដែរដែលមានគោលបំណងធ្វើឲ្យពលរដ្ឋខ្មែរដែលរស់នៅ និងធ្វើការនៅក្រៅប្រទេសមានសិទ្ធិបោះឆ្នោតបាននៅក្រៅប្រទេសតាមរយៈស្ថានទូត ឬតំណាងកុងស៊ុល តែការចង់បាននេះត្រូវបានតំណាង គ.ជ.ប ឆ្លើយតបថាករណីនេះទាមទារឲ្យមានការធ្វើវិសោធនកម្មច្បាប់បោះឆ្នោតជាមុនសិន។
ក្នុងរបាយការណ៍បូកសរុបលទ្ធផលរបស់ក្រសួងការងារប្រចាំឆ្នាំ២០១៦ ឲ្យដឹងថាបច្ចុប្បន្នពលករខ្មែរចំណាកស្រុកទៅធ្វើការនៅក្រៅប្រទេសមានជាង ១,១៥លាននាក់ ដែលកំពុងធ្វើការនៅ ថៃ កូរ៉េ ជប៉ុន ម៉ាឡេស៊ី និងសិង្ហបុរី ក្នុងនោះជាង១លាននាក់ធ្វើការនៅប្រទេសថៃ។ ចំនូននេះនៅមិនទាន់រាប់បញ្ជូលជនជាតិខ្មែរដែលទៅរស់នៅក្រៅប្រទេសដែលពុំមែនជាពលករចំណាកស្រុកនៅឡើយទេ៕
រាយការណ៍បន្ថែមដោយលោក ហ៊ុន សិរីវឌ្ឍន៍