បន្ទាប់ពីមានដំណឹងថា ពេជ្រ អាវីហ្សា សុខចិត្តចូលគុកដោយសារតែភាគីខាងជនរងគ្រោះក្នុងហេតុការប៉ះគ្នារវាងម៉ូតូ និងរថយន្តរបស់នាងកាលពីយប់ថ្ងៃទី២៣ មីនា មិនព្រមទម្លាក់តម្លៃសំណង បានធ្វើអោយមានការភ្ញាក់ផ្អើលយ៉ាងខ្លាំង ដោយសារតែពេជ្រ អាវីហ្សា គឺជាតារាល្បីហើយមិនគួរធ្លាក់ដល់សភាពមិនមានថវិកាបង់សំណងក្រោយពេលកើតហេតុ។ យ៉ាងណាក៏ដោយលទ្ធផលចុងក្រោយ បានទម្លាយហើយថាភាគីជនរងគ្រោះយល់ព្រមទទួលយកសំណើរបស់នាង និងបានប្រកាសស្នើបទចោលប្រកាន់ចំពោះករណីនោះផង ដើម្បីបញ្ចប់រឿងក្រៅប្រព័ន្ធតុលាការ។
អ្នកនាងព្រំ រដ្ឋា ជាអតីតពិធីការិនី និងជាតំណាងជនរងគ្រោះ បានអះអាងថាដោយសារតែជនរងគ្រោះទាំង២ម្នាក់ជាអ្នកកាន់កាមេរ៉ា និងម្នាក់ជាអ្នកបច្ចេកទេសប្រចាំនៅក្នុងក្រុមហ៊ុនរបស់នាង ហើយត្រូវឪពុកម្ដាយរបស់បុគ្គលិកទាំងពីរប្រគល់សិទ្ធិអោយចេញមុខដោះស្រាយផង ទើបអ្នកនាងក្លាយជាអ្នកចចារ។
អ្នកនាងថាក្នុងពេលចចារដំបូងៗ ឪពុកម្ដាយរបស់គ្រួសាររងគ្រោះមិនព្រមបញ្ចុះនៅក្រោម៨០០០ដុល្លារនោះទេ ប៉ុន្តែដោយសារតែអ្នកនាងចង់អោយឆាប់ត្រូវគ្នា ហើយមិនចង់អោយករណីរបស់ពេជ្រ អាវីហ្សា ធ្លាក់ដល់ដៃតុលាការ ទើបសុំអាកាត់ត្រឹម៦៥០០ដុល្លារ។ នៅរសៀលថ្ងៃទី២៤ មីនា អ្នកនាងបានបន្តអាកាត់មួយតង់ចុងក្រោយ ដោយសុខចិត្តទម្លាក់នៅត្រឹម៦០០០ដុល្លារ និងយល់ព្រមអោយពេជ្រ អាវីហ្សា បង់ជា២ដំណាក់កាល គឺបង់ពាក់កណ្ដាលជាមុន និងទុកអោយនាងរកពាក់កណ្ដាលទៀតសម្រាប់បង់បញ្ចប់នៅប៉ុន្មានថ្ងៃក្រោយ។
អ្នកនាងថាខ្លួនស្ថិតនៅចំណុចកណ្ដាលយ៉ាងពិបាកដោយអាកាត់អោយនៅត្រឹម៦ពាន់ដុល្លារក៏ខុសខាងគ្រួសារជនរងគ្រោះ ហើយនៅពេលមិនអាចបញ្ចុះអោយទាបជាងនេះបន្ថែមទៀតតាមការទាមទាររបស់ពេជ្រ អាវីហ្សា ក៏ត្រូវគេចោទថាម្ដេចក៏ដាច់ចិត្តធ្វើបាបគ្នាឯងម្ល៉េះឯណោះទៀត។ អ្នកនាងថាអ្នកនាងគ្រាន់តែចេញមុខសម្រុះសម្រួលក្នុងនាមជាគ្រួសាររបស់ជនរងគ្រោះប៉ុណ្ណោះ ប៉ុន្តែការកំណត់រឿងសំណងមិនមែនអ្នកនាងអ្នកសម្រេចនោះទេ តែអ្នកនាងជាអ្នកបន្ទាបដោយចិត្តឯងម្ដងហើយម្ដងទៀត ដើម្បីកុំអោយករណីរបស់អាវីហ្សា ត្រូវគ្រួសារជនរងគ្រោះរុញអោយបញ្ជូនទៅតុលាការ។
អ្នកនាងនិយាយថា«ខាងអ្នកគាំទ្រអាវីហ្សា ថាមិចខ្ញុំទាថ្លៃម្ល៉េះ ហើយខាងឪពុកម្ដាយគ្រួសារជនរងគ្រោះថាខ្ញុំមិនក៏សម្រេចយកតិចម៉េះ ដល់ចឹងខ្ញុំអត់ដឹងធ្វើមិចទេ ងាកទៅណាក៏ខុសដែរ តែខ្ញុំខំធ្វើអស់ពីលទ្ធភាពហើយដើម្បីអោយភាគីទាំងពីរត្រូវគ្នា!»។
អ្នកនាងឪពុករបស់ជនរងគ្រោះម្នាក់ដាច់ខាតអត់ព្រមទទួលយក៦០០០ដុល្លារដែលអ្នកនាងសម្រេចតែម្ដង ដោយអ្នកនាង មិនហ៊ានអោយលោកប៉ះសម្ដីគ្នាជាមួយពេជ្រ អាវីហ្សានោះផង ដើម្បីកុំអោយមានរឿង។ អ៊ីចឹហើយ ទើបអ្នកនាងសម្រេចមិនអោយឪពុករបស់ជនរងគ្រោះម្នាក់នោះ ចេញមុខដោះស្រាយទេ ដោយអ្នកនាងយល់ថាបើចេញមុខមែន គឺពិតជាអត់ត្រូវគ្នារឿងសំណងប៉ុណ្ណឹង។
អ្នកនាងថាពេជ្រ អាវីហ្សា គឺជាតារាសិល្បៈ ហើយជនរងគ្រោះគឺជាបុគ្គលិកច្រើនឆ្នាំរបស់ខ្លួន ដូច្នេះអ្នកនាងត្រូវតែស្វែងរកដំណោះស្រាយផ្លូវកណ្ដាលមួយ ដើម្បីអោយភាគីទាំងពីរបានត្រូវគ្នា។ អ្នកនាងបានទាំងព្រមព្រៀងអោយកញ្ញាពេជ្រ អាវីហ្សា បង់ត្រឹមពាក់កណ្ដាលមុន ដោយសុខចិត្តប្រើលុយខ្លួនឯងដោះស្រាយជួយជនរងគ្រោះសិន ទម្រាំពេជ្រ អាវីហ្សា បង្វិលលុយនបង្គ្រប់។ អ្នកនាងសប្បាយចិត្ត ដែលភាគីខាងពេជ្រ អាវីហ្សា យល់ព្រមបង់សំណង៦០០០ដុល្លារ ក្នុងពេលដែលភាគីខាងគ្រួសារជនរងគ្រោះ បើទោះជាមិនសប្បាយចិត្ត តែបានយល់ព្រមដូចគ្នា។
អ្នកនាងបានស្នើអោយមន្ត្រីការិយាល័យចរាចរជើងគោក ទម្លាក់ចោលបណ្ដឹងលើករណីរបស់អាវីហ្សា បន្ទាប់ពីកិច្ចសម្រុះសម្រួលត្រូវបានព្រមព្រៀងកាលពីរសៀលថ្ងៃទី២៤ មីនា។ អ្នកនាងនិយាយថា«ក្រោយពេលយើងស្រុះស្រួលគ្នា ខ្ញុំតំណាងអោយជនរងគ្រោះ យើងសុំកុំអោយមន្ត្រីប៉ូលីសបញ្ជូនសំណុំរឿងហ្នឹងទៅតុលាការ ព្រោះធ្វើមិចវាជារឿងអចេតនា ហើយអាវីហ្សា ក៏បានទទួលខុសត្រូវដែរ!»។
យ៉ាងណាមិញ អ្នកនាងថាករណីបើករថយន្តដោយមានជាតិស្រវឹង របស់នាងគឺខាងថ្នាក់លើនឹងដោះស្រាយផ្សេង ប៉ុន្តែសម្រាប់ខាងជនរងគ្រោះ នឹងមិនមានបណ្ដឹងណាមួយពាក់ព័ន្ធនឹងរឿងនេះឡើយ។
កញ្ញាពេជ្រ អាវីហ្សា និយាយថា បើគ្មានការយោគយល់អោយបង់ត្រឹមពាក់កណ្ដាលជាមុន កញ្ញាពិតជាលំបាកដោយសារតែភាពជាក់ស្ដែងកញ្ញាមានតែរង្វង់២ពាន់ដុល្លារប៉ុណ្ណោះក្នុងដៃ មុនពេលស្វែងរកដំណោះស្រាយ។ កញ្ញាថាមិត្តភ័ក្ត្រ និងបងប្អូនបានរួមគ្នាអោយខ្លះ និងអោយខ្ចីខ្លះ ទើបអាចដោះស្រាយបានចំនួន៦ពាន់ដុល្លារ ដោយថវិកាទាំងនោះនឹងអាចប្រមូលបានគ្រប់នៅសប្ដាហ៍ក្រោយ។ កញ្ញាថារំភើបចិត្តដែលតារាសិល្បៈច្រើនរូប មានបំណងចង់រ៉ៃថវិកាគ្នាបំពេញកង្វះខាតរបស់នាង នៅពេលនាងនិយាយថាមិនមានលទ្ធភាពអាចបង់បានគ្រប់នឹងសំណងដែលបានកំណត់ទា។ យ៉ាងណាមិញ នាងថាខ្លួនស្ថិតក្នុងការឃាត់ខ្លួននៅការិយាល័យចរាចរណ៍ជើងគោកនៅស្នងការដ្ឋានរាជធានីភ្នំពេញនៅឡើយប៉ុណ្ណោះ ដោយនាងប្រាប់ថាប្រហែលទាល់តែបានប្រគល់លុយអស់ទើបមានការអនុញ្ញាតិអោយចេញ៕
