ក្រោយពីផ្អាកសម្ដែងមិនតិចជាង៥ឆ្នាំ តារាចម្រៀងល្បីឈ្មោះ អ្នកនាង ខាត់ សុឃីម ត្រូវគេកត់សម្គាល់ថាបានឡើងកូដជាថ្មីវិញហើយ បន្ទាប់ពីអ្នកនាងបានបង្ហាញមុខជាតួឯកកាចឆ្នាស់ពិលពុល ជាមួយនឹងតារាចម្រៀង អ្នកនាងមេម៉ាយនៅក្នុងភាពយន្តរឿង «បិសាចគួរអោយស្រឡាញ់» របស់ទូរទស្សន៍ហង្សមាស។ ក្នុងភាពយន្តនេះ ក្រៅពីបានចាក់ផ្សាយនៅលើកញ្ចក់ទូរទស្សន៍ ក៏បានបង្ហោះឈុតសំខាន់ៗនៅលើយូធូបផងដែរ ទើបធ្វើអោយការសម្ដែងតបស់អ្នកនាងនៅក្នុងរឿងនេះ លេចធ្លោរតែម្ដង។
ភាពយន្តដែលហង្សមាសបានដំណើរការចាក់ផ្សាយក្នុងម៉ោងមាសរបស់ខ្លួននេះ ធ្វើអោយមានការចាប់អារម្មណ៍សូម្បីតែពេលពាណិជ្ជកម្ម និងរូបឃោសនាជាផ្ទាងប៉ាណូ ដោយសារតែមានការចូលរួមសម្ដែងដោយសុទ្ធតែជាតារាល្បីប្រចាំនៅហង្សមាស។
អ្នកនាង ខាត់ សុឃីម ត្រូវគេអោយដើរតួជាបងស្រីឆ្នាស់ និងហ៊ានធ្វើរឿងគ្រប់យ៉ាងដើម្បីប្រជែងយកទ្រព្យសម្បត្តិរបស់ប្អូនប្រុសក្រោយការស្លាប់ចោល ទើបធ្វើអោយស្ទើរតែគ្រប់ឈុតដែលអ្នកនាងបានសម្ដែង គឺមិនមានឈុតណាដែលអ្នកនាងបញ្ចេញចរឹតដូចគ្នានឹងនៅក្រៅឆាកនោះទេ។ អ្នកនាងបានសារភាពថា តាមរយៈភាពយន្តនេះ អ្នកនាងសម្ដែងឆ្នាស់ឡើងកប់តែម្ដង ហើយបើកុំតែមហាជនភាគច្រើនស្គាល់ច្បាស់នូវចរឹករបស់អ្នកនាងនៅខាងក្រៅឆាក គឺប្រហែលជាពេលអ្នកនាងចេញដើរ នឹងមានដុំថ្មស្វាគមន៍ជាមិនខាន។
យ៉ាងណាមិញ អ្នកនាងប្រាប់ថាអ្នកនាងពេញចិត្ត ដោយសារតែក្នុងរឿង «បិសាចគួរអោយស្រឡាញ់» ទាំងមូល គឺក្រុមផលិតករតម្រូវអោយអ្នកនាងសម្ដែងជាតួចិត្តអាក្រក់ ដែលអ្នកនាងប្រាប់ថាងាយស្រួលអោយមហាជនចាប់អារម្មណ៍។ អ្នកនាងប្រាប់ថា មួយឈុតៗដែលបានសម្ដែងឡើង គឺអ្នកនាង និងតួស្រីគឺអ្នកនាង ពេជ្រ សោភា ជាគូជម្លោះស៊ីសាច់ហុតឈាមតែម្ដង ដោយមានឈុតខ្លះក៏មានការឌឺដង និងតិះដៀលគ្នាយ៉ាងចាស់ដៃផង។
អ្នកនាងថា ទម្រាំតែថតបានចប់មួយឈុតៗ គឺអ្នកនាងអស់សំណើចខ្លួនឯងខ្លាំងណាស់ ជាពិសេសក្នុងពេលអ្នកនាងត្រូវបញ្ចេញសំលេង និងទឹកមុខកាចសាហាវ ដែលផ្ទុយពីចរឹកដើម ដែលអ្នកនាងថាមានតែខ្លាចគេធុញអ្នកនាងសើចដាក់ ឬនិយាយដាក់ខ្លួនមុន។ អ្នកនាងបង្ហាញអារម្មណ៍សប្បាយចិត្ត ដែលភាពយន្តដំបូងរបស់អ្នកនាងសម្រាប់ឆ្នាំ២០១៨នេះ ត្រូវបានមហាជនគាំទ្រ ដោយមានទាំងអ្នកគាំទ្រភាគច្រើន និយាយប្រាប់អ្នកនាងថាពេញចិត្តនឹងការសម្ដែងរបស់អ្នកនាងខ្លាំងណាស់ បើទោះជាអ្នកនាងធ្វើបាបអ្នកនាង ពេជ្រ សោភា ដែលប្រឈមនឹងអោយហ្វេនរបស់អ្នកនាងពេជ្រ សោភា ខឹងជំនួសពេលបានទស្សនារឿងក្ដី។
អ្នកនាងថា ក្រោយពីចេញសម្ដែងមួយរឿងនេះ មានផលិតករច្រើននាក់ទាក់ទងអោយអ្នកនាងសម្ដែងជាថ្មី ប៉ុន្តែអ្នកនាងពិបាកទទួលដោយសារតែរវល់រឿងមុខជំនួញផង និងថតបទចម្រៀងផង។ អ្នកនាងថាទទួលថតអោយហង្សមាសគឺដោយសារតែហង្សមាសជាទ្រនំ ជាម៉ែជាឪប៉ុណ្ណោះ បើជាផលិតករផ្សេងក៏មិនសូវចង់ដែរ ក្នុងពេលដែលអ្នកនាងរវល់ដកឃ្លាមិនរួចបែបនេះ។ យ៉ាងណាមិញអ្នកនាងថា នឹងទទួលថតរឿងភាគទូរទស្សន៍មួយរឿងទៀតឆាប់ៗ នៅពេលខែវស្សាមកដល់ ហើយមិនសូវរវល់រឿងទទួលអាហ្វែមង្គលការ។
លោក ឌៀប សុណ្ណាតារា ម្ចាស់ផលិតកម្ម Red Picture ដែលជាអ្នកផលិតរឿងនេះអោយហង្សមាស បានអះអាងថា ខ្លួនជ្រើសរើសត្រូវដែលផ្ដល់តំណែងអោយអ្នកនាង ខាត់ សុឃីម សម្ដែងជាតួឆ្នាស់ពិសពុល បន្ទាប់ពីភាពនយន្តឮគេនិយាយពីការសម្ដែងរបស់អ្នកនាងច្រើនតាំងពីបានដាក់ផ្សាយនៅហង្សមាស។ លោកថា ភាពយន្តនេះបានចំណាយពេលផលិតអស់ច្រើន ដោយក្នុងចំណោម៦០ភាគ ទើបផ្សាយបាន៣ភាគប៉ុណ្ណោះ កាលពីសប្ដាហ៍មុន តែលោកថាសន្ទុះគាំទ្រគឺមានខ្លាំង។
យ៉ាងណាមិញ លោកថាអាចបណ្ដាលមកពីតួអង្គសំខាន់ៗនៅក្នុងរឿងនេះ ជាពិសេសគឺអ្នកនាង ពេជ្រ សោភា និងខាត់ សុឃីម សុទ្ធតែជាតារាដែលមានអ្នកគាំទខ្លាំងក្លារៀងខ្លួនប៉ុណ្ណោះ។ លោកកាន់តែសប្បាយចិត្តថែមទៀត ក្រោយពីឈុតឆាករបស់ភាពយន្តនេះ ត្រូវគេកាត់ចេញពីទូរទស្សន៍យកទៅបង្ហោះព្រោងព្រាតលើយូធូប ហើយមានអ្នកទស្សនានិងចែកចាយខ្លាំង៕